BaIsalele becelele lalo kulemesa Yehova na kushangumuka kulemesa binjambi ba makuli. BaAmoni mubalwisile baIsalele, baje binjambi ba makuli kubabanyungililile. BaIsalele bayandele ha myaka yaingi. Co kukapwa muje balekele Yehova ngwabo: ‘Twabiisa. Tulomba utwamene ku bitozi betu.’ BaIsalele batikile baje tumponya babo na kushangumuka kulemesa lalo Yehova. Yehova kakele na kuliziba mwamubwa mwakele na kumona baIsalele batwalelelaho kuyanda.

Liswalale umo wa lizina lya Jefuta bamwangwile kutwamenena baIsalele mubaile na kulwisa baAmoni. Simbu kanda aye walombelele kuli Yehova ngwendi: ‘Nga utukwasa kuhyana ei nzita, munjikeluka njakukwana munu uje alibanga kutuhuka mu njibo yange na kunjishesha.’ Yehova watolililile ku lilombelo lya Jefuta na kumukwasa ahyane ije nzita.

Jefuta mwelukile kutunda ku nzita, munu wakulibanga wamusheshele wapwile munendi wa mumbanda umolika. Mwakele na kushesha ishe wakele na kukina na kwimba kangoma. Bika byalingile Jefuta? Wanukile cikulaheso calikumiiye, co wendekele ngwendi: ‘Obe munange, unanjizibisa kubabala ku mbunge. Njinalikumiiye kuli Yehova. Ngeci, njinapande kukutwala ku Shilo ukapangele ku tabanakele.’ Oloni munendi wa mumbanda walekele ishe ngwendi: ‘Tate nga mwakulahesa laja Yehova, co lingeni byuma bimunakulahesa. Oloni njilomba tahi munjitabese kuya na babusamba bange ba banakazi ku minkinda ha bingonde bitatu. Munjikeluka, co njakuya ku tabanakele ku Shilo.’ Muna Jefuta wapangelele ku tabanakele mu kulongwa mu kuyoya kwendi kwoshe. Mwaka na mwaka babusamba bendi bakele na kuya ku Shilo kukamumona.

Kapilistu Wahakamwa Eli wakele na bana babali baje bapwile tupilistu ku tabanakele. Mazina abo Hofene na Finihasi. Kubakele na kwononoka mashiko a Yehova, co bakele na kulinga banu mwamubi. BaIsalele mubakele na kunena milambu yabo kuli Yehova, Hofene na Finihasi bakele na kulyangwila situ yaibwa manene. Eli wazibile bibakele na kulinga bana bendi, oloni kabanangwile. Kuma Yehova watabesele byuma bya cifweci bitwaleleleho ndi?

Samwele katembwininine Hofene na Finihasi nameme wapwile mwanike manene kuli bakebo. Ngeci, byuma byalingile Samwele byazibisile Yehova kubwaha. Butsiki bumo, Samwele mwalalele wazibile lijwi lyakele na kumusana. Co wendukile na kushatukila kuli Eli na kwendeka ngwendi: ‘Yange uno.’ Oloni Eli wamukumbulwile ngwendi: ‘Kunjakusanene, ya ukalale.’ Co Samwele waile na kulala. Wazibile lalo munu amusana. Samwele mwazibile lijwi lwamucitatu, Eli wanangukile ngwendi Yehova ikeye wakele na kumusana. Co walekele Samwele ngwendi nga aziba lijwi lalo, napande kukumbulula ngwendi: ‘Endeka Yehova, ngamba yobe ali na kutolilila.’

Samwele waile lalo na kulala. Co Yehova wamusanene ngwendi: ‘Samwele! Samwele!’ Wakumbulwile ngwendi: ‘Endeka, ngamba yobe ali na kutolilila.’ Co Yehova wamulekele ngwendi: ‘Leka Eli ngwobe njikamwana kashitiko na naanga yendi. Azibuka ngwendi bana bendi bali na kulinga byuma byabibi mu tabanakele yange, oloni kesi na kubanangula.’ Lyamukwabo mutondo, Samwele washokolwele bikolo bya tabanakele ngwe mwakele na kulingila simbu yoshe. Wakele na kuziba lyoba kuleka kapilistu wahakamwa byendekele Yehova. Oloni Eli wamusanene na kumwihula ngwendi: ‘Munange, bika byanakuleke Yehova? Njileke byoshe.’ Ngeci, Samwele walekele Eli byoshe byamulekele Yehova.

Samwele mwakele na kukola, watwaleleleleho kupwa kabusamba ka Yehova. Co baIsalele boshe bazibukile ngwabo Yehova nangula Samwele kupwa kapolofweto na lyaako.