Yehova walekele Samwele ngwendi: ‘Ya ku njibo ya Jesi. Munendi ikeye akaswana Saulu ha litanda.’ Ngeci Samwele waile ku njibo ya Jesi. Mwamwene ntwatwa ya Jesi, walyendekesele ngwendi: ‘Ou mukwenje ikeye ibanangula.’ Oloni Yehova waleke Samwele ngwendi keti ikeye. Yehova wendekele ngwendi: ‘Njikamono bili mu mbunge ya munu keti lika sholwesi yendi ya hanja.’

Co Jesi wanenele bana bendi 6 kuli Samwele. Oloni Samwele wendekele ngwendi: ‘Wahi yanangula Yehova ku bana bobe bali aha. Kuma uli na bana bakwabo ndi?’ Jesi wakumbulwile ngwendi: ‘Njili na mwana mukwabo wa mukwenje, Devidi. Nai na kunyunga bimanga bange.’ Devidi mwezile, Yehova walekele Samwele ngwendi: ‘Ikeye ou.’ Co Samwele wetilile mazi ha mutwe wa Devidi mu kumubwabesa kupwa mwene uje akayula baIsalele.

Mu kwita kwa simbu, kwakatukile nzita mukati ka baIsalele na baFilistiya baje bakele na liswalale wa kutunuka wa lizina lya Goliati uje wakele na kubalwila. Ha litangwa na litangwa, Goliati wakele na kushendumuna baIsalele. Watambekele ngwendi: ‘Neneni munalume alwe nange. Nga anjihyana, co tupwa bindungo beni. Oloni nga njimuhyana, co mupwa bindungo betu.’

Litangwa limo, Devidi wezile ku cilombo ca maswalale ba baIsalele, wanenelele byakulya bayayendi baje bapwile maswalale. Devidi mwazibile byakele na kwendeka Goliati, wendekele ngwendi: ‘Njiya na kumulwisa!’ Oloni Mwene Saulu walekele Devidi ngwendi: ‘Ucili umwanike.’ Devidi wakumbulwile ngwendi: ‘Yehova anjikwasa.’

Saulu wanene Devidi bizalo byendi bya buswalale, oloni Devidi wendekele ngwendi: ‘Kunjasa kulwa nebi bizalo.’ Devidi wambatele cipapa na kusikumuka ku muna ndonga. Wangwile Mamanya atanu a kuseneta na kuwaka mu ngonga. Co washatukilile kuli Goliati. Uje liswalale wa kutunuka watambekelele ngwendi: ‘Ija kuno obe mwanike. Njikwana ku tuzila ba mwilu na tusitu ba mu shwata mangana bakulye.’ Devidi kazibile lyoba. Co wakumbulwile mu kutambeka ngwendi: ‘Uli na kwija na mukwale na likunga, oloni yange njili na kwija mu lizina lya Yehova. Kuwesi na kulwa netu; uli na kulwa na Njambi. Banu boshe bali hano balimwena ngwabo Yehova ali na nzili kutubakana mukwale na likunga. Amyana mu maboko etu.’

Devidi wakele limanya mu cipapa na kucihwingisa na nzili yendi yoshe. Mu nzili ya Yehova, lije limanya lyakwatele Goliati na kukobela mu luholo lwendi. Uje liswalale wa kutunuka wawililile hasi na kutsa. Ngeci, baFilistiya batewele. Kuma mukakulahela Yehova ngwe Devidi ndi?

Devidi mwatsiile Goliati, Mwene Saulu wamwangwile kupwa ntwama wa maswalale bendi. Devidi wahyanene mu binzita byabingi, ngeci watsimanene manene. Simbu yoshe yakele na kutunda Devidi ku nzita, banakazi bakele na kumushesha oku bali na kwimba ngwabo: ‘Saulu natsii maswalale makulukazi, co Devidi natsii maswalale makumi a makulukazi.’ Ngeci, Saulu washangumukile kuzibila Devidi cipululu na kushaka kumutsiya.

Devidi wapwile mutongwe mu kwimbisa kalyalya. Litangwa limo Devidi mwakele na kwimbila Saulu kalyalya, Saulu wamwashele likunga. Devidi walihengele likunga, co lyakatibile ha cibumbe. Kushwa bene haje, Saulu watwaleleleleho kushakezeka bingila bya kutsiilamo Devidi. Ngeci, Devidi watewele na kukabanda mu mambo.

Saulu wambatele maswalale 3,000 na kuya na kuyomba Devidi. Saulu wakobelele mu bwina bwa mu limanya muje mwabandele Devidi. Co banu ba Devidi bamuyebetelele ngwabo: ‘Ei ikeyo simbu yaibwa ya kutsiya Saulu.’ Devidi wakalabelele kuli mwene na kukateta ku mukanjo wendi. Oloni Saulu nabimo byahi byazibile. Munima, Devidi walizibile kubihya ku mbunge mwafwa ya kujeneka kusingimika mwene yanabwabesa Yehova. Co katabesele banu bendi balwise Saulu. Kutundaho, Devidi watambekelele Saulu na kumuleka ngwendi ngwe washakele kumutsiya ngwe wamutsiile mwamuwanene mu bwina bwa mu limanya. Kuma Saulu watengulwile oni biyongola byendi bya kushaka kutsiya Devidi ndi?

Embwe. Saulu watwaleleleleho kuyomba Devidi. Litangwa limo butsiki, Devidi na mwehwendi Abishai balibembelele ku cilombo ca Saulu. Ha simbu ei, na Abina liswalale uje wakele na kunyunga Saulu nendi waile mu tulo. Co Abishai wendekele ngwendi: ‘Ei ikeyo simbu yetu, mana njimutsiye.’ Devidi wakumbulwile ngwendi: ‘Yehova azibuka byakalinga Saulu. Tuye twambate lika likunga lyendi na njaba yendi ya mema tuye nabyo.’

Devidi walondele ha munkinda uje wakele muyehi na cilombo ca Saulu. Co watambekele ngwendi: ‘Abina! Mwafwa bika kuwanyungilile mwene yobe? Likunga na njaba ya mema bya Saulu bili kuli?’ Saulu wanangukile ngwendi lije lijwi lyapwile lya Devidi, co wendekele ngwendi: ‘Ngwe unanjitsii, oloni kuwalingile ngoco. Njizibuka ngwange yobe unjinga na kupwa mwene wa Isalele.’ Saulu welukile ku lipela lyendi. Oloni keti boshe ba mu naanga ya Saulu bazindile Devidi.