Beni-hadadi mwene wa Siria watwaleleleleho kulwisa Isalele. Oloni kapolofweto Elisha wakele na kuleka mwene wa Isalele byakele na kuyongola kulinga mwene wa Siria. Ngeci, baka-Siria kubakele na kuwana mwene wa Isalele. Beni-hadadi walubalele, co washakele kukwata Elisha. Bamulekele ngwabo Elisha wakele mu nganda ya Dothani, co watumine maswalale bendi mangana bakamukwate.

Baka-Siria bezile butsiki mu Dothani. Mukwakile, ngamba ya Elisha watuhukile hanja, co wamwene maswalale babangi banazengeleka nganda. Watewele manene, co watambekele ngwendi: ‘Elisha, tunatsi, tulinga bati?’ Elisha wamulekele ngwendi: ‘Tuli na babangi kutubakana babali nabo.’ Co haje bene, Yehova walingisile ngamba ya Elisha amone matemba a tuhya na tubalu na maswalale baje bashulile ha minkinda ije yazengelekele nganda yabo.

Maswalale ba Siria mubashakele kukwata Elisha, walombelele ngwendi: ‘Yehova, njikulomba ubapwise tupuputwa.’ Co haje bene, kubazibukile kubakele nameme bakele na kumona. Elisha wabalekele ngwendi: ‘Munazimbala, muli mu nganda yeka. Njikabeni njimitwamenene kuli munalume imuli na kutonda.’ Bamukabele kuketa na ku Samaliya kuje kwakele na kukala mwene wa Isalele.

Mubaketele, baka-Siria banangukile oni kubakele. Co mwene wa Isalele wehwile Elisha ngwendi: ‘Njibatsiye ndi?’ Kuma Elisha wasinganyekele ngwendi ije yapwile simbu yaibwa ya kwilwisila bubi aba banu bashakele kumulinga mwamubi ndi? Embwe. Elisha wendekele ngwendi: ‘Keti ubatsiye. Bane byakulya, co munima ubecele baye.’ Ngeci, mwene wabanene byakulya byabingi mangana balye, co munima wabecelele baye.

Ataliya wapwile muna Jezebele. Co wakele na mbunge yaibi ngwe ina. Ataliya washombokele kuli mwene wa Juda. Munalume wendi mwatsile, munendi wa munalume wamwingile ha litanda. Oloni munendi mwatsile, Ataliya walipwisile mwene wa Juda. Co lalo washakele kunyongesa bana boshe ba mu cikota ca bumwene kwambateselela na batekulyendi. Ngeci, banu boshe bakele na kutewa ou munakazi.

Kapilistu Wahakamwa Jehoyada na munakazi wendi Jehosheba, kubabwahelelele ha byuma byalingile Ataliya. Ngeci, bakele buyoye bwabo mu bushonde omwo bashwekele mutekulyendi Jehoashi uje wapwile mbututu. Bamulelelele mu tempele.

Jehoashi mwakele na myaka 7, Jehoyada wakungulwile bamyata na baLevi, co wabalekele ngwendi: ‘Nyungeni ku bikolo bya tempele, keti mutabese munu akobele mukati.’ Co Jehoyada wapwisile Jehoashi mwene wa Juda na kumuzika cilongo ku mutwe. BaJuda batambekele ngwabo: ‘Mwene ayoye simbu yailaha!’

Mwene wa munakazi Ataliya mwazibile miyoyo ya banu, washatukilile ku tempele. Mwamwene mwene wamuha watambekele ngwendi: “Bungungu! Bungungu!” Co bamyata bamukwatele na kukamutsiya. Byuma muka byalingiwile ku banu ba muje mu lifuti baje bongumwine?

Jehoyada wakwasele banu balinge cikumiiyo na Yehova, co bakulahesele ngwabo balemesa lika Yehova. Jehoyada wabalekele bapujule tempele ya Bale na kutika tumponya. Co lalo wangwile tupilistu na baLevi bapange ku tempele mangana banu base kukalemeselako Njambi lalo. Kutundaho, wangwile baka-kunyunga ku bikolo bya tempele mangana banu ba kujwala keti bakobelemo. Co Jehoyada na bamyata bambatele Jehoashi na kumutwala ku lipela na kukamupwisa mwene. BaJuda babwahelelele. Basele oni kulemesa mwamubwa Yehova kwa kujeneka Ataliya na bulombelo bwa Bale. Kuma munamono kusimpa kwa Jehoyada mukwakwaselele banu babangi ndi?