Ha simbu ikwakele lilanga, Yehova walekele Eliya ngwendi: ‘Ya ku Zalafethi. Ukawana fwile uje akakwana byakulya.’ Mwetele ku bikolo bya nganda, Eliya wamwene fwile wa kahutu ali na kucaba bikuni. Eliya walombele uje munakazi mema a kunwa. Mwakele na kuya na kwambata mema, Eliya wamutambekelele na kumuleka ngwendi: ‘Njilomba unjineneleko na likende.’ Oloni uje fwile wamukumbulwile ngwendi: ‘Kunjesi na likende lya kukwana. Njili lika na tufulawa na tumazi twatundondo twange na munange wa munalume.’ Co Eliya wamulekele ngwendi: ‘Yehova nakulahesa ngwendi nga unjocela likende, co fulawa na mazi obe kubihu kweta noho haikanyokela lalo nyonzi.’

Ngeci, uje fwile waile ku njibo yendi na kukocela kapolofweto ka Yehova likende. Co ngwe mwakulaheselele Yehova, uje fwile na munendi bakele na byakulya ha simbu yoshe ya lilanga. Njaba yendi ya fulawa nei ya mazi byatwaleleleleho bene oku bya kushula.

Oloni kuli cuma cacibi manene calingiwile. Uje muna fwile wabinjile manene, co watsile. Uje fwile walambelelele Eliya mangana amukwase. Eliya wambatele uje mwanike ha maboko endi na kuya nendi mu mulili wa helu wa njibo ya uje munakazi. Wamulangekele ha mwela na kushangumuka kulombela ngwendi: ‘Yehova, njikulomba usangule ou mwanike.’ Kuma muzibuka bitwendekela ngwetu eci capwile cuma ca kukomokesa manene ndi? Mwafwa ngwe mutuzibukila, ha simbu ei te wahi wasangukaho laja ku batsi. Co lalo ou fwile na munendi te keti baIsalele.

Oloni uje mwanike wasangukile na kushangumuka kuhwima! Co Eliya walekele uje fwile ngwendi: ‘Tala! Munobe ali na kuyoya.’ Uje fwile wabwahelelele manene na kuleka Eliya ngwendi: ‘Cili bene u munu wa Njambi. Njazibuka ngoco mwafwa ukendeka lika byanakuleke Njambi ngwendi wendeke.’

Mwene Ahabe mwakele na kutala ha windo mu lipela lyendi lije lyakele mu Jezilele, wakele na kumona lihya lya bushuka bwa binyu lije lyapwile lya Nabote. Ahabe wakele na kutonda lije lihya lya binyu, ngeci walekele Nabote amulandeselyo. Oloni Nabote wabyanene kulilandesa mwafwa Mashiko a Yehova amwesele ngwawo munu kapandele kulandesa buswana bwendi. Kuma Ahabe wasingimikile Nabote ha kulinga byuma binapande ndi? Embwe. Ahabe walubalele manene, kasele na kutunda ha mwela, co lalo wabyanene kulya.

Lishano Jezebele uje wakele na mbunge yaibi, walekele Ahabe ngwendi: ‘U mwene wa Isalele. Wasa kukala na byuma byoshe biushaka. Njikukwasa kwambata lije libu.’ Jezebele wasonekelele mikanda bamyata ba mu nganda na kubaleka ngwendi babangeye Nabote ngwabo nashaula Njambi. Co bamutsiye mu kumwasha mamanya. Bamyata balingile byabalekele Jezebele, co Jezebele walekele Ahabe ngwendi: ‘Nabote natsi. Lije lihya lya bushuka bwa binyu linapu oni lyobe.’

Jezebele watsiile banu babangi ba kujeneka mulonga kwambateselela na Nabote. Co lalo wakele na kulemesa tumponya na kulinga byuma byabibi byabingi. Yehova wamwene byuma byabibi byoshe byalingile Jezebele. Yehova walingile bika?

Ahabe mwatsile, munendi Jeholamu wapwile mwene. Yehova watumine Jehu mangana akane Jezebele na naanga yendi kashitiko.

Jehu walondele mu litemba na kuya ku Jezilele kwakele na kukala Jezebele. Jeholamu mwamwene Jehu ali na kwija, walondele mu litemba na kuya na kuliwana nendi. Mwamuwanene, wamwihwile ngwendi: ‘Kuma uneja mu kwoloka ndi?’ Jehu wendekele ngwendi: ‘Kukala bati kwoloka okuni noko Jezebele ali na kulinga byuma byabibi.’ Co Jeholamu walondele mu litemba ngwendi atewe, oloni Jehu wamwashele mukili, co watsile.

Kutundaho, Jehu waile ku lipela lya Jezebele. Jezebele mwazibile ngwabo Jehu ali na kwija, walisonene mwamubwa ku mesho na kusakula mwamubwa binkambu na kumubandamena mu mulili wa kwilu oku ali na kutala mu windo. Jehu mwetele, Jezebele wamumenekele na likamba. Co Jehu watambekele kuli bangamba ba Jezebele baje bakele kuyehi nendi ngwendi: ‘Mumbileni hasi!’ Bamusindikilile mu windo, co wawililile hasi na kutsa.

Munima yebi, Jehu walekele banu batsiye bana ba Ahabe ba banalume 70. Co lalo watsiile baka-kulemesa Bale na kujelesa lifuti lya Isalele. Kuma mwamono ngweni Yehova azibuka byuma byoshe, co ha simbu inapande akana kashitiko banu baje bakalingi byuma byabibi ndi?