Joshua watsile oku ali na myaka 110 munima ya kutwamenena banu ba Yehova ha myaka yaingi. Ha simbu yakele na kuyoya, baIsalele bakele na kulemesa Yehova. Oloni mwatsile, bashangumukile kulemesa tumponya ngwe mubakele na kulinga baKanana. Ngeci, Yehova watabesele Jabini mwene wa baKanana abayandese mwafwa becelele kumwononoka. BaIsalele balambelelele Yehova ngwabo abakwase. Ngeci, Yehova wabanene ntwama wamuha wa lizina lya Balaki. Balaki wakwasele banu beluke kuli Yehova.

Debora uje wapwile kapolofweto wa munakazi, watumine munu akasane Balaki. Washakele kumuleka muzimbu utunda kuli Yehova uje wendekele ngwawo: ‘Ambata banalume 10,000 uye na kukaliwana na maswalale ba Jabini ku muna ndonga wa Kishoni. Ukahyana Sisela ntwama wa maswalale ba Jabini.’ Co Balaki walekele Debora ngwendi: ‘Njiya, oloni kubanga nga uya nange.’ Debora wakumbulwile Balaki ngwendi: ‘Njiya nobe. Oloni zibuka ngwobe keti yobe ukatsiya Sisela. Yehova nendeka ngwendi munakazi ikeye akamutsiya.’

Balaki na maswalale bendi baile na Debora ku Munkinda wa Taboli mangana bakalibwahesele nzita. Sisela mwazibile ngwabo Balaki naija na maswalale bendi, wakungulwilile matemba na maswalale bendi mu cingulunga. Debora walekele Balaki ngwendi: ‘Lelo Yehova akukwasa uhyane bitozi bobe.’ Balaki na maswalale bendi 10,000 basikumukile kutunda ha munkinda mangana bakaliwane na maswalale ba Sisela ba nzili.

Yehova walingisile muna ndonga wa Kishoni ajalele. Ngeci, matemba a nzita a Sisela akakateyeye mu mandoba. Sisela wasezele litemba lyendi na kutewa. Co Balaki na maswalale bendi bahyanene maswalale ba Sisela. Sisela mwatewele, wakabandele mu tenti ya munakazi wa lizina lya Jaele. Jaele wamwanene mabele anwe, co mwamanesele kunwa wamufwikile lipai. Sisela wajukile, co waile mu tulo. Jaele walibembelele kuli sisale na kukamupameya mbambo mu mutwe, co watsile.

Balaki wezile na kutonda Sisela kuli Jaele. Co Jaele watuhukile mu tenti yendi na kuleka Balaki ngwendi: ‘Kobela mukati njikumwese munalume iuli na kutonda.’ Balaki mwakobelele mukati, wamwene Sisela natsi. Balaki na Debora bashangazalele Yehova mu mwaso mwafwa wabakwasele kuhyana bitozi babo. BaIsalele bakele mu kwoloka ha myaka 40 yateleko.

Mukwakele njala mu lifuti lya Isalele, kaIsalele umo wa lizina lya Naumi waile ku lifuti lya Mowabi na munalume wendi na bana babo babali ba banalume. Mu kwita kwa simbu, munalume wendi watsile. Bana bendi bambatele Ruthi na Olipa baje bapwile baMowabi. Calubinda, bana bendi nabo batsile mu kwita kwa simbu.

Naumi mwazibile ngwendi njala inahu mu Isalele, wayongwele kwiluka kwimbo lyabo. Ruthi na Olipa nabo baile nendi, oloni mubetele hakati, Naumi wabalekele ngwendi: ‘Munapwile banakazi bababwa ku bana bange, co lalo munapwile banyotomweno bababwa. Njishaka ngwange mushomboke lalo. Ngeci, ilukeni kwimbo lyeni ku Mowabi.’ Bamukumbulwile ngwabo: ‘Twakuzema. Kutushaka kukuseza.’ Oloni Naumi watwaleleleleho kubaleka ngwendi beluke. Olipa welukile, oloni Ruthi kelukile. Co Naumi walekele Ruthi ngwendi: ‘Olipa uje ali na kwiluka ku banu bendi na ku binjambi bendi. Nobe iluka nendi, ya ku bisemi bobe.’ Oloni Ruthi wamukumbulwile ngwendi: ‘Kunjikuseze, banu bobe bakapwa banu bange, Njambi yobe akapwa Njambi yange.’ Musinganyeka ngweni Naumi walizibile bati Ruthi mwendekele awa majwi?

Ruthi na Naumi betele mu Isalele ha simbu ibashangumukile kuteja mbali. Litangwa limo, Ruthi waile na kupupulula binona byasalele mu lihya lya munalume wa lizina lya Boazi muna Rahabu. Boazi wazibile ngwabo Ruthi wapwile kaMowabi uje wapwile wa kulongwa kuli Naumi. Ngeci, walekele baka-kuteja basezeleko Ruthi mbali imo mangana akuipupulule.

Buje butsiki, Naumi wehwile Ruthi ngwendi: ‘Lelo unakala na kupupulula mu lihya lyeya?’ Ruthi wamukumbulwile ngwendi: ‘Mu lihya lya Boazi.’ Co Naumi wamulekele ngwendi: ‘Boazi wapwa umo wa babushoko ba munalume wange. Twalelelaho kupupulula mu lihya lyendi na bangamba bendi ba bambanda. Mwafwa Boazi akakunyungilila.’

Ruthi watwaleleleleho kupupulula mu lihya lya Boazi kweta noho hayahwililile simbu ya kuteja mbali. Boazi wanangukile ngwendi Ruthi wakele na kupanga na nzili, co lalo wapwile munakazi uje wakele na bilinga byabibwa. Ha simbu ije, nga munalume atsa oku kanda akale na bana ba banalume, kabushoko kendi wasele kwambata munakazi yasezele. Ngeci, Boazi wambatele Ruthi. Co bakitile mwana wa munalume na kumuluka lizina lya Obedi. Obedi ikeye wakupwile kuku ya Mwene Devidi. Babusamba ba Naumi babwahelelele manene. Bendekele ngwabo: ‘Hakulibanga, Yehova wakwanene Ruthi uje nakulingi mwamubwa, co hanwoni nakwana mutekulu wa munalume. Tushangazaleni Yehova.’