Yehova walekele Mosesa ngwendi: ‘Kanduka wije kuli yange ha munkinda. Njisoneka mashiko ange ha bimbazubwila bya mamanya na kukwanawo.’ Mosesa wakandukile ha munkinda, co wakakeleho matangwa 40. Mwakele ha munkinda, Yehova wasonekele Mashiko Likumi ha bimbazubwila bibali bya mamanya na kumwanabyo.

BaIsalele mubamwene ngwabo Mosesa neshwala, basinganyekele ngwabo keluka. Ngeci, balekele Aloni ngwabo: ‘Tutonda munu wa kututwamenena. Tumungile njambi.’ Aloni wabalekele ngwendi: ‘Njaneni goudi yeni.’ Aloni wayengunwine goudi ibamwanene baIsalele na kumunga kamponya wa muna ngombe. Co banu bendekele ngwabo: ‘Ou muna ngombe ikeye Njambi yetu uje natutundisile mu Ijipiti.’ Banu bashangumukile kulemesa uje kamponya wa goudi na kulinga cilika. Kuma byuma bibalingile byapwile byabibi ndi? Eyo, mwafwa baIsalele balikumiiye ngwabo balemesa lika Yehova. Oloni ha simbu ei, bapokwele cije cikumiiyo.

Yehova wakele na kumona byuma byakele na kulingiwa, ngeci walekele Mosesa ngwendi: ‘Sikumuka ukamone banu. Kubesi na kunjononoka, bali na kulemesa njambi wa makuli.’ Mosesa wasikumukile oku nambata bimbazubwila bibali bya mamanya.

Mwakele na kushwena kuyehi na cilombo, wazibile banu bali na kwimba. Wabamwene oku bali na kukina na kutsikamena muna ngombe. Mosesa walubalele manene, ngeci wombilile bije bimbazubwila bibali bya mamanya hasi, co byatabukile. Haje bene, watikile uje kamponya. Co Mosesa wehwile Aloni ngwendi: ‘Aba banu banakungumuna bati mangana ulinge eci cuma cacibi ngacije?’ Aloni wakumbulwile ngwendi: ‘Keti ulubale, uzibuka mubafwila aba banu. Banakala na kutonda njambi, ngeci njombila goudi yabo mu tuhya, co mwatunda ou muna ngombe.’ Aloni kapandele kulinga ngoco. Mosesa welukile ha munkinda na kukalambelela Yehova mangana akonekele baIsalele.

Yehova wakonekelele baje bashakele kumwononoka. Kuma munamono ngweni kwapwile kwa seho kuli baIsalele kwononoka Mosesa ndi?

Mosesa mwakele ha Munkinda wa Sinai, Yehova wamulekele ngwendi atunge tenti ya kulitila ije ibatumbwile ngwabo tabanakele mangana baIsalele bamulemeselemo. Ei tabanakele basele kuyambata kwoshe-kwoshe kubakele na kuya.

Yehova wendekele ngwendi: ‘Leka banu bakwane byuma bibasa kwana mangana bikwase mu kutunga tabanakele.’ BaIsalele banene Mosesa goudi, siuva, kopa, mamanya a seho na byuma bya kulicakeya. Bamwanene lalo na bwanda, lineni, bilambu bya tusitu na byuma bikwabo byabingi. Bakele na mbunge ya kwana, ngeci banene byuma byabingi manene. Co Mosesa wendekele ngwendi: ‘Byuma binatumu, keti munene bikwabo.’

Banalume na banakazi babangi ba bitongwe balyanene mu kukwasa kutunga tabanakele. Yehova wabanene mana mangana bapange cipangi. Bamo bosele bwanda, kutonga binanga, nambe kutaleka. Bekaco bakele na kupangela ku mamanya, ku goudi na ku kushonga.

Banu batungile tabanakele ngecilika mwabalekelele Yehova. Batungile nanga yaibwa ije yangunwine tabanakele mu mitamba ibali, mutamba wa Kujela nou wa Kujela Manene. Mu mutamba wa Kujela Manene mwakele cikasha ca bukaleho cije cibapangele ha muti wa akesha na goudi. Mu mutamba wa Kujela mukemwo mwakele citumbikilo ca bindeya ca goudi na mesa na mutula wa kwenyekela isense. Mu lilapa mwakele lilonga lya kopa na mutula wakama. Cikasha ca bukaleho canukisile baIsalele cikumiiyo cibalingile ca kwononoka Yehova. Kuma muzibuka bicilumbununa cikumiiyo ndi? Cilumbununa kulinga cikulaheso ca kulitila.

Yehova wangwile Aloni na bana bendi ba banalume kupwa tupilistu baje bapangela ku tabanakele. Bapandele kuinyunga mwamubwa na kwenyekela Yehova bwana. Kapilistu wahakamwa Aloni ikeye lika ibatabesele kukobela mu mwela wa Kujela Manene. Wakele na kulinga ngoco lumolika mu mwaka mwakele na kwana mulambu wa bubi bwendi na naanga yendi na mulambu wa baIsalele boshe.

BaIsalele bamanesele kutunga tabanakele munima ya mwaka umo kutunda habatundilile mu Ijipiti. BaIsalele bakele oni na mwela kwa kulemesela Yehova.

Yehova washulisile tabanakele na bumpau bwendi na kulingisa lishelwa lisholoke helu lyayo. BaIsalele bakele na kutwalelelaho kukala ha mutambela habakele nga lishelwa limana helu lya tabanakele. Oloni lishelwa mulyakele na kutundaho, bazibukile ngwabo yapwile simbu ya kukatuka. Bakele na kwambata tabanakele na kukabangeya kulyakele na kuya lishelwa.