Jonathani uje wapwile ntwatwa ya Mwene Saulu wapwile liswalale wa kusimpa. Devidi wendekele ngwendi Jonathani wakele na lumbisi kutubakana ngonga, co lalo wakele na nzili kutubakana ndumba. Litangwa limo, Jonathani wamwene maswalale ba baFilisitiya ha lilundu. Co walekele muka-kumwambatela bitwa ngwendi: ‘Tukalwisa baje maswalale nga Yehova atwana cimweso. Nga baFilistiya batusana ngwabo tuyeko co tukabalwisa.’ Co baFilistiya batambekele ngwabo: ‘Ijeni twakulwe!’ Ngeci balondele haje ha lilundu na kukatsiya maswalale 20.

Hakupwa mwana wa ntwatwa wa Saulu, Jonathani ikeye wapandele kuswana ishe ha litanda. Oloni Jonathani wazibukile ngwendi Yehova nangula Devidi apwe mwene wateleko. Nameme ngoco Jonathani kazibilile Devidi cipululu. Jonathani na Devidi balikutile busamba bwa kukanyama. Co balikulahesele kulinyungilila umo na mukwabo. Jonathani wanene Devidi mukanjo wendi na mukwale hamolika na buta bwa lusipa na mwiba kupwa cimweso ca busamba bwabo.

Devidi mwakele na kutewa kuli Saulu, Jonathani wamukabele na kukamuleka ngwendi: ‘Kolesa na kupwa wa kusimpa. Yehova nakwangula kupwa mwene. Tate nendi azibuka ngoco.’ Kuma neni mushaka kukala na kabusamba wamubwa ngwe Jonathani ndi?

Ha bisimbu byabingi, Jonathani wakele buyoye bwendi mu bushonde mangana akwase kabusamba kendi. Wazibukile ngwendi Mwene Saulu wakele na kushaka kutsiya Devidi, ngeci walekele ishe ngwendi: ‘Ulinga bubi bwakama nga utsiya Devidi; byahi byanabiisa.’ Saulu walubalelele manene Jonathani. Munima ya myaka, Saulu na Jonathani bakatsililile mu nzita.

Munima ya kutsa kwa Jonathani, Devidi watonda-tondele Mefibosheti muna Jonathani. Mwamuwanene, wamulekele ngwendi: ‘Mwafwa isho wapwile kabusamba wamubwa kuli yange, njikunyunga mu kuyoya kwobe kwoshe. Ukakala mu lipela lyange na kulya ku mesa yange.’ Devidi kebalele kabusamba kendi Jonathani.

Saulu mwatsile, Devidi wapwile mwene. Ha simbu ije wakele na myaka 30. Munima ya myaka, litangwa limo mangwezi, Devidi wakele na kwendangana ha ciluli ca lipela, co wamwene munakazi wamubwa. Devidi wawanene ngwabo lizina lyendi Bati-sheba uje washombokele kuli liswalale wa lizina lya Uliya. Devidi watumine banu bakasane Bati-sheba. Walilalele nendi, co wakele na cikute. Devidi wesekele kushweka buje bubi bwalingile. Walekele ntwama wa maswalale bendi ngwendi ake Uliya kulutwe lya nzita, co eluka munima na maswalale boshe mangana Uliya asale likalyendi. Uliya mubamutsiile mu nzita, Devidi wambatele Bati-sheba.

Oloni Yehova wamwene ebi byuma byabibi byoshe byalingiwile. Co walingile bika? Yehova watumine kapolofweto Nathani kuli Devidi. Nathani walekele Devidi ngwendi: ‘Munalume umo wa kufuka wakele na bimanga babangi, co munalume wa kahutu wakele na manga umo wamundondo yazemene manene. Uje munalume wa kufuka wanyekele munalume wa kahutu manga yendi yakele nendi.’ Devidi walubalele na kwendeka ngwendi: ‘Owo munalume wa kufuka napande kutsa!’ Co Nathani walekele Devidi ngwendi: ‘Yobe bene munalume wa kufuka!’ Devidi wapokokele mbunge na kulitabela kuli Nathani ngwendi: ‘Njabiisila Yehova.’ Obu bubi bwanenele tuyando kuli Devidi na naanga yendi. Yehova wanene Devidi kashitiko, oloni wamutabesele atwaleleleho kuyoya mwafwa walitabelele bubi bwendi, co lalo walikehesele.

Devidi washakele kutungila Yehova tempele, oloni Yehova wangwile munendi Solomoni mangana aitunge. Devidi washangumukileko kubwahesela Solomoni byuma, co wendekele ngwendi: ‘Tempele ya Yehova inapande kupwa ya bumpau. Solomoni acili mwanike, oloni njimubwahesela byuma mangana njimukwase.’ Devidi walambwile bimbongo byendi byabingi ku cipangi ca kutunga. Watondele na baka-kutunga ba bitongwe. Co wakungulwile goudi na siuva na kunena miti ya sida kutunda ku Tile na ku Sidoni. Ku mamaneselelo a buyoye bwendi, Devidi wanene Solomoni lipapelo lije lyamwesele muyapandele kusholokela tempele na kumuleka ngwendi: ‘Yehova ikeye nanjileke binjinasoneka aha ha lipapelo mangana njikwanelyo. Yehova akukwasa. Keti uzibe lyoba. Kolesa na kupanga cipangi.’