Lote wakele na kukala na Abrahamu mu Kanana. Abrahamu wapwile ishe wa mwanike. Mu kwita kwa simbu, Abrahamu na Lote bakele na bimuna babangi, ngeci mwela wapwile waundondo mangana base kukala hamo. Mukemwo Abrahamu walekele Lote ngwendi: ‘Kutwasa kukala mu mwela umo. Angula kuushaka kuya, nga uya ku cimoshwe, co yange njiya ku cilyo.’ Byuma byalingile Abrahamu bimwesa ngwabyo kalizemene ikeye babenya, indi bati?

Lote wamwene mutambela waubwa uje wakele kuyehi na nganda ya Sodoma. Wakele na mema amangi na mwila waubwa. Ngeci, Lote wangwile kujalukila kuje ku mutambela na naanga yendi.

Nganda ya Sodoma yalyatele na nganda ya Gomola. Banu batungile omu mu binganda bakele na bilinga byabibi manene. Yehova wayongwele kunyongesa ebi binganda bibali mwafwa ya bilinga byabo byabibi. Oloni Njambi kashakele kunyongesa Lote na naanga yendi. Ngeci, Njambi watumine tungelo babali mangana bakaleke Lote ngwabo: ‘Tundeni muno mu nganda, mwafwa Yehova ainyongesa.’

Lote wakele na kukwata-kwata ku masinde, katundile muje mu nganda haje bene. Ngeci, tungelo bakwatele Lote ku liboko na ku liboko lya munakazi wendi na ku maboko a bana bendi babali ba banakazi na kubatwala hanja ya nganda. Co babalekele ngwabo: ‘Teweni mangana mwobole myonyo yeni. Keti mutale kunima, nga mutala kunima mutsa.’

Lote na naanga yendi mubaketele mu nganda ya Zowa, Yehova wanyokesele tuhya na saufa mu binganda bya Sodoma na Gomola na kubinyongesa. Oloni munakazi wa Lote kononokele Yehova, watalele kumina, co watengulukile limunga lya mwongwa. Lote na bana bendi ba banakazi bobokele mwafwa bononokele Yehova. Lote na bana bendi hamo balizibile kubabala ku mbunge mwafwa munakazi wa Lote kononokele. Nameme ngoco, babwahelelele mwafwa batolililile ku mashiko a Yehova.

Abrahamu walongesele munendi Isaki kuzema Yehova na kukulahela bikulaheso byendi byoshe. Oloni Isaki mwakele na myaka 25, Yehova walekele Abrahamu alinge cuma cacikalu. Cuma muka bene oco?

Njambi walekele Abrahamu ngwendi: ‘Ambata munobe umolika ukamwane kupwa mulambu wa kwenyeka ha munkinda wa mu lifuti lya Moliya.’ Abrahamu kazibukile byalingisile Yehova amuleke kulinga cuma ca cifweci. Nameme ngoco, Abrahamu wononokele Yehova.

Lyamukwabo mutondo-tondo, Abrahamu waile na Isaki na bangamba bendi babali ku lifuti lya Moliya. Munima ya kwenda matangwa atatu, bashangumukile kumona minkinda ije yakele halako. Ngeci, Abrahamu walekele bangamba bendi ngwendi basale na kubandamena omwo ikeye na Isaki baile na kwana mulambu wa kwenyeka. Abrahamu walekele Isaki ngwendi ambate bikuni, co ikeye wambatele moko. Oloni Isaki wehwile ishe ngwendi: ‘Kasitu itukana kupwa mulambu ali kuli?’ Ishe wamukumbulwile ngwendi: ‘Munange, Yehova babenya atwana.’

Mubetele ha munkinda, batungile mutula. Co Abrahamu wakutile Isaki ku maboko na ku mendi na kumwaka haje ha mutula.

Abrahamu washomwene moko mu cindalo cayo. Haje bene, kangelo ka Yehova wamusanene kutundilila mwilu ngwendi: ‘Abrahamu! Keti ubulumune munobe. Hano njinazibukoni ngwange unakulahela Njambi mwafwa unashaka kwana munobe kupwa mulambu.’ Co Abrahamu wamwene manga wa nkomba nakoleka mambinga mu bimanda. Bwasi-bwasi, wazitwile Isaki na kwambata uje manga wa nkomba na kumupwisa mulambu.

Kutunda bene lije litangwa, Yehova watumbwile Abrahamu ngwendi kabusamba kendi. Mwafwa bika? Mwafwa Abrahamu walingile byuma byoshe byamulekele Yehova, nameme kazibisisile byuma byalingisile Yehova amuleke ngwendi abilinge.

Yehova welukilile kuleka Abrahamu cikulaheso camukulahesele ngwendi: ‘Njikakubezikisa na kutumisa bana bobe, nambe mbuto yobe.’ Kulumbununa ngwabo Yehova akabezikisa banu bababwa boshe kwitila mu naanga ya Abrahamu.