Mosesa wakele mu Midiani ha myaka 40. Wambatele na kukala na bana. Litangwa limo, mwakele na kunyunga bimanga bendi kuyehi na Munkinda wa Sinai, wamwene cuma ca kukomokesa. Wamwene ciputa ca mingonga cili na kushukuma, oloni kucakele na kwenya. Mosesa mwashwenene kuyehi mangana akamone bili na kulingiwa, wazibile lijwi litunda mu ciputa lyendeka ngwalyo: ‘Mosesa! Keti ushwene kuyehi. Shulula masanda obe mwafwa unemana ha libu lya kujela.’ Yehova ikeye wakele na kwendeka na Mosesa kwitila muli kangelo.

Mosesa wazibile lyoba, co wafwikile ku cihanga cendi. Yehova wendekele ngwendi: ‘Njinamono tuyando twa baIsalele. Njikabamena kuli baka-Ijipiti na kubanena mu lifuti lyalibwa. Yobe ukatwamenena banu bange na kubatundisa mu Ijipiti.’ Hamo Mosesa walikomokelele mwazibile awa majwi, indi bati?

Mosesa wehwile ngwendi: ‘Bika binjikendeka banu mubakanjihula ngwabo iya nakutumu?’ Njambi wamukumbulwile ngwendi: ‘Ukabaleke ngwobe Yehova Njambi ya Abrahamu, Njambi ya Isaki, Njambi ya Jakobu ikeye nakutumu.’ Co Mosesa wendekele ngwendi: ‘Batico nga banu kubakanjitolilila?’ Yehova wamwesele Mosesa bukaleho buje bwamwesele ngwabwo wakele hamo nendi. Walekele Mosesa ombile mulamu wendi hasi. Co watengulukile kupwa linyoka. Mosesa mwakwatele uje linyoka ku mukila, watengulukile lalo kupwa mulamu. Yehova wendekele ngwendi: ‘Muukalinga eci cikomokeso, bakataba ngwabo yange njinakutumu.’

Mosesa wendekele ngwendi: ‘Kunjapwile muka-kwendeka wa mutongwe.’ Yehova wamukulahesele ngwendi: ‘Njikakuleka byakwendeka, co lalo njikatuma ndolome yobe Aloni akakukwase.’ Mosesa wazibukile ngwendi Yehova ali nendi. Ngeci ikeye na munakazi wendi na bana babo belukile ku Ijipiti.

BaIsalele babasindiiye kupanga bipangi byabikalu ngwe bindungo. Ngeci, Yehova watumine Mosesa na Aloni ngwendi baye kuli Falo mangana bakamuleke ngwabo: ‘Tabesa banu bange baye mangana bakanjilemese mu mambo.’ Oloni Falo uje wapwile wa kulyalesa wakumbulwile ngwendi: ‘Kunjibikobelobyo byanendeka Yehova, ngeci kunjibatabesa ngwange baye.’ Falo wabasindiiye mangana bapange oni manene. Ngeci, Yehova wayongwele kunyanyamesa Falo. Kuma muzibuka mwalingilile ngoco ndi? Wanene baka-Ijipiti tushitiko 10. Yehova walekele Mosesa ngwendi: ‘Falo kesi na kunjitolilila. Imene mutondo akaya ku Ndonga ya Nailo, unapande kuya kuli ikeye na kukamuleka ngwobe mwafwa katabesele banu bange baye, mema oshe a mu Ndonga ya Nailo apwa maninga.’ Mosesa waile kuli Falo ngwe mwamulekele Yehova. Falo wakele na kulimwena Aloni mwapupile mulamu wendi ha Ndonga ya Nailo na kulingisa mema apwe maninga. Bisi bashangumukile kutsa, co mema ashangumukile kunika. Co lalo, kukwakele mema amabwa a kunwa. Nameme ngoco, Falo katabesele baIsalele baye.

Mu kwetile matangwa 7, Yehova watumine lalo Mosesa kuli Falo na kukamuleka ngwendi: ‘Nga kuutabesa banu bange baye, co lifuti lya Ijipiti lishula na mambotwe.’ Aloni wajundwile mulamu wendi mwilu, co mambotwe bashangumukile kushula mu lifuti. Banu bashangumukile kuwana mambotwe mu binjibo, ha myela na ha malonga. Mambotwe balisalele. Ngeci Falo walekele Mosesa ngwendi alombe kuli Yehova mangana atundise mambotwe. Co lalo wakulahesele Mosesa ngwendi atabesa baIsalele baye. Ngeci, Yehova watundisileko baje mambotwe. Baka-Ijipiti balundikile mitumbo ya mambotwe ba kutsa, co mu lifuti mwashangumukile kunika. Nameme ngoco, Falo anga katabesele baIsalele baye.

Yehova walekele lalo Mosesa ngwendi: ‘Leka Aloni apupe mulamu wendi hasi, co likungu litenguluka na kupwa tungeningeni.’ Haje bene, mu lifuti mwashulile tungeningeni. Baka-Ijipiti bamo balekele Falo ngwabo: ‘Aka kashitiko kali na kutunda kuli Njambi.’ Oloni Falo anga katabesele baIsalele baye.