Nganda ya Babele yakele muyehi na nganda ya Ule. Banu bakele mu Ule bakele na kulemesa binjambi beka kutubakana kulemesa Yehova. Oloni muje mu nganda, mwakele munalume umo uje wakele na kulemesa lika Yehova. Lizina lyendi Abrahamu.

Yehova walekele Abrahamu ngwendi: ‘Tunda mu lifuti lyobe na ku babushoko bwobe, uye ku lifuti linjikumwesa.’ Co lalo Njambi wamukulahesele ngwendi: ‘Njikakupwisa muyati wakama, co binaanga byoshe bya hasi bikabezika kwitila muli yobe.’

Abrahamu kazibukile kwamulekele Yehova ngwendi aye. Nameme ngoco wakulahelele Yehova. Ngeci, Abrahamu na munakazi wendi Sala na ishe Tela na Lote muna ndolome yendi balongekeyeye byuma byabo na kuya ngwe mwabalekele Yehova.

Abrahamu te ali na myaka 75 mwetele mu lifuti lyamulekele Yehova ngwendi aye na babushoko bwendi. Lije lifuti balisanene ngwabo Kanana. Mubakele kuje, Njambi wendekele na Abrahamu na kumukulahesa ngwendi: ‘Lifuti lyoshe liuli na kumona njikalyana bana bobe.’ Oloni Abrahamu na Sala kubakele na bana, co lalo bakulubalele. Ngeci Yehova wasele bati kushulisilila eci cikulaheso?

Abrahamu na Sala bakele mu bulo ha myaka yaingi. Basezele njibo yabo yaibwa mu nganda ya Ule na kukakala mu bitenti. Oloni Sala kayayabalele mwafwa wakulahelele Yehova.

Sala washakele manene kukala na mwana, ngeci walekele Abrahamu ngwendi: ‘Nga ngamba yange Hagale akita mwana, co owo mwana apwa ngwe munange.’ Mu kwita kwa simbu, Hagale wakitile mwana wa munalume. Lizina lyendi Ishimaele.

Munima ya myaka yaingi, Abrahamu na Sala batambwile bangenzi batatu. Ha simbu ei, Abrahamu wakele na myaka 99, Sala ikeye wakele na myaka 89. Abrahamu walombele baje bangenzi batumame mwisi ya muti mangana bahwimeko, co wabanenelele byakulya. Baje bangenzi bapwile beya? Bapwile tungelo. Balekele Abrahamu ngwabo: ‘Mungolosika ha simbu ino bene, yobe na munakazi wobe mukakala na mwana wa munalume.’ Sala uje wakele mu tenti wakele na kutolilila mubakele na kusimutwiya ebi biñanda. Ngeci, wajolele na kulyendekesa ngwendi: ‘Kuma njasa kukita mwana okuni njakulubala ndi?’

Mwaka wateleko, Sala wakitile mwana wa munalume ngwe mubendekelele tungelo ba Yehova. Abrahamu walukile munendi lizina lya Isaki, lije lilumbununa “Tujolo.”

Isaki mwakele na myaka 5, Sala wamwene Ishimaele ashendumuna Isaki. Sala washakele kunyungilila munendi, ngeci waile na kuleka Abrahamu ngwendi asheke Hagale na munendi Ishimaele. Hakulibanga Abrahamu kashakele kulinga ngoco. Oloni Yehova walekele Abrahamu ngwendi: ‘Tolilila byakuleka Sala. Munobe Ishimaele njimunyunga. Oloni bikulaheso byange bikalishulisilila kwitila muli Isaki.’