Solomoni mwapwile mwene wa Isalele, Yehova wamwihwile ngwendi: ‘Bika biushaka ngwobe njikwane?’ Solomoni wakumbulwile ngwendi: ‘Nji mwanike, co kunjizibuka byakulinga. Shukulu-kambu njane mana mangana njizibuke mwakuyulila banu bobe.’ Yehova wendekele ngwendi: ‘Mwafwa unalombo mana, njikupwisa munalume wa mana manene mu kaye koshe. Njikwana na bufuko. Co lalo nga unjononoka, ukayoya myaka yaingi.’

Solomoni washangumukile kutunga tempele. Walikwasesele goudi yaibwa manene na siuva yaibwa manene na miti yaibwa na mamanya amabwa. Makulukazi a banalume na banakazi ba bitongwe batungile ije tempele ha myaka 7. Co mubamanesele kuitunga, baikundikile kuli Yehova. Yakele na mutula, co hakele milambu. Solomoni watsikamene halutwe lwa mutula na kulombela ngwendi: ‘Obe Yehova, ei tempele keti yakama nambe yaibwa manene mangana ukalemo, oloni tambula kulemesa kwetu na kutolilila ku malombelo etu.’ Yehova wamwene bati ije tempele na lilombelo lya Solomoni? Solomoni mwamanesele lika kulombela, tuhya twatundile mwilu na kwenyeka milambu ije yakele ha mutula. Ngeci, oku kwamwesele ngwabo Yehova wabwahelelele ha kumutungila tempele. Co baIsalele babwahelelele manene mubamwene byuma byalingiwile.

Mwene Solomoni watsimanene manene mu Isalele na ku mitambela ya kulako mwafwa ya mana endi. Banu bakele na kuya kuli Solomoni mangana akabakwase mu bukalu bwabo. Mwene wa munakazi wa ku Sheba nendi waile na kwihula Solomoni bihula byabikalu mangana amweseke. Mwazibile mwakele na kukumbulwila, wendekele ngwendi: ‘Kunjakulahelele bibanjilekele banu, oloni hanwoni njalimwena ngwange uli na mana kutubakana nomu mubanjilekelele. Njambi yobe Yehova na kubezikisa.’ BaIsalele bakele mu kwoloka, co bapwile ba kubwahelela. Oloni byuma kubyatwaleleleho kufwa ngoco.

Solomoni mwakele na kulemesa Yehova, mu Isalele mwakele kwoloka. Oloni Solomoni wambatele banakazi babangi ba ku mafuti baje balemesele tumponya. Kamandondo-kamandondo, Solomoni watengulukile na kushangumuka kulemesa tumponya. Yehova walubalele. Walekele Solomoni ngwendi: ‘Njinyeka naanga yobe bumwene na kubutepa hakati. Mutamba wakama njiwana umo wa bangamba bobe, co naanga yobe ikayula lika mutamba waundondo.’

Yehova walingile byuma byendekele. Jeloboamu ngamba ya Solomoni mwakele na kwenda mu tapalo, waliwanene na kapolofweto Ahija. Ahija watabwile mukanjo wendi mu bimbazubwila 12, co walekele Jeloboamu ngwendi: ‘Yehova akatundisa bumwene bwa Isalele ku naanga ya Solomoni na kubutepa hakati. Ambata ebi bimbazubwila 10 mwafwa ukayula miyati 10.’ Mwene Solomoni wazibile byendekele Ahija, co washakele kutsiya Jeloboamu. Ngeci, Jeloboamu watewelele ku Ijipiti. Mu kwita kwa simbu, Solomoni watsile, co munendi Lehoboamu wapwile mwene. Jeloboamu wayongwele kwiluka ku Isalele mwafwa Solomoni uje washakele kumutsiya te natsi.

Bakulunu ba mu Isalele balekele Lehoboamu ngwabo: ‘Nga ulinga mwamubwa banu, co bapwa ba kulongwa kuli yobe.’ Oloni babusamba ba Lehoboamu baje bapwile bakwenje bamulekele ngwabo: ‘Unapande kubayandesa, baleke bapange bipangi byabikalu.’ Lehoboamu wakabangeyeye bibamulekele babusamba bendi ba bakwenje. Wayandesele banu, ngeci bamutengulukilile. BaIsalele bapwisile Jeloboamu mwene wa miyati 10. Co baitumbwile ngwabo bumwene bwa Isalele. Miyati ikwabo ibali baitumbwile ngwabo bumwene bwa Juda, co batwaleleleho kupwa ba kulongwa kuli Lehoboamu. Ngeci, miyati 12 ya Isalele yalitepele.

Jeloboamu kashakele ngwendi banu baye na kulemesa ku Jelusalema ije yakale mu bumwene bwa Lehoboamu. Muzibuka byamulingisile ngoco ndi? Jeloboamu watewele ngwendi bamutengulukila na kushangumuka kukundwiya Lehoboamu. Ngeci, wapangele tumponya babali ba goudi na kuleka banu ngwendi: ‘Ku Jelusalema kulako manene, mwasa kulemesa Njambi nambe muli kuno.’ Banu bashangumukile kulemesa tumponya ba goudi, co bebalele Yehova lalo.