Biñanda bya Kupangesa mu Mukanda wa Biwano bya Buyoye Bwetu Baka-Kristu na Cipangi Cetu
© 2024 Watch Tower Bible and Tract Society of Pennsylvania
JANUARY 6-12
BISIMPI BYA SEHO BYA MU LIJWI LYA NJAMBI BISAMU 127-134
Bisemi Twaleleleniho Kunyunga Buswana Bweni
Zibukeni Ngweni Mwapwa mu ba Seho mu Naanga ya Yehova
9 Yehova walingisile banu base kukala na bana, co lalo nabana cipangi ca kulongesa bana babo bamuzeme na kumupangela. Nga mu bisemi, kuma muli na kumwesa kukandelela ku bwana bwa kulitila bwanamyana Yehova ndi? Yehova nana tungelo cashu ca kulinga byuma bya kuliseza-seza, oloni kabanene bwana bwa kukala na bana. Ngeci bisemi banapande kumona cipangi ca kulela bana kupwa ca seho manene. Bisemi banabana cipangi ca kulitila ca kulela bana babo mu kulitombola na binangulo bya Yehova. (Efeso 6:4; Kwitu 6:5-7; Samu 127:3) Munga ya Yehova ili na kubwahesa byuma byabingi bije byasa kukwasa bisemi, bya kufwa ngwe mabulu, mavidio, myaso na biñanda bikwabo bili ha webusaiti yetu. Tate yetu wa mwilu hamolika na Munendi bazema manene banike. (Luka 18:15-17) Nga bisemi bakulahela Yehova na kweseka mubasela mwoshe kunyunga mwamubwa bana babo, co bazibisa Yehova kubwaha ku mbunge. Nga bisemi balinga ngoco, co bakwasa bana babo bakale na lilabelelo lya kukala mu naanga ya Yehova myaka yoshe.
Bisemi Longeseni Bana Beni Bazeme Yehova
20 Zibukeni mwamubwa bana beni. Ku Samu 127 banesekesa bana ku mikili. (Tandeni Samu 127:4.) Mikili bakaifulu ha bikubo bya kulisezaseza, co lalo imo ikapu yakama ikwabo yaindondo. Bana nabo balisezaseza. Bisemi banapande kuzibuka mubalongesela mwana na mwana. Baka-kulyambata ba ku Israel baje bakwasele bana babo babali bapangele Yehova, bendekele byuma byabakwasele. Bendekele ngwabo: “Twakele na kulongesa mwana na mwana ha likalyendi.” Nameme ngoco, mutwe wa naanga napande kwangula ngila yalongeselamo bana bendi.
Kutondesesa Bisimpi bya Seho
it-1 543
Miti ibanendeka mu Mbimbiliya
Muka-kwimba wendekele muyafwila miti ya olive omwo wakele na kukulahesa baje bakazibila Yehova lyoba ngwendi: “Bana bobe bapwa ngwe tuminango twa muti wa olive ku mesa yobe.” (Sm 128:1-3) Tuminango tubakatete ku muti wa olive bakatupangesa nga bashaka kukuna lalo miti ikwabo ya olive. Kutundaho, miti ya olive ije ineshwala, ikamene tu miti twa olive ha mizi yayo, co otu tu miti tukakwasa ei miti itwaleleleho kukalako. Ngwe mwa tu miti twatundondo, bana nabo bakakwasa baishabo, co oku kukalingisa naanga ipwe ya kubwahelela.
JANUARY 13-19
BISIMPI BYA SEHO BYA MU LIJWI LYA NJAMBI BISAMU 135-137
“Mwata Wetu Wapwa Wakama Kutubakana Binjambi Boshe”
it-2 661 ¶4-5
Nzili na Bilinga bya Nzili
Nzili ya Njambi ya kwendesa byuma bya kutanga yapwa ya kulitila. Yehova nga ashaka kumwesa ngwendi napu Njambi wa busunga asa kulinga ngoco nga apangesa nzili yendi mu kulingisa byuma bya kutanga bimwononoke, co akalingi ngoco ngwe bulumbunwisi bwa lizina lyendi. (Sm 135:5, 6) Litangwa na ngonde na mapulaneti na bingongonosi bikakabangeya mashiko aje akabyendesa. Kutundaho, byuma bili mu bukambwila bya kufwa ngwe mpunzi, nyonzi na byuma bikwabo nabyo bikakabangeya mashiko aje akabitwamenena, co lalo binjame bya bimbimba na tuzila baje bakajaluka na byuma bikwabo kubyapwilemo kujelesa lizina lya Njambi kuli baka-kumulwisa na ku bulombelo bwa makuli.
Nameme ngoco, Yehova Njambi asa kulingisa bya kutanga bimwese ngwabyo ikeye napu Njambi wa busunga ha kubilingisa byuma bije kubyesi kulinga. Byuma bya kufwa ngwe lilanga na nyonzi ya lihunzi na byuma bikwabo byakele na kulingika, oloni ebi byuma byapwile bya kulitila Yehova mwabipangesele mu kushulisilila cizango cendi. (Esekeseni 1Vi 17:1; 18:1, 2, 41-45) Kakangi, ebi byuma byapwile bya kulitila mwafwa ya simbu ibyambatele nambe bukama bwabyo (Ekz 9:24) nambe mwafwa byalingiwile mu ngila ya kulitila na ha simbu kuyapandele.—Ekz 34:10; 1Sa 12:16-18.
Cizemo ca Yehova Cije Kucesi Kutenguluka Cimikwasa Bati?
16 Nga tukulahela ngwetu Yehova atunyungilila, co kutulishoshomwena. Oloni bisimbu bimo tunasa kutwalelelaho kuliziba kuzeya. Yehova atukwasa bati nga tunazeye? (Tandeni Samu 136:23.) Yehova atubungutiya na kutujundula mangana keti tulizibe kuzeya. (Sm 28:9; 94:18) Kuzibuka ngoco kutukwasa bati? Kuzibuka ngwetu Njambi atwalelelaho kutunyunga, kutukwasa mu bingila bibali. Ngila ya kulibanga, tuzibuka ngwetu Yehova atwalelelaho kukala netu kwoshe-kwoshe kutuli. Yamucibali, tuzibuka ngwetu Tate yetu wa mwilu watwaka mbunge.
Kutondesesa Bisimpi bya Seho
it-1 1248
Jah
Kakangi lijwi lya Jah bakele na kulipangesa mu myaso ya kushangazala Yehova na mu malombelo a kumushangazala, co lalo banu ba Njambi bakele na kupangesa eli lijwi nga banahyana mu nzita nambe nga Njambi na bobola, nambe nga banalimwena nzili ya Njambi. Eli lijwi banalipangesa mu bingila byabingi manene. Majwi akwendeka ngwawo “Shangazaleni Jah!” bakaendeka lalo ngwabo Haleluya. Awa majwi banaendeka lwa kulibanga mu mukanda wa Bisamu ku Samu 104:35. Mu bisamu bikwabo banaendeka lika kumashangumukilo (Sm 111, 112), co mu bisamu byabingi kuawaniwa lwalwingi (135:3), co lalo mu bisamu bimo banaanasoneka lika kumamaneselelo (Sm 104, 105, 115-117), oloni bwingi bwawo banaasoneka kumashangumukilo na kumamaneselelo (Sm 106, 113, 135, 146-150). Ku mukanda wa Kujombolola, tungelo belukilile kwendeka awa majwi mu kushangazala Yehova.—Kuj 19:1-6.
Mu bisoneka bikwabo, majwi akwendeka ngwawo “Jah” banaapangesa mu kulambelela Yehova na mu myaso ije imwesa bukama bwendi. Yehova mwobwele baIsalele, Mosesa na baIsalele bembile mwaso wa kumushangazala, co bapangesele majwi akulifwa. (Ekz 15:2) Ku mukanda wa Isaya banakumbasana lijwi lya “Jah na Yehova” mu kukanyeka simpi ya kushangazala Yehova. (Isa 12:2; 26:4) Hezekiya mwashangazalele Yehova munima ya kumukangwisa ku mushongo uje washakele kumutsiya, welukilile kwendeka lijwi lya Jah. (Isa 38:9, 11) Kuli kuliseza kuli mukati ka batsi baje kubasa kushangazala Yehova na baje bashaka kuyoya mangana batwaleleleho kumushangazala. (Sm 115:17, 18; 118:17-19) Kutundaho, ku bisamu bikwaboco banasonekako bya malombelo a kukandelela Yehova mwafwa wabobwele, kubanyungilila na kubanangula.—Sm 94:12; 118:5, 14.
JANUARY 20-26
BISIMPI BYA SEHO BYA MU LIJWI LYA NJAMBI BISAMU 138-139
Keti Mutabese Lyoba Limyonowese Kukumbulula ku Biwano
Shangazaleni Yehova mu Cikungulukilo
10 Mukalijujukila nga mushaka kukumbulula ndi? Nga mukemwo, co keti yeni lika mukalizibi ngoco. Tubaboshe tukazibi lyoba nga tukumbulula. Nga mushaka kumanesa lyoba, munapande tahi kuzibuka byuma bikamilingisa muzibe lyoba. Mukatewe ngweni mwasa kwibala bimushaka kwendeka nambe kuloja cikumbululo ndi? Mukatewe ngweni cikumbululo ceni kucipu cacibwa ngwe bikumbululo bya bakweni ndi? Kuliziba ngoco kukwabihile, mwafwa kumwesa ngwabo mwapwa ba kulikehesa, co mwamona bakweni kupwa bakama kuli yeni. Yehova wazema kulikehesa. (Sm 138:6; Flp 2:3) Yehova washaka lalo ngwendi mumushangazale na kushongangeya bandolome na bandokazi nga muli ku biwano. (1Te 5:11) Wamizema, co asa kumikwasa musimpe.
Litakameseni Umo na Mukwabo nga Muli ku Biwano
7 Muwana bukwasi nga mwituluka mu byuma bikwabo bibanendeka mu Tuposhi tubanatuhula kunima. Cakumwenako, tunapande kulibwahesela mwamubwa. (Pro 21:5) Nga mwazibisisa mwamubwa byuma bimunalibwahesela, kumipwila kwakwasi kukakumbulula ku biwano. Co lalo munapande kukumbulula mu bwihi. (Pro 15:23; 17:27) Kukumbulula mu bwihi kumikwasa mangana keti mulishoshomwene manene. Nga mukumbulula mu ngila yayasi na kupangesa majwi amandondo, mukwasa bandolome na bandokazi kuzibisisa byuma bimuli na kwendeka, kutubakana kwendeka byuma byabingi-bingi. Nga mukumbulula bikumbululo byabihi mu majwi eni mumwesa ngweni munalibwahesela mwamubwa, co mwazibisisa mwamubwa oyo ñanda.
Kutondesesa Bisimpi bya Seho
it-1 862 ¶4
Kukonekela
Ha kupwa baka-Kristu, tunapande kukonekela bakwetu nameme batubiisila lwalwingi. (Luk 17:3, 4; Efe 4:32; Kol 3:13) Njambi kesi kukonekela baje kubesi kukonekela bakwabo. (Mat 6:14, 15) Nga ‘munu nalingi bubi’ bakamutundisa mu cikungulukilo, oloni mukwita kwa simbu nga uje munu atenguluka mu busunga bakamukonekela. Co bandolome na bandokazi bakamutambula mwamubwa na kumumwesa cizemo. (1Kr 5:13; 2Kr 2:6-11) Nameme ngoco, baka-Kristu kubapandele kukonekela munu uje alingila bubi shakelo, co lalo uje shendi kutenguluka. Banu ba cifwa eci bakapu bitozi ba Njambi.—Heb 10:26-31; Sm 139:21, 22.
JANUARY 27–FEBRUARY 2
BISIMPI BYA SEHO BYA MU LIJWI LYA NJAMBI BISAMU 140-143
Munima ya Kulombela, Lingeni Byuma Bilitombola na Malombelo eni
‘Tolilila ku Majwi a Baka-Mana’
13 Anukeni ngweni Njambi wamizema mukemwo akaminangula. Yehova ashaka ngwendi byuma bitwendele mwamubwa. (Pro 4:20-22) Ngeci, omwo Yehova atunangula kupangesa Lijwi lyendi, mabulu a kukundama ku Mbimbiliya nambe kupangesa muka-Kristu wa kukola ku sipilitu, co ali na kumwesa ngwendi watuzema. Mukanda wa baHebelu 12:9, 10 ngwawo: ‘Ali na kulinga ngoco ngeci atukwase.
14 Akeni mbunge ku cinangulo keti ku ngila ibanaminangwilamo. Simbu imo tunasa kuliziba ngwetu kubatunangwile mu ngila yaibwa. Muka-kunangula nendi napande kunangula munu mu ngila ije imulingisa kumupwile kwakwasi kupangesa byanamunangula. (Gal 6:1) Oloni nga yetu babali na kunangula, co tunapande kwaka mbunge ku byuma bibanatunangula keti ku ngila ibanatunangwilamo. Tunasa kulihula ngwetu: ‘Nameme kubanjinangwile mu ngila yaibwa, oloni byuma bibananjinangula binjikwasa bati? Nameme munu nanjinangula wakala na buzeye bumo, kuma byuma byananjinangula binjikwasa ndi?’ Tumwesa ngwetu tuli na mana nga tupangesa byuma bibanatunangula.—Pro 15:31.
w10 3/15 32 ¶4
Twaleleleniho Kukala na ‘Mbunge ya Kujela’ Muno mu Matangwa Akukaluwa
Bangamba ba Njambi bamo bali na kuliwana na bukalu bwakufwa ngwe kubinja mishongo yakama, kujeneka kukala na bimbongo byakupwamo na kubalwisa. Co bisimbu bimo, ebi byuma bikabazibisa kubabala ku mbunge. Mwene Devidi nendi waliwanene na bukalu bwa kulifwa, mukemwo wendekele ngwendi: “Nzili yange ili na kuhwa, mbunge yange inambumbula.” (Sm 143:4) Bika byamukwasele mwaliwanene nobu bukalu? Devidi wanukile omwo Njambi wakwaselele bangamba bendi hamolika nomu mwamukwaselele. Kutundaho, wasinganyekesesele ha byuma byalingile Yehova mwafwa ya lizina lyendi lyakama. Co lalo watwaleleleho kusinganyekesesa ha bipangi bya Njambi. (Sm 143:5) Mu ngila ya kulifwa, netu nga tusinganyekesesa ha byuma byoshe byanalingi Ishamatanga yetu hamolika nebi byali na kutwalelelaho kutulingila, co oku kutukwasa nga tuli mu bukalu.
w15 3/15 32 ¶2
Kuma Lishiko lya Kwambata na Kushombokela “Muli Mwata Lika” Licipanga ndi?
Bisimbu bimo mwasa kuliziba ngwe mwalizibilile Devidi muka-kwimba uje wendekele ngwendi: “Njikumbulule bwasi, obe Yehova, nzili yange inahu. Keti unjishwekele cihanga cobe.” (Sm 143:5-7, 10) Ha bisimbu bya cifwa eci, tabeseni Tate yeni wa mwilu mangana amimwese byatonda ngwendi mulinge. Mwasa kulinga ngoco nga muwana simbu ya kutanda Lijwi lyendi na kusinganyekesesa ha byuma bimutanda. Kulinga ngoco kumikwasa muzibuke mashiko endi nomwo mwakwaselele bangamba bendi ba kusañulu. Nga mutolilila kuli ikeye, co oku kumikwasa mumukulahele manene na kumwononoka.
Kutondesesa Bisimpi bya Seho
it-2 1151
Bushungu
Endekesi ya Cifwisa. Makuli abakendeka baka-bubi banaesekesa ku bushungu bwa linyoka mwafwa akabiisa munu lizina. (Sm 58:3, 4) Baka-kubiisa bakwabo mazina banabatumbula ngwabo, “Kwisi ya tunwa twabo kuli bushungu bwa manyoka,” mwafwa na bushungu bwa linyoka bwakala kwisi ya kanwa kendi na ku mbange yendi ya kwilu. (Sm 140:3; Lom 3:13) Ndaka ya munu nga baipangesa kukubiisa banu mazina, kubangeya banu biñanda, ku bilongesa bya makuli na byendeka bikwabo byabibi, co ‘ishula na bushungu buje butsiya’.—Jms 3:8.
FEBRUARY 3-9
BISIMPI BYA SEHO BYA MU LIJWI LYA NJAMBI BISAMU 144-146
“Banabwahelela Banu Baje Njambi Yabo Napu Yehova!”
Bihula bya Baka-kutanda
2. Acisinganyekeni bibanendeka mu kapetulu koshe. Lijwi lya “co” libanasoneka mu vesi 12, limwesa ngwabo bibezikiso bibanendeka mu vesi 12 kutwala 14, binakundama kuli banu baka-busunga baje banendeka ngwabo ‘twobole na kutupatula’ kuli baka-bubi (vesi 11). Ebi bibezikiso banabyendeka na mu vesi 15, muje banendeka lubali hali “banu baje Njambi yabo ikeye Shukulu Kalunga” ngwabo, “banabezika.”
3. Obu bupolofweto bunalitombola na Bisoneka bikwabo bije byendeka ha bibezikiso bibakalikuwa banu ba kulongwa. Mukanda wa Samu 144:12-15 umwesa ngwabo Devidi wakulahelele ngwendi omwo Njambi akapatula baIsalele ku bitozi babo, akababezikisa mangana bapwe banu ba kubwahelela na kukala na byuma byabingi. (Lev 26: 9, 10; Kwi 7: 13; Sm 128: 1-6) Cakumwenako, ku mukanda wa Kwituluka mu Mashiko 28:4 ngwabo: “Shukulu Kalunga akamibezikisa na kumyana bana babangi na bimbuto byabingi, hamo na bingombe na bimanga babangi.” Ha simbu yayulile Solomoni muna Devidi, baIsalele bayoyele mu kwoloka, co bakele na byuma byabingi. Bibezikiso bibalikuwile banu mu ciyulo ca Solomoni bimwesa bibezikiso bibakalikuwa banu mu Bumwene bwa Mesiya.—1Vi 4: 20, 21; Sm 72: 1-20.
Twaleleleniho Kukanyamesa Lilabelelo Lyeni
16 Njambi natwana lilabelelo lya seho manene lya kukayoya myaka yoshe. Twabandamena kukayoya mwamubwa kulutwe, co twakulahela ngwetu Njambi akashulisilila byanakulahesa. Lilabelelo lyetu lyapwa ngwe cimikiso ca bwato mwafwa likatukwasa tukolese omwo tuliwana na byeseko nomwo batuyandesa, co lalo likatukwasa tujeneke kutewa kutsa. Lyapwa ngwe tepa ya cikubo mwafwa likanyungilila bisinganyeka byetu mangana tulinge byuma byabibwa na kujeneka kulinga byuma byabibi. Eli lilabelelo libanendeka mu Mbimbiliya likatukwasa tulikute busamba na Njambi na kuzibuka mwatuzemena. Kutwalelelaho kukanyamesa lilabelelo lyetu kutukwasa manene.
17 Mu mukanda wasonekelele baLoma, kapositolo Paulu wabashongangeyeye ngwendi: “Bwaheleleni mwafwa ya lilabelelo lyeni.” (Lom 12:12) Paulu wabwahelelele mwafwa wazibukile ngwendi nga atwalelelaho kupwa wa kulongwa, co akayoya myaka yoshe mwilu. Netu tunapande kubwahelela mwafwa ya lilabelelo lituli nalyo, mwafwa twakulahela ngwetu Yehova akashulisilila byuma byanakulahesa. Muka-kwimba wasonekele ngwendi: “Nabezika munu uje . . . lilabelelo lyendi lili muli Yehova Njambi yendi . . . muka-kulongwa simbu yoshe.”—Sm 146:5, 6, NWT.
Cizemo Muka Cikanene Kubwahelela kwa Busunga?
19 Ha myaka 6,000 ineti, Satana nayandesa manene banu. Mu kaye munashulu banu baka-kulizema bakebo babenya na baka-kuzema bimbongo na baka-kuzema manene senga. Co lalo bashaka lika kunyanyamena bakwabo na kwaka biyongola byabo mu mutamba wa kulibanga. Banu ba cifwa eci kubasa kupwa. Oloni muka-kwimba wamwesele byuma Binena kubwahelela omwo wasonekele ngwendi: ‘Nabezika munu uje ali na Njambi ya Yakomba ngeci amukwase, munu uje lilabelelo lyendi lili muli Shukulu Kalunga Njambi yendi.’—Sm 146:5.
20 Banu ba Yehova Njambi bakala na cizemo ca busunga mukati kabo, co nambala yabo ili na kulibwezelela mwaka na mwaka. Obu bunapu bukaleho buje bumwesa ngwabo Bumwene bwa Njambi buli na kuyula, co ololo bunena bibezikiso byabingi hano ha kaye. Kubwahelela kwa busunga kukatundu mu kulinga cizango ca Njambi, co oku kukazibisa Njambi yetu wa Hakamwa ya byoshe kubwaha. Co banu baje bazema Yehova bakapwa ba kubwahelela ku myaka yoshe. Mu cilongesa cinatako, tukasimutwiya ha bifwa bibakala nabyo banu baje balizema bakebo babenya nomwo mubinalisezela na bifwa bibakala nabyo bangamba ba Yehova.
Kutondesesa Bisimpi bya Seho
it-1 111 ¶9
Tusitu
Mbimbiliya ikalongesa ngwayo banu banapande kunyunga mwamubwa tusitu. Yehova namwesa ngwendi ikeye watangele tusitu, co lalo ikeye muka-kubanyungilila. (Pro 12:10; Sm 145:15, 16) Lishiko lya Mosesa lyamwesele ngwalyo banu bapandele kunyunga mwamubwa bimuna babo. Nga munu wawanene bimuna banazimbala wapandele kubelwisa kuli babenyabo, co lalo nga cuma cimo cabasindakanene bapandele kubakwasa. (Ekz 23:4, 5) Banu bapandele kupangesa mwamubwa bimuna. (Kwi 22:10; 25:4) Bimuna bapandele kuhwima lya Sabata ngeci lika mwa banu. (Ekz 20:10; 23:12; Kwi 5:14) Bimuna baje bakele na bukalu bapandele kubatsiya nambe kubanyunga mwamubwa mangana keti banene bushonde. (Gen 9:5; Ekz 21:28, 29) Lishiko lyabindikile kusemesa bimuna bakuliseza.—Lev 19:19.
FEBRUARY 10-16
BISIMPI BYA SEHO BYA MU LIJWI LYA NJAMBI BISAMU 147-150
Kuli Byuma Byabingi Bitulingisa Tushangazale Jah
Mwafwa Bika Tunapande ‘Kushangazala Shukulu Kalunga?
5 Yehova kazembelekele lika mbunga ya baIsalele, oloni wazembelekele umo na umo wabo. Na matangwa ano mukemwo mwakalingila. Muka-kwimba wasonekele byakalingi Njambi ngwendi: “Akangwisa baka-kuzeya mu bimbunge, na kusaka bimbandu byabo.” (Sm 147:3) Yehova akakwasa baje bali mu bukalu, bupwe bwa ku mubila nambe bwa mu bisinganyeka. Na matangwa ano Yehova nalibwahesela kutuzembeleka na kutukwasa tukale na bisinganyeka byabibwa. (Sm 34:18; Isa 57:15) Akatwana mana na nzili mangana bitukwase kulikolesa omwo tuliwana na bukalu bwoshe bwoshe.—Jms. 1:5.
6 Muka-kwimba wendekele lalo ha bya kutanga bya mwilu ngwendi Yehova “alaba bingongonosi na kubiluka mazina abyo byoshe.” (Sm 147:4) Mwafwa bika wendekele bya bingongonosi bya mwilu lalo? Acisinganyekeni ha ñanda eyi: Muka-kwimba wamwene bingongonosi oloni kazibukile ngwendi bingayi. Mu kwita kwa myaka, banu banamono ngwabo bingongonosi byabingi manene. Banu bamo basinganyeka ngwabo mu mulalabizi wa Milky Way muli mabiliyoni a bingongonosi. Co kuli milalabizi ikwabo yaingi manene mwilu. Kukwesi munu nasa kulaba bingongonosi byoshe. Oloni Ishamatanga naluku ngongonosi na ngongonosi lizina. Eci cimwesa ngwabo bingongonosi byoshe byapwa bya seho kuli Yehova. (1Kr. 15:41) Batico ha banu ba hano hasi? Njambi uje azibuka hayakala ngongonosi na ngongonosi, amizibuka mwamubwa ha kapandi keni, azibuka kumwakala nomwo mumulizibila na byuma bimutonda na simbu imubitonda.
Mwafwa Bika Tunapande ‘Kushangazala Shukulu Kalunga?
7 Yehova kesi kumyaka lika mbunge, oloni ali na nzili ya kumikwasa mu bukalu bweni, co lalo washaka kulinga ngoco. (Tandeni Samu 147:5.) Simbu imo munasa kuliziba ngweni bukalu bumunaliwana nabwo bwakama manene, co lalo kumwasa kubukanyamena. Njambi azibuka hayalenga nzili yeni, ‘azibuka ngeci yeni mwapwa likungu.’ (Sm 103:14) Ha kupwa banu ba kujeneka kulumbunuka tunasa kwilukila ilukila kulinga bubi. Obu bubi bunasa kupwa kusebuka mu kwendeka nambe kuzibila bakwetu cipululu ha byuma bibali nabyo nambe kukala na tulingolingo twatubi. Yehova wapwa wa kujela mu byuma byoshe, oloni akatuzibisisa.—Isa 40:28.
Mwafwa Bika Tunapande ‘Kushangazala Shukulu Kalunga?
18 Muka-kwimba wazibukile mwamubwa ngwendi Njambi wazemene manene banu bendi ba kusañulu. Bakebo lika banu batambwile “majwi” a Njambi na “bilongesa byendi na mashiko endi.” (Tandeni Samu 147:19, 20.) Ano matangwa twabezika, mwafwa yetu lika twapwa Bakaleho ba Yehova. Kuzibuka Yehova na kupangesa binangulo bya mu Lijwi lyendi kunatulingisa tulikute busamba nendi. Neni mukashangazala Yehova na kushongangeya bakweni kulinga ngoco ngwe mwalingile uje wasonekele Samu 147 ndi?
Kutondesesa Bisimpi bya Seho
it-1 316
Tuzila
Muka-kwimba walekele “tuzila” ngwendi bashangazale Yehova (Sm 148:1, 10), co tuzila bakalingi ngoco mwafwa ya ngila ibanabatangelamo. Kazila umo asa kukala na mangona akupwa 1,000 nambe kutubakana 20,000. Lingona na lingona lyakala na tuma twakufwa ngwe bwaka-bwaka twatwingi manene. Limbaba lya liyembe lili na bwaka-bwaka bwa kweta ku mamiliyoni. Mubanatangela tuzila na mambaba abo, kutubakana mubakapangela fulai. Bitsiya bya tuzila byakala na bwina mukati, co oku kukalingisa tuzila bapwe babehu, mukemwo bitsiya bya tuzila bamo byakala na bulemu bwakweta ku magilamu 110. Bitsiya bimo bya mambaba a tuzila bakama baje bakapulula mwilu byakala na tuma twa kulifwa na mikambo ha kuzamenena, tuje tulifwa na bikubo bya ku mambaba a bifulai.
FEBRUARY 17-23
BISIMPI BYA SEHO BYA MU LIJWI LYA NJAMBI PROVEBIA 1
Babaha Mutolilila Kuli iya?
Eni Banike Kesi Mutabese Cuma Coshe Coshe Cimyonowese Kukatambula Cikandelela
16 Eni banike mwasa kulinga bati nga muliziba ngweni bisemi beni baka-Kristu banamyaka mu kamenga? Nga mulubala munasa kusinganyeka ngweni kupangela Yehova kunapu kubiisa lika simbu. Ngeci, nga mwecelela kulubala kumyonowese kupangela Yehova, co mukalibeya kulutwe mwafwa kukwesi cuma ceka casa kumikwasa kutubakana bisemi beni na cikungulukilo.
17 Nga bisemi beni kubaminangula, co muliziba ngweni bamizema ndi? (Heb. 12:8) Hamo nangwisi ya bisemi beni ikeyo ikamilubalesa. Kesi muzambwile kulubala, oloni zibukeni byuma binanenesa ngwabo baminangule mu ngila oyo. Ngeci, simpeni, co kesi mulubale nga bamitenukila. Lijwi lya Njambi ngwalyo: “Uje anyunga majwi endi ali na mana, na munu uje azibuka mwamubwa byuma akasimpi.” (Pro. 17:27) Lyakeleni cilengo ca kukola mu bisinganyeka na kutambula mwamubwa binangulo na kujeneka kulinyenga manene ha nangwisi ya bisemi beni. (Pro. 1:8) Kukala na bisemi baje bazema Yehova kunapu kubezika kwakama. Bashaka kumikwasa mangana mukawane cikandelela ca kukayoya myaka yoshe.
w05 2/15 19-20 ¶11-12
Kunyungilila Cizibukiso Cetu ha Kupwa Baka-Kristu
11 Lifwiteni mangana muzibise Njambi kubwaha keti banu. Tukashaka banu batuzibuke, co tukalingi ngoco ha kukala mu cibunga cimo. Munu woshe-woshe akashaka kukala na babusamba, co nga banu batuzibuka, tukalizibi manene kubwaha. Ha simbu itukapu bakwenje nomwo tuya na kukola, tukaliwana na ceseko ca kushaka kutembwinina bakwetu nambe kulinga byuma bije bibazibisa kubwaha. Oloni kakangi, babusamba betu kubesi kwaka mbunge ku byuma bije byasa kutukwasa. Bisimbu bimo, bakashaka lika ngwabo tulikwatasane nabo mu kulinga bubi. (Pro 1:11-19) Muka-Kristu mwakataba kulikwatasana na bakwabo mu kulinga byuma byabibi, kesi kwendeka ngwendi wapwa muka-Kristu. (Sm 26:4) Kapositolo Paulu watunangwile ngwendi, “Keti mutabese katumameno ka myaka ino kamimunge.” Yehova akatwana nzili mangana twase kuhyana ceseko ca kutusindiya kulinga bubi.—Heb 13:6.
12 Nga banu batusindiya kulinga byuma bije byasa kutulingisa tupokole mashiko a Njambi, twanukeni ngwetu kulongwa kuli Njambi kunapu kwa seho manene kutubakana biyongola bya banu nambe futisi ya banu babangi. Kuli cinangulo ca seho manene cije casa kutukwasa ku mukanda wa Ekizoda 23:2, ngwaco: ‘Keti mukabangeye mbunga mu kulinga byuma byabibi.’ Kalebu kakabangeyeye baIsalele baje bauwasanene ngwabo Yehova kasa kushulisilila bikulaheso byendi. Wakulahelele ngwendi Njambi ashulisilila bikulaheso byendi, co oku kwalingisile mangana bamubezikise. (Kul 13:30; Yos 14:6-11) Kuma neni mwasa kuhyana ceseko ca kubyana kukabangeya byuma bili na kulinga mbunga mangana munyungilile busamba bweni na Njambi ndi?
Kutondesesa Bisimpi bya Seho
it-1 846
Cilema
Mbimbiliya muinendeka bya cilema, kuilumbununa munu uje kaswile, oloni ikatalesa ku munu uje akabyana binangulo bya Njambi na mashiko endi. Majwi a Cihebelu anatako anatalesa ku munu wa cifwa eci, anapu kesilʹ (“cilema”; Pro 1:22), ʼewilʹ (“cilema” Pro 12:15), na·valʹ (“cilema”, Pro 17:7), na lets (“muka-sembulule,” Pro 13:1). Lijwi lya Cigriki lya aʹphron lilumbununa “munu wa kujeneka kuzibisisa” (Luk 12:20), co lijwi lya a·noʹe·tos lilumbununa “kujeneka mana” (Gal 3:1), lijwi lya mo·rosʹ likelyo lilumbununa ‘cilema’ nambe ‘kweba’ (Mt 23:17; 25:2).
FEBRUARY 24–MARCH 2
BISIMPI BYA SEHO BYA MU LIJWI LYA NJAMBI PROVEBIA 2
Mwafwa Bika Munapande Kulifwita Kulinga Cilongesa ca Munu Endilika?
“Twaleleleniho Kwenda mu Busunga”
16 Keti tubaboshe twashaka kutanda na kulilongesa. Oloni Yehova atuleka ngwendi tunapande kutwalelelaho ‘kushakezeka,’ mangana tuzibisise mwamubwa busunga. (Tandeni Provebia 2:4-6.) Kulinga ngoco kutukwasa manene. Corey ngwendi mwakatanda Mbimbiliya akashaka kuzibisisa vesi na vesi. Wendekele ngwendi: “Njikatanda mikanda yoshe na biñanda byoshe bije bilitombola na vesi na vesi injitanda. . . . Co lalo njikatondesesa na biñanda bikwabo. Kulinga ngoco kukanjikwasa njililongese byabingi.” Twasa kupangesa ngila yoshe-yoshe mu kulilongesa Mbimbiliya, oloni tumwesa ngwetu busunga bwapwa bwa seho kuli yetu nga tunoneka simbu ya kulilongesa na kwakako mbunge.—Sm 1:1-3.
Mana a Busunga ali na Kutambeka
3 Kukala na mana kunasa kulumbununa kupangesa byuma bituzibuka mu kwangula bya kulinga. Oloni byabingi byalibungila mu kukala na mana a busunga. Mbimbiliya ngwayo: “Kwononoka Shukulu Kalunga, cikeco bushangumukilo bwa mana. Nga uzibuka Njambi Wakujela, co unapu muka-kuzibisisa.” (Pro 9:10) Ngeci, nga tushaka kwangula bya kulinga tunapande ‘kuzibuka Njambi Wakujela’ nambe ngwetu kuzibuka biyongola byendi ha byuma bitushaka kulinga. Twasa kulinga ngoco nga tutondesesa mu Mbimbiliya na mu mabulu a kukundama ku Mbimbiliya. Nga tulinga ngoco, co tumwesa ngwetu tuli na mana a busunga.—Pro 2:5-7.
4 Yehova ikeye lika asa kutwana mana a busunga. (Lom 16:27) Mwafwa bika? Cakulibanga, Yehova ikeye lika Ishamatanga, co azibuka byuma byoshe byanatanga. (Sm 104:24) Camucibali, byuma byoshe byakalingi Yehova bimwesa ngwabyo wakala na mana. (Lom 11:33) Camucitatu, binangulo bya Yehova bikakwasa baje bakabipangesa. (Pro 2:10-12) Nga tushaka kukala na mana, co tunapande kupangesa ebi byuma bitatu omwo twangula bya kulinga mu kuyoya kwetu.
Eni Banike, Kanyameseni Likulahelo Lyeni
2 Ha kupwa ngamba ya Yehova wamundondo uje akalilongesa bya Njambi, simbu imo mukalizibi ngweni munapande kukulahela byuma bibakulahela banu babangi bya kufwa ngwe byuma byalizilile bikebyo babenya, kutubakana kukulahela Ishamatanga ndi? Nga ngoco, co kuli byuma bimo bimunapande kulinga mangana mukanyamese likulahelo lyeni. Ca kulibanga, munapande kupangesa mana eni anamyana Njambi aje asa ‘kuminyunga.’ Asa kumikwasa mujeneke kungumuka na bisinganyeka bya banu bije byasa kuzilula likulahelo lyeni.—Tandeni Provebia 2:10-12.
3 Kukulahela kwa busunga kwemana ha kuzibuka Njambi mwamubwa. (1Ti 2:4) Ngeci, omwo mulilongesa Lijwi lya Njambi na mabulu a baka-Krisitu, kesi mushatozoke. Pangeseni mana eni mu kusinganyekesesa mangana ‘muzibisise’ bimutanda. (Mat 13:23) Tumoneni omwo kulinga ngoco kwasa kumikwaselamo kukanyamesa likulahelo lyeni kuli Njambi uje wapwa Ishamatanga, na Mbimbiliya omwo tusimutwiya ha biñanda bije bimwesa bukaleho butwasa “kutaba.”—Heb. 11:1.
Kutondesesa Bisimpi bya Seho
it-1 1211 ¶4
Kulongwa
Munu asa kupwa wa kulongwa. Oloni asa lika kulinga ngoco Kwitila mu nzili ya Yehova na kutwalelelaho kukanyamesa likulahelo lyendi. (Sm 25:21) Njambi nakulahesa ngwendi apwa “ntelo” na “cimpaka” na kunyunga ngila ya banu bakulongwa. (Pro 2:6-8; 10:29; Sm 41:12) Kutwalelelaho kushaka kuzibisa Yehova kubwaha kukalingisa byuma bibendele mwamubwa mu kuyoya kwabo na kulinga byuma bibakwasa bashulisilile cilengo cabo. (Sm 26:1-3; Pro 11:5; 28:18) Yombi walishoshomwenene mwamwene ngwendi baka-busunga bakayanda na kutsa mwafwa ya bilinga bya baka-bubi, nameme ngoco, Yehova azibuka buyoye bwa baka-busunga. Co nakulahesa ngwendi akabasangula na kubana kuyoya kwa myaka yoshe. (Yom 9:20-22; Sm 37:18, 19, 37; 84:11; Pro 28:10) Kulongwa kukekwo kwalingisile Yombi apwe wa seho kuli Yehova keti bufuko bwakele nabwo. (Pro 19:1; 28:6) Bana baje bakakala na bisemi ba kulongwa bakabwahelela manene (Pro 20:7), mwafwa bakabakela mwanja waubwa, co lalo banu bakabasingimika.