Kwakele bimyene babangi bababi bayulile bumwene bwa Isalele bwa miyati 10. Oloni Ahabe wapwile umo wa bimyene bababi manene. Wambatele munakazi wamubi manene uje wakele na kulemesa Bale. Lizina lyendi Jezebele. Ahabe na Jezebele bashulisile lifuti na bulombelo bwa Bale na kutsiya tupolofweto ba Yehova. Yehova walingile bika? Watumine kapolofweto Eliya akaleke Ahabe muzimbu umo.

Eliya walekele Mwene Ahabe ngwendi mwafwa ya bubi bwendi, mu Isalele kumukala nyonzi. Bimbuto kubyamenene ha myaka itatu na hafu, co banu balandukile ku njala. Yehova watumine lalo Eliya kuli Ahabe. Co mwene walekele Eliya ngwendi: ‘Yobe uli na kunena bukalu muno mu lifuti! Ebi byuma byose byalingiwa mwafwa yobe.’ Eliya wamukumbulwile ngwendi: ‘Keti yange njanene eli lilanga. Yobe walinene mwafwa ya kulemesa Bale. Tuye tweseke mangana tumone busunga. Kungulwila banu boshe mu lifuti na tupolofweto ba Bale boshe ha Munkinda wa Kameu.’

Banu balikungulwilile haje ha munkinda. Eliya wendekele ngwendi: ‘Munapande kwangula kumuwila. Nga Yehova ikeye Njambi wa busunga co mulemeseni, oloni nga Bale ikeye Njambi wa busunga co lemeseni ikeye. Tulingeniko bimo tumone ngwetu iya Njambi wa busunga. Aba tupolofweto ba Bale 450, babwahese mulambu na kusana njambi yabo, co nange njibwahesa mulambu na kusana Yehova. Njambi uje ataba na tuhya ikeye Njambi wa busunga.’ Banu batabele byendekele.

Tupolofweto ba Bale babwahesele mulambu. Co basanene njambi yabo litangwa lyoshe lya mutunu ngwabo: ‘Obe Bale, tukumbulule!’ Oloni Bale kakumbulwile. Ngeci Eliya wabajolele na kubashendumuna ngwendi: ‘Tambekeleni manene. Hamo nacilala, ngeci kutondeka wa kumwindula.’ Kweta na ku mangwezi, tupolofweto ba Bale anga bacikele na kusana. Nameme ngoco wahi wabakumbulwile.

Eliya wakele mulambu wendi ha mutula na kundungumwinaho mema. Co walombelele ngwendi: ‘Obe Yehova, njikulomba umwese banu ngwobe yobe Njambi wa busunga.’ Oho bene Yehova watumine tuhya kutunda mwilu. Twenyekele uje mulambu wakele ha mutula. Co banu batambekele ngwabo: ‘Yehova ikeye Njambi wa busunga!’ Co Eliya wendekele ngwendi: ‘Keti mwecelele tupolofweto ba Bale batewe!’ Lije litangwa, batsiile tupolofweto ba Bale 450.

Kalishelwa kakandondo mukasholokele mwilu, Eliya walekele Ahabe ngwendi: ‘Kuli na kwija nyonzi ya lihunzi. Bwahesa litemba lyobe uye kwimbo.’ Lilu lyazibalele na mashelwa, lihunzi lyahuwile, co nyonzi yakama yashangumukile kunyoka. Lilanga lyahwile oni. Ahabe wesekele mwoshe mwaselele kushatukisa litemba lyendi. Oloni Yehova wakwasele Eliya ashatuke manene na kukatubakana litemba lya Ahabe. Kuma bukalu bwa Eliya bwahwile oni ndi? Tumoneni byateleko.

Jezebele wazibile byalingiwile ku tupolofweto ba Bale, co walubalele manene. Watumine muzimbu kuli Eliya ngwendi: ‘Imene utsa ngwe mwa tupolofweto ba Bale.’ Eliya wazibile manene lyoba, co watewelele mu mambo. Walombelele ngwendi: ‘Yehova, kunjasa kutwalelelaho kuyoya ngacije. Njitse lika.’ Mwafwa ya kujuka, Eliya waile mu tulo mwisi ya muti.

Kangelo wamwindwile na kumuleka na lijwi lyalibotsi ngwendi: ‘Induka ulye.’ Eliya wamwene likende lya muzenguluke ha mamanya a kushaluka na mema mu shuwa. Walile na kwilukila mu tulo. Kangelo wamwindwile lalo na kumuleka ngwendi: ‘Lya uwane nzili ya kwenda bungenzi.’ Ngeci, Eliya watwaleleleho kulya. Co wendele butsiki na mutanya ha matangwa 40 na kuketa ku Munkinda wa Holebu. Kuje ku munkinda, Eliya wakakobelele mu bwina bwa mu limanya. Oloni Yehova wamwendekesele. Wamwihwile ngwendi: ‘Bika biuli na kulinga kuno?’ Eliya wamukumbulwile ngwendi: ‘BaIsalele banapokola cikumiiyo cabo kuli yobe. Banapujula mitula yobe na kutsiya tupolofweto bobe. Hanwoni bashaka kutsiya yange.’

Yehova wamulekele ngwendi: ‘Ya ukemane ha munkinda.’ Hakulibanga, kuje ku bwina bwa mu limanya kwetile lihunzi lyakama. Kutundaho, kwezile lindunduma. Munima ya lindunduma kwezile milangi ya tuhya. Mamaneselelo Eliya wazibile lijwi lyalibotsi lya kuyebeta. Eliya walifwikile mukanjo wendi ku mesho. Co Yehova wamwihwile byali na kutewa. Eliya wamukumbulwile ngwendi: ‘Njasala likalyange.’ Oloni Yehova wamulekele ngwendi: ‘Kuwesi likalyobe. Kucili banu 7,000 mu Isalele baje bacili na kunjilemesa. Ya ukangule Elisha apwe kapolofweto mu mwela wobe.’ Oho bene Eliya waile na kulinga byamulekele Yehova. Mumona bati, kuma Yehova asa kumikwasa mulinge byuma byashaka ngwendi mulinge ndi? Eyo, amikwasa. Tucisimutwiyeni ha byuma byalingiwile ha simbu ikwakele lilanga.