Mu kwita kwa simbu, baIsalele bashangumukile lalo kulemesa binjambi ba makuli. Co ha myaka 7, baMidiani bakele na kwibila baIsalele bimuna babo na kubiisa bimbuto byabo. BaIsalele bakabandele mu mena a mu mamanya na ku minkinda mwafwa ya kutewa baMidiani. Co balambelelele Yehova ngwabo abobole. Ngeci, Yehova watumine kangelo kuli mukwenje wa lizina lya Gidioni. Uje kangelo wendekele ngwendi: ‘Yehova nakwangula kupwa muka-kulwa wa nzili.’ Co Gidioni wamwihwile ngwendi: ‘Njasa kwobola bati baIsalele? Njiwangoco.’

Gidioni wasele kuzibuka bati ngwendi Yehova namwangula? Wakele bwanda hasi na kuleka Yehova ngwendi: ‘Nga obu bwanda bujula na lime mutondo, oloni hasi kuhajulu, co njizibuka ngwange cili bene ushaka ngwobe njobole baIsalele.’ Lyamukwabo mutondo, bwanda bwajulile, oloni hasi kuhajulile. Nameme ngoco, Gidioni walombele lalo ngwendi litangwa lyateleko hasi hajule, oloni bwanda keti bujule. Byuma byalombele byoshe byalingiwile. Ngeci, Gidioni wakulahelele oni ngwendi Yehova namwangula. Co wakungulwile maswalale bendi mangana baye na kulwisa baMidiani.

Yehova walekele Gidioni ngwendi: ‘Njikwasa baIsalele bahyane ei nzita. Oloni kulingila uli na maswalale babangi, mwasa kusinganyeka ngweni munahyana ei nzita mu nzili yeni. Leka woshe uje ali na kuziba lyoba eluke kwimbo.’ Ngeci, maswalale 22,000 belukile, co wasalele lika na maswalale 10,000. Kutundaho, Yehova wamulekele ngwendi: ‘Ucili na maswalale babangi manene. Batwale ku muna ndonga, co baleke banwe mema. Ambata lika baje banwa mema oku batala-tala bitozi.’ Banalume 300 lika bakebo banwile mema oku batala-tala bitozi. Yehova wakulahesele ngwendi aba banalume babandondo bakahyana maswalale ba baMidiani 135,000.

Buje bene butsiki, Yehova walekele Gidioni ngwendi: ‘Ino ikeyo simbu ya kukalwisa baMidiani.’ Co Gidioni wanene maswalale bendi mapembo na bishuwa byakama muje mwakele mitetengo. Co lalo wabalekele ngwendi: ‘Njikengeni na kulinga byoshe binjilinga.’ Co Gidioni wohyesele lupembo lwendi na kutuba njaba yendi na kuhwingisa mutetengo wendi na kutambeka ngwendi: ‘Mukwale wa Yehova nou wa Gidioni.’ Co baje maswalale 300 nabo balingile byuma bya kulifwa. BaMidiani batewele na kushandokela mu mitambela yoshe. Co mwafwa ya liwayanga lyakeleko, bashangumukile kulitsiya umo na mukwabo. Naha lalo, Yehova wakwasele baIsalele bahyane bitozi babo.

KaIsalele umo wa lizina lya Elikana wambatele banakazi babali, Hana na Penina. Oloni wazemene manene Hana. Penina wakele na kushendumuna Hana simbu yoshe mwafwa Hana kakele na bana, oloni Penina wakele na bana babangi. Mwaka na mwaka, Elikana wakele na kuya na naanga yendi mu kulemesa Njambi ku tabanakele mu Shilo. Litangwa limo mubakele mu Shilo, Elikana wanangukile ngwendi munakazi wendi yazema manene wapokokele mbunge. Co wamulekele ngwendi: ‘Hana, keti ulile. Njili hamo nobe. Njakuzema.’

Co Hana waile likalyendi na kukalombela. Wakele na kulila mwakele na kulombela kuli Yehova. Wakulahesele Njambi ngwendi: ‘Yehova, nga unjana mwana wa munalume, njikwanaye mangana akupangele mu kuyoya kwendi kwoshe.’

Kapilistu Wahakamwa Eli wamwene Hana ali na kulila oku ali na kwendeka, co wasinganyekele ngwendi hamo napende. Hana wamukumbulwile ngwendi: ‘Embwe mwata wange, kunjapendele. Njili mu bukalu bwakama, co njili na kubuleka Yehova.’ Eli wanangukile ngwendi wabiisile mwalekele Hana ngwendi napende, co wamulekele ngwendi: ‘Njambi akwane biutonda.’ Munima ya kulombela, Hana walizibileko bwino, co welukile. Mu mwaka uje bene wakitile mwana wa munalume, co wamulukile lizina lya Samwele. Acisinganyekeni lika mwabwahelelele Hana mwakitile uje mwana!

Hana walingile byuma byakulahesele Yehova. Mwashumwine Samwele, wamutwalele ku tabanakele. Hana mwaketele ku tabanakele wakalekele Eli ngwendi: ‘Ou ikeye mwanike injinalombele kuli Yehova. Njinamwana kuli Yehova mu kuyoya kwendi kwoshe.’ Elikana na Hana bakele na kuya na kumona munabo Samwele mwaka na mwaka, co bakele na kumutwalela mukanjo wa kujeneka maboko. Yehova wanene lalo Hana bana batatu ba banalume na bana babali ba banakazi.