Munima ya kubasheka mu lihya lya Edeni, Adama na Eva bakitile bana babangi. Munabo wa ntwatwa wa munalume Kaini wapwile ndimi, co munabo wamucibali Abele wapwile kanyungi.

Litangwa limo, Kaini na Abele banene milambu kuli Yehova. Kuma muzibuka mulambu ndi? Wapwa bwana bwa kulitila. Mulambu wa Abele wazibisile Yehova kubwaha, oloni mulambu wa Kaini kuwamuzibisile kubwaha. Ngeci, Kaini walubalele manene. Co Yehova wamunangwile ngwendi kulubala kwendi kwasa kumulingisa byuma byabibi. Oloni Kaini kakeleko mbunge.

Co walekele Abele ngwendi: ‘Tuye hamo mu shwata.’ Mubakele mu shwata babali lika, Kaini wabulumwine shongo yendi na kumutsiya. Yehova walingile bika mwamwene byuma byalingile Kaini? Yehova wanene Kaini kashitiko mwamushekele ku babushoko bwendi. Kubamutabesele kwiluka lalo.

Bika bitulilongesa ku mwanja wa Kaini? Nga tulubala mwafwa byuma kubyatwendelele bwino nambe nga banu batunangula mwafwa ya kulubala, tunapande kukwata mbunge na kutepulula ku kulubala kwetu mangana keti tulinge byuma byabibi.

Yehova kakebala Abele mwafwa wakele na bilinga byabibwa, co wazemene Njambi yendi. Njambi akasangula Abele mwakapwisa lino lifuti-libu paradaisi.

Mu kwita kwa myaka, ha lifuti-libu hakele banu babangi. Oloni bwingi bwabo bapwile banu bababi. Na tungelo bamo mwilu balingile byuma byabibi. Basezele mwela wabo mwilu na kwija hano hasi. Kuma muzibuka bibezilile hano hasi ndi? Bezile hasi na kutenguluka kupwa banu mangana bakwambate banakazi.

Tungelo bakitile bana na banakazi. Co baje bana bakolele na kukala manene na nzili, co lalo bakele na kujujwisa banu na kubazibisa kubabala. Yehova kecelelele byuma bya cifweci bitwaleleleho kulingiwa. Ngeci, wayongwele kunyongesa banu bababi na libazi.

Oloni kwakele munalume umo uje walisezelele kulako na baje banu bababi. Ou munalume, wazemene Yehova. Lizina lyendi Nowa. Ikeye na munakazi wendi bakele na bana batatu. Mazina abo apwile Shemu, Hamu na Jafeti, co boshe bambatele banakazi. Yehova walekele Nowa ashonge bwato bwakama buje bwasele kufumuka ha mema mangana ikeye na naanga yendi boboke libazi. Yehova walekele lalo Nowa ngwendi akobelese tusitu babangi mu bwato mangana nabo boboke.

Nowa kakwata-kwatele ku masinde, ngeci washangumukile kushonga bwato. Nowa na naanga yendi bashongele buje bwato ha myaka ya kweta ku 50. Bashongele bwato kwesekesa nomu mwabashikilile Yehova. Ha simbu yakele na kushonga bwato, Nowa wanangwile banu bya libazi lije lyakele na kwija. Oloni wahi wamutolililile.

Simbu yetele oni ya kukobela mu bwato. Tuziba byuma byateleko mu cilongesa cinatako.