Mu lifuti lya Uzi mwakele munalume uje wakele na kulemesa Yehova. Lizina lyendi Yombi. Wapwile wa kufuka manene, co lalo wakele na naanga yakama. Wakele na ngozi, co wakele na kukwasa tuhutu na banakazi baje batsisile banalume babo na kukwasa bana ba bisiwa. Nameme yombi wakele na kulinga byuma byabibwa, kuma oku kulumbununa ngwabo kaliwanene na bukalu ndi?

Satana Liyabolo wakele na kumona bilinga byabibwa bya Yombi, nameme ikeye kazibukile ngoco. Co Yehova wehwile Satana ngwendi: ‘Kuma unananguka ngamba yange Yombi ndi? Naumo wahi nalifu nendi ha lifuti-libu. Akanjitolilila na kulinga byabibwa.’ Satana wakumbulwile ngwendi: ‘Mukemwo, Yombi ali na kukwononoka. Uli na kumunyungilila na kumubezikisa. Unamwana libu na bimuna. Oloni munyekebyo, umone indi kecela kukulemesa.’ Yehova wendekele ngwendi: ‘Wasa kumweseka. Oloni keti umutsiye.’ Mwafwa bika Yehova wecelelele Satana eseke Yombi? Wakulahelele ngwendi Yombi akolesa.

Satana wesekele Yombi omwo wamunenelele bukalu bwa kuliseza-seza. Cakulibanga, watumine baSabeya bakwibe bingombe na bidonki ba Yombi. Kutundaho, tuhya twatsiile bimanga ba Yombi boshe. BaKaudiya nabo bebile tumele bendi. Co bangamba baje bakele na kunyunga aba bimuna nabo babatsiile. Co kwezile oni bukalu bwakama manene. Bana ba Yombi mubakele na kulinga cilika, njibo yabawililile, co boshe batsile. Yombi wapokokele mbunge, oloni kecelele kulemesa Yehova.

Satana washakele ngwendi Yombi ayande manene, ngeci wamunenelele bimbandu bije byajalakanene mubila wendi woshe. Yombi wakele na kuziba manene kubabala. Kazibukile byalingisile aliwane mu bukalu bwoshe obu. Oloni Yombi kecelele kulemesa Yehova. Njambi wabwahelelele mwamwene kukolesa kwa Yombi.

Kutundaho, Satana watumine banalume batatu bakeseke Yombi. Bamulekele ngwabo: ‘Cisholoka unalingi bubi na kubushweka. Njambi ali na kukwana kashitiko.’ Yombi wendekele ngwendi: ‘Nabimo byahi binjinabiisa.’ Oloni washangumukile kusinganyeka ngwendi Yehova ikeye wakele na kumunenela buje bukalu, co wendekele ngwendi Njambi kakele na kumulinga mwamubwa.

Elihu uje wapwile mukwenje wakele lika na kutolilila mubakele na kusimutwiya. Kukapwa muje wakumbulwileko na kwendeka ngwendi: ‘Mubaboshe munendeka byuma bya kuhenga. Yehova wapwa wakama manene kutubakana mutusinganyekela. Kasa kulinga cuna cacibi. Akamono byuma byoshe, co akakwasa baje bali mu bukalu.’

Yehova nendi wendekele na Yombi. Wendekele ngwendi: ‘Wakele kuli munjatangele lilu na lifuti-libu? Bika biuli na kunjanena mulonga? Uli na kwendeka byuma kuuzibuka ngwobe binaija bati.’ Yombi walitabelele ngwendi nasebuka. Wendekele ngwendi: ‘Njinakala na biyongola bya kuhenga. Njinazibile byobe, oloni hano njakuzibukoni. Nacimo cahi kuwasa kulinga. Njikonekeleko ha byuma binjinendeka.’

Ceseko cendi mucahwile, Yehova wamukangwisile na kumwana byuma byabingi kutubakana byakele nabyo hakulibanga. Yombi wayoyele myaka yaingi mu kubwahelela. Yehova wabezikisile Yombi mwafwa ya kumutolilila nameme kukwapwile kwakwasi kulinga ngoco. Kuma mutembwinina Yombi na kutwalelelaho kulemesa Yehova nameme byuma bifwe bati ndi?

Mu Ijipiti, naanga ya Jakobu baitumbwile ngwabo baIsalele. Jakobu na Jozefu mubatsile, kwakele Falo wamuha uje washangumukile kuyula. Wazibilile lyoba baIsalele mwafwa batumine manene na kukala na nzili kutubakana baka-Ijipiti. Ngeci ou Falo wapwisile baIsalele bindungo. Wabasindiiye kupanga mabrikisi na kupanga manene mu mahya. Oloni mubakele na kubayandesela manene mukemwo mubakele na kutumina manene. Falo mwamwene ngoco, washikile ngwendi bana ba banalume boshe baje basemuka banapande kubatsiya. Acisinganyekeni lika lyoba libazibile baIsalele mubazibile eli lishiko.

KaIsalele umo wa munakazi wa lizina lya Jokebedi, wakitile mbumbutu wamubwa wa munalume. Mu kushaka kunyungilila uje mbututu, wamwambatele na kumwaka mu cizuma na kukamushweka mu mahongo a Ndonga ya Nailo. Co Miriamu ndokazi ya uje mbututu wemanene halako mangana amone bilingiwa.

Muna Falo wa munakazi wezile na kutana ku ndonga, co wamwene cizuma. Muje mu cizuma wawanenemo mbututu ali na kulila, co wamuzibilile mema ku mbunge. Miriamu wehwile muna Falo ngwendi: ‘Ushaka ngwobe njikakusanene munakazi uje a kukulelelaye ndi?’ Muna Falo watabele, co Miriamu wakasanene Jokebedi ina ya uje mwana. Muna Falo walekele Jokebedi ngwendi: ‘Ambata ou mwana unjileleleye, co njikufweta.’

Uje mwana mwakolele, Jokebedi wamutwalele kuli muna Falo uje wakamulukile lizina lya Mosesa, co wakamulelele ngwe munendi wa kulikitila. Mosesa wakolele na kupwa muna mwene, co wasele kukala na byuma byoshe byashakele. Oloni Mosesa kebalele Yehova. Wazibukile mwamubwa ngwendi wapwile kaIsalele keti kaIjipiti. Co walyangwilile kupangela Yehova.

Mosesa mwakele na myaka 40 wayongwele kukwasa banu bendi. Mwamwene kaIjipiti apupa kaIsalele, Mosesa wapupile manene uje kaIjipiti, ngeci watsile. Co wambatele mubila wendi na kuushitika mu libu. Falo mwazibile byalingile Mosesa, washakele kumutsiya. Oloni Mosesa watewelele ku lifuti lya Midiani. Co Yehova wamunyungile mwakele kuje ku lifuti.