Tunenga ba baIsalele mubaile na kunenga nganda ya Jeliko, bakakele ku njibo ya munakazi wa lizina lya Rahabu. Mwene wa mu Jeliko mwazibile byaba tunenga, watumine maswalale bendi ku njibo ya Rahabu. Oloni Rahabu washwekele baje tunenga ha ciluli ca njibo yendi na kuleka maswalale ngwendi tunenga banai. Kutundaho, walekele tunenga ngwendi: ‘Njimikwasa mwafwa njizibuka ngwange Yehova ali neni, co lalo mufungulula lino lifuti. Shukulu-kambu, njikulaheseni ngweni munjinyungilila hamolika na naanga yange.’

Tunenga bamulekele ngwabo: ‘Tukukulahesa ngwetu kukwesi munu akakala mu njibo yobe akabetwa.’ Bendekele lalo ngwabo: ‘Kuta mukole wa kubenga ha windo yobe mangana babushoko bwobe boboke.’

Rahabu watuhwisilile baje tunenga hanja ya nganda mu windo kupangesa mukole wa kubenga. Bakabandele ku minkinda ha matangwa atatu, co baile kuli Joshua. Kutundaho, baIsalele bajabukile Ndonga ya Jodani. Jeliko ikeyo nganda yakulibanga ibafungulwile. Co Yehova wabalekele ngwendi bazenguluke nganda ya Jeliko lumo oku bali na kucaula ha litangwa na litangwa ha matangwa 6. Ha litangwa lya bu 7, bacawile na kuzenguluka nganda lwa kupwa 7. Tupilistu bohyesele mapembo, co maswalale batambekele manene. Ngeci bibumbe bya nganda byawililile hasi. Oloni njibo ya Rahabu ije yakele ku cibumbe ca nganda kuyawile. Rahabu na babushoko bwendi bobokele mwafwa bakulahelele Yehova.

Muzimbu wa kufungulula nganda ya Jeliko wajalakanene mu lifuti lyoshe lya Kanana. Ngeci, bimyene ba mu Kanana balikwatasanene mangana balwise baIsalele. Oloni baGibioni bakebo bakele na butumbe bwa kuliseza. Bazalele bizalo bya kutabozoka na kuya kuli Joshua na kukamuleka ngwabo: ‘Tuli na kutunda ku lifuti lya kulako manene. Twazibi byanamilingilile Yehova mumwakele mu Ijipiti na mu Mowabi. Tukulaheseni ngweni kumutulwisa, co tupwa bangamba beni.’

Joshua wakulahelele bibendekele, ngeci wabakulahesele ngwendi kabalwisa. Mu kwetile matangwa atatu, Joshua wazibile ngwendi baje banalume kubatundile ku lifuti lya kulako. Batundile mu Kanana. Ngeci, Joshua wehwile baGibioni ngwendi: ‘Bika bimunatukwisila?’ Bamukumbulwile ngwabo: ‘Tunakala na kuziba lyoba. Tuzibuka ngwetu Yehova Njambi yeni ali na kumilwila. Shukulu-kambu, keti mututsiye.’ Joshua wanyungile cikumiiyo calikumiiye nabo, ngeci kabatsiile.

Mu kwetile lika simbu yaindondo, bimyene batanu ba baKanana na maswalale babo bashakele kulwisa baGibioni. Joshua na maswalale bendi bendele butsiki bwoshe mangana bakakwase baGibioni. Mukwakile, bashangumukile kulwa. Oloni baIsalele bahyanene baKanana, co batewele. Kwoshe-kwoshe kubatewelele, Yehova wanyokeseleko nyonzi ya mamanya. Kutundaho, Joshua walombele Yehova ngwendi litangwa limane. Mwafwa bika walombele ngwendi litangwa limane okuni cuma ca cifweci kanda cilingiweho? Mwafwa Joshua wakulahelele Yehova. Ngeci, litangwa kulyalahukile kweta noho habahyanenene bimyene ba baKanana na maswalale babo.