Kuma Bakaleho ba Yehova Banatengulula Biñanda Bili mu Mbimbiliya Mangana Bilitombole na Byuma Bibakulahela Ndi?
Embwe, kutwalingile ngoco. Mutukananguka ngwetu bitwakulahela kubilitombola na Mbimbiliya, tukabitengulula mangana bilitombole na biñanda bili mu Mbimbiliya.
Simbu kanda tutuhule Mbimbiliya ya Bisoneka bya Kaye Kakaha mu 1950, twelwile biilongesa Mbimbiliya. Twapangesele Bimbimbiliya byakeleko mangana tuzibuke byuma bya busunga bitunapande kukulahela. Tusimutwiyeni ha byuma bimo bibanatwalelelaho kukulahela Bakaleho ba Yehova mangana mumone indi byalitombola na byuma biilongesa Mbimbiliya.
Bitwakulahela: Kukwakele Binjambi Batatu. Magazini ya Zion’s Watch Tower ya July 1882 yendekele ngwayo: “Banu bakatanda mabulu etu bazibuka ngwabo twakulahela ngwetu Yehova na Yesu kubakala, co lalo na sipilitu ya Kujela nayo kuyakala. Nameme ngoco, kutwakulahelele bilongesa bije kubyemanene ha bisoneka bya kwendeka ngwabyo Yehova na Yesu na Sipilitu ya kujela bapwa binjambi batatu baje banapu Njambi umolika nambe ngwabo Njambi umo ali mu banu batatu.
Biyendeka Mbimbiliya: “Yehova Njambi yetu wapwa Yehova umo.” (Detronoma 6:4, The Holy Bible ibananungulula kuli Robert Young) “Kuli Njambi umo, Tate uje kuli ikeye kwatunda byuma byoshe, co twapwa tu banu bendi; na Mwata umo Yesu Kristu, byuma byoshe binaija muli ikeye; batutangele mwafwa ya ikeye.” (1 Korinte 8:6, Mbimbiliya ya American Union Version.) Yesu babenya wendekele ngwendi: “Tate wakama kujitubakana.”—Iwano 14:28, Mbimbiliya ya Douay-Rheims Version.
Bitwakulahela: Kukwakele litende lya tuhya. Mu magazini ya Zion’s Watch Tower ya June 1882 mwakele ñanda imo ya mutwe wa “Fweto ya bubi inapu kutsa,” awa majwi bawambatele mu Mbimbiliya ya King James Version. Ei ñanda yendekele ngwayo: “Awa majwi amasi kuwazibisisa. Kukomokesa kumona banu babangi baje bakulahela ngwabo Mbimbiliya yapwa Lijwi lya Njambi, oloni bakulahela lalo ngwabo Mbimbiliya ilongesa ngwayo fweto ya bubi inapu kuyoya myaka yoshe mu litende lya tuhya.”
Biyendeka Mbimbiliya: “Mwonyo ulinga bubi ukewo utsa.” (Ezekiele 18:4, 20, Mbimbiliya ya King James Version) Kashitiko kabakana banu baje kubesi na kwononoka Njambi kukakapu kubaka mu litende lya tuhya myaka yoshe, oloni kanapu “kubanyongesa myaka yoshe.”—2 Tesalonika 1:9, Mbimbiliya ya King James Version.
Bitwakulahela: Bumwene bwa Njambi bwapwa fulumende hayo keti cuma cili mu mbunge ya munu. Magazini ya Zion’s Watch Tower ya December 1881 yendekele ngwayo: “Bumwene bya Njambi mu bukayula kaye bukanyongesa bifulumende bya banu byoshe.”
Biyendeka Mbimbiliya: “Mu matangwa a bimyene aba, Njambi wa mwilu akashimbika bumwene buje kubukanyongo, co kubakabwana ku banu beka. Oloni bukatika na kunyongesa bumwene bwoshe obu, co bukatwalelelaho kukalako myaka yoshe.”—Daniele 2:44, Mbimbiliya ya King James Version.
Kuma Bakaleho ba Yehova bakapangesa lika Mbimbiliya ya Bisoneka bya Kaye Kakaha mu kwimanena byuma bibakulahela ndi?
Embwe, tukapangesa na Bimbimbiliya byeka mu cipangi cetu ca kwambulula. Mutukalilongesa na banu Mbimbiliya, tukabana Mbimbiliya ya Bisoneka bya Kaye Kakaha kwa kujeneka kubafwetesa. Co lalo tukalilongesa Mbimbiliya na banu baje bashaka kupangesa Mbimbiliya yabo.