Jozefu wapwile muna Jakobu. Bayayendi bamwene ngwabo ishabo wazemene manene Jozefu. Musinganyeka ngweni balizibile bati? Bamuzibilile cipululu, co bamuzindile. Jozefu mwalotele bilota bije kazibisisile, walekeleko bayayendi. Ebi bilota byabalingisile basinganyeke ngwabo litangwa limo bakatsikamena Jozefu. Ngeci, bamuzindile oni manene.

Litangwa limo, bayaya ya Jozefu bakele na kunyunga bimanga babo kuyehi na nganda ya Shekemu. Jakobu watumine Jozefu mangana akamone mubanendukila. Mubamumwene ali na kwija, bendekele ngwabo: ‘Taleni, muka-bilota byendi owo ali na kwija. Tumutsiyeni.’ Jozefu mwetele, bamukwatele na kumumbila mu bwina bwa kuloba. Oloni yayendi Juda wendekele ngwendi: ‘Keti mumutsiye, tumulandeseni lika akapwe ndungo.’ Ngeci bamulandesele ku baka-mingoso ba baMidiani baje bakele na kuya ku Ijipiti ha ndando ya mashekele 20 a siuva.

Kutundaho, bayayendi bambatele cizalo cendi na kucimbwitika mu maninga a membe. Co bacitwalelele ishabo na kukamuleka ngwabo: ‘Kuma eci keti cizalo ca Jozefu ndi?’ Ngeci, Jakobu wasinganyekele ngwendi cikashama wa mu shwata natsii Jozefu. Jakobu wapokokele mbunge, co kubasele kumuzembeleka.

Mubaketele mu lifuti lya Ijipiti, Jozefu bamulandesele kuli Potifa uje wapwile mwata wa mu nkuta ya Falo. Oloni Yehova wakele na Jozefu. Potifa wanangukile ngwendi Jozefu wakele na kupanga mwamubwa cipangi cendi, co lalo wapwile wa kulongwa. Munima ya simbu yaindondo, Jozefu bamwangwile kutwamenena njibo ya Potifa.

Munakazi wa Potifa wanangukile ngwendi Jozefu wapwile wamubwa, co lalo wakele na nzili. Ha litangwa na litangwa wakele na kuleka Jozefu ngwendi alilale nendi. Jozefu walingile bika? Wabyanene na kwendeka ngwendi: ‘Embwe, eci cinapu cuma cacibi. Shukulu yange nanjikulahela manene, co yobe u munakazi wendi. Nga njililala nobe, co njilinga bubi ku mesho a Njambi.’

Litangwa limo munakazi wa Potifa wakwatele Jozefu ku cikobelo na kumusindiya ngwendi alilale nendi. Oloni Jozefu wapusunukile na kutewa. Potifa mwezile ku njibo, munakazi wendi wabangeyeye Jozefu biñanda bya makuli na kwendeka ngwendi washakele kumupika. Potifa walubalele manene, ngeci wakele Jozefu mu kamenga. Nameme ngoco, Yehova kebalele Jozefu.

Jozefu mwakele mu kamenga, Falo mwene wa Ijipiti walotele bilota bije kubasele kulumbununa banu. Oloni ngamba yendi umo wamulekele ngwendi Jozefu asa kulumbununa bilota. Haje bene, Falo watumine banu bakasane Jozefu mu kamenga.

Jozefu mwetele, Falo wamwihwile ngwendi: ‘Kuma wasa kulumbununa bilota byange ndi?’ Jozefu walekele Falo ngwendi: ‘Mu Ijipiti mukala myaka 7 ya byakulya na myaka 7 ya njala. Angula munu uje ali na mana atulike mwamubwa byakulya mangana banu bobe keti batse ku njala.’ Co Falo wendekele ngwendi: ‘Njinangula yobe. Yobe upwa wamucibali kutunda kuli yange.’ Jozefu wazibukile bati bibyalumbunwine bilota bya Falo? Yehova ikeye wamukwasele.

Jozefu watulikile byakulya ha myaka 7. Myaka 7 ya byakulya muyahwile, mu kaye koshe mwakele njala ngecilika mwendekelele Jozefu. Banu mu kaye koshe bakele na kuya kuli Jozefu mangana bakalande byakulya. Jakobu ishe ya Jozefu mwazibile ngwendi mu Ijipiti muli byakulya, watumine bana bendi ba banalume ba kupwa 10 mangana bakalande byakulya.

Bana ba Jakobu baile na kulanda byakula kuli Jozefu. Jozefu wazibukile bandolome bendi, oloni bakebo kubamuzibukile. Bamutsikamenene ngecilika mwalotelele te acili mukwenje. Jozefu washakele kuzibuka indi bandolome bendi bacikele na cizindo. Ngeci, wabalekele ngwendi: “Mu tunenga yeni. Munaija na kunenga lifuti mangana mumone ha bukobelelo.” Co bamukumbulwile ngwabo: ‘Embwe, twapwile tu bandolome 12, co tutunda mu lifuti lya Kanana. Ndolome yetu mukwabo watsa, co wamundondo nasala na tate.’ Jozefu wabalekele ngwendi: ‘Kunjimikulahela, kubanga munene shongo yeni kuno.’ Ngeci, bandolome bendi belukile kwimbo kuli ishabo.

Byakulya mubyahwile, Jakobu watumine lalo bana bendi mangana bakalande byakulya ku Ijipiti. Ha simbu ei baile na shongo yabo Benjamini. Mu kushaka kweseka bandolome bendi, Jozefu wakele nganja ya siuva mu njeke ya Benjamini ya byakulya na kubabangeya ngwendi banaibi. Co bangamba ba Jozefu mubawanene ije nganja mu njeke ya Benjamini, bandolome bendi balikomokelele. Balombele Jozefu ane bakebo kashitiko kutubakana kwana kashitiko shongo yabo.

Jozefu wanangukile ngwendi bandolome bendi banatenguluka. Co ha simbu ei Jozefu wonwene kukolesa, ngeci walilile. Co wendekele ngwendi: ‘Yange ndolome yeni Jozefu. Kuma batate baciyoya ndi?’ Bandolome bendi balikomokelele manene. Wabalekele ngwendi: ‘Keti muzibe kubihya ku bimbunge mwafwa ya byuma bimwalingile. Njambi wanjitumine kuno mangana njobole myonyo yeni. Ngeci, ilukeni bwasi-bwasi mangana mukambate batate.’

Bandolome ba Jozefu belukile kwimbo na kukaleka ishabo ou muzimbu waubwa. Co batwalele ishabo ku Ijipiti. Ngeci munima ya myaka yaingi, Jozefu na ishe balimwene lalo na kukala hamo.