BaIsalele mubatundile ku Munkinda wa Sinai betile mu mambo ya Palani na kuya ku Kadeshi. Mubaketele mu Kadeshi, Yehova walekele Mosesa ngwendi: ‘Tuma banalume 12, umo ku muyati na muyati wa Isalele mangana bakanenge lifuti lya Kanana linjana baIsalele.’ Ngeci, Mosesa wangwile banalume 12 na kubaleka ngwendi: ‘Yeni mu Kanana mangana mukamone indi lifuti lyaco lyakala na byakulya. Mukamone indi banu bakalamo bali na nzili nambe embwe na kumona indi bakala mu bitenti nambe mu binganda.’ Joshua na Kalebu bapwile bamo ba tunenga 12 baile mu Kanana.

Munima ya matangwa 40, baje tunenga belukile na mikuyu, mapomagraneti na bushuka bwa binyu. Co bendekele ngwabo: ‘Lifuti lyaco lyalibwa, oloni banu bakalamo bali manene na nzili, co bakala mu binganda bibanazengeleka na bibumbe byabilaha.’ Nameme ngoco, Kalebu wendekele ngwendi: ‘Twasa kubahyana. Tuyeni hano bene!’ Kuma muzibuka byalingisile Kalebu endeke ngoco ndi? Mwafwa ikeye na Joshua bakulahelele Yehova. Oloni tunenga 10 bendekele ngwabo: ‘Embwe, banu ba mu Kanana ba kutunuka. Twakele na kusholoka ngwe bimbimba kuli bakebo.’

Majwi a tunenga 10 azeyesele manene baIsalele. Ngeci, bashangumukile kuyayabala na kwendeka kuli umo na mukwabo ngwabo: ‘Twanguleni ntwama weka mangana twiluke ku Ijipiti. Bikoni bituila ku Kanana mangana bakatutsiileko?’ Oloni Joshua na Kalebu bendekele ngwabo: ‘Ononokeni Yehova, co keti muzibe lyoba mwafwa atunyungilila.’ Nameme ngoco, baIsalele kubatolililile. Co bashakele kutsiya Joshua na Kalebu.

Yehova walingile bika? Walekele Mosesa ngwendi: ‘BaIsalele kubesi na kunjononoka nameme njinabalingila byuma byabingi. Ngeci, bakala mu mambo ha myaka 40, co mukemwo mubatsila. Bana babo na Joshua na Kalebu bakebo lika bakakobela mu lifuti linjabakulahesele.’

BaIsalele mubakele mu mambo, Kola na Dathani na Abilamu na bakwabo 250 batengulukilile Mosesa. Bamulekele ngwabo: ‘Kutumishaka. Bika bikulingisa utwaleleleleho kupwa ntwama yetu na Aloni apwe kapilistu wahakamwa? Yehova ali netu tubaboshe, kesi lika nobe na Aloni.’ Byuma bibendekele kubyazibisile Yehova kubwaha. Walizibile ngwendi batengulukilile ikeye.

Mosesa walekele Kola na banu bendi ngwendi: ‘Imene mukaije ku tabanakele na bilahwilo byeni bya tuhya bili na isense. Yehova akatumwesa yanangula.’

Lyamukwabo, Kola na banalume 250 bakaliwanene na Mosesa ku tabanakele. Mubaketele, bakenyekele isense ngwe ngwabo nabo bapwile tupilistu. Co Yehova walekele Mosesa na Aloni ngwendi: ‘Tundeni kuli Kola na banu bendi.’

Nameme Kola waile ku tabanakele kuli Mosesa, Dathani na Abilamu na binaanga byabo kubaileko. Kutundaho, Yehova walekele baIsalele ngwendi batunde ku bitenti bya Kola na Dathani na Abilamu. Haje bene, baIsalele batundileko. Dathani na Abilamu hamolika na binaanga byabo batuhukile mu bitenti byabo na kwimana hanja. Oho bene libu lyashamene na kubalehula. Ku tabanakele, tuhya twezile kutunda mwilu na kwenyeka Kola na banu bendi 250.

Yehova walekele Mosesa ngwendi: ‘Ambata mulamu kuli ntwama na ntwama wa miyati ya Isalele na kusonekaho lizina lyendi. Oloni ha mulamu wa muyati wa Levi, sonekaho lizina lya Aloni. Muumanesa, yake mu tabanakele, co mulamu wa munu injangula umena bintemo.’

Lyamukwabo, Mosesa watuhwile ije milamu na kuimwesa bantwama. Ha mulamu wa Aloni hamenene bintemo, co wemine maomondi a kuhya. Ei ikeyo ngila yapangesele Yehova mu kumwesa ngwendi nangula Aloni kupwa kapilistu wahakamwa.