Banu babangi banalikele kuya ku bulombelo bwabo mwafwa kubesi na kuwanako bukwasi bwa ku sipilitu, co wahi ali na kubazembeleka. Bika munapande kuila ku biwano bya Bakaleho ba Yehova? Bika bimukalikuwa oku ku biwano?

Mukabwahelela kukala mukati ka banu baje bamizema na ku myaka mbunge. Mu simbu ya tupositolo, baka-Kilistu bakele na bikungulukilo, co balikungulwile mu kulemesa Njambi, kulilongesa Bisoneka na kulikanyamesa umo na mukwabo. (Vahevelu 10:24, 25) Omwo bakungulukile hamo, balizibile ngwabo bali mukati ka babusamba babo ba busunga, nameme bandolome babo ba ku sipilitu. (2 Tesalonika 1:3; 3 Yowano 14) Netu tuli na kukabangeya mwanja wabo, co tukalizibi kubwaha.

Bubwa butuwana mu kupangesa binangulo bya mu Mbimbiliya. Banalume, banakazi, hamolika na banike bakakunguluka ngwe mubalingile kusañulu. Baka-kulongesa mu butongwe bakapangesa Mbimbiliya mu kutukwasa tuzibuke mwakupangesela binangulo mu buyoye bwetu. (Kwituluka mu Mashiko 31:12; Nehemiya 8:8) Boshe baje bakunguluka basa kukumbulula ha mitamba ya bihula na bikumbululo na kwimbila hamo myaso na mbunga mangana tushangazale Njambi.—Myaso 35:18.

Likulahelo lyeni kuli Njambi likanyama. Kapositolo Paulu walekele cikungulukilo cimo ngwendi: ‘Njishaka manene kumimona, . . . mangana neni nange twakulitakamese ha simbu imolika, yeni ha kukulahela kwange, nange ha kukulahela kweni.’ (Loma 1:11, 12) Kukunguluka hamolika na bakwetu baka-kukulahela kukanyamesa likulahelo lyetu na kutukwasa tupangese binangulo bya mu Mbimbiliya mu buyoye bwetu.

Tumilanya ngwetu muye ku biwano byetu mangana mukalimwene ebi byuma bitunasimutwiya. Tukamitambula na maboko abali. Biwano byetu byapwa bya bwana, wahi akamifwetesa.

• Mwanja weya utuli na kukabangeya ku biwano byetu bya cikungulukilo?

• Bubwa muka butuwana nga tuya ku biwano bya baka-Kilistu?

Tukakunguluka simbu yoshe nameme kulinga ngoco kutondeka kwita mu bishwata bya kuzika, mu nyonzi, mu litanya na mu lisika. Bika baka-Kilistu bakaila mu kukunguluka hamo na bakwabo nameme bali na bukalu, nambe banajuka munima ya kulembuka ku bipangi?

Kutukwasa mu buyoye bwetu. Kapositolo Paulu wasonekele ngwendi “tuliyongoleni umo na mukwabo,” kulumbununa baje boshe batukakunguluka nabo. (Vahevelu 10:24) Kuliyongola umo na mukwabo kulumbununa “kusinganyeka hali bakwetu,” nambe ngwetu kulizibuka umo na mukwabo. Awa majwi a kapositolo atushongangeya ngwawo twake bakwetu mbunge. Nga tulizibuka na bakwetu baka-Kilistu, tuwana ngwetu bamo banahyana bukalu bwa kulifwa nobu bwetu, co batukwasa mangana tubuhyane.

Kukanyamesa busamba bwetu. Banu batukakunguluka nabo ku Njubo ya Bumwene bapwa babusamba betu, keti banu kuti embwe. Bisimbu bimo, tukalingiko byuma bimo bya senga. Bubwa muka buli mu kulikwatasana na bakwetu baka-Kilistu? Kulikwatasana na bakwetu kutulingisa tulisingimike umo na mukwabo na kulizema manene. Co omwo bakwetu baliwana mu bukalu, twasa kubakwasa mwafwa tuli mu busamba bwabubwa nabo. (Visimo 17:17) Nga tulikwatasana na banu boshe ba mu cikungulukilo, tumwesa ngwetu twabaka mbunge.—1 Kolinte 12:25, 26.

Tumilanya ngwetu mwangule babusamba baje bali na kulinga cizango ca Njambi. Mwasa kuwana banu ba cifwa eci ha Bakaleho ba Yehova. Keti mutabese cuma cimo cimyonowese kulikwatasana netu.

• Bika kwapwila kwakubwa kukunguluka hamo na bakwetu?

• Litangwa lika limushangumuka kukunguluka hamo netu?

Ku biwano bya baka-Kilistu ba kulibanga kwakele kwimba myaso, kulombela, kutanda na kusimutwiya ha Bisoneka, co kukwakele bilika bimo bya cisemwa. (1 Kolinte 14:26) Netu lalo tukakabangeya ngila eyi bene ku biwano byetu.

Bilongesa byoshe byemana ha Mbimbiliya, co bitukwasa. Ku mamaneselelo a calumingo, banu bakakunguluka na kutolilila ku ñanda ya Mbimbiliya ya minutu 30. Eyi ñanda ikamwesa mubitukwasela bisoneka mu buyoye bwetu na simbu ituli na kuyoyamo. Tubaboshe bakatushongangeya tukabangeye mu Bimbimbiliya byetu. Hanima ya ñanda, kukakala Cilongesa ca “Kaposhi ka Kukengela” ca ola imo. Co boshe baje banakunguluka bakakumbulula mu magazini eyi ya Kaposhi ka Kukengela. Kusimutwiya mu ngila eyi, kukatukwasa tupangese bisoneka bya mu Mbimbiliya mu buyoye bwetu. Cilongesa cimo ca kulifwa bakacisimutwiya mu bikungulukilo byetu bya kutubakana 120,000 mu kaye koshe.

Bakatukwasa tubwezelele ku butongwe bwetu bwa kulongesa. Tukakunguluka lalo mukati ka calumingo ku ciwano ca mitamba itatu ca Buyoye Bwetu Baka-Kilistu na Cipangi Cetu. Biñanda bitukasimutwiya bikatandu mu Mukanda wa Biwano wa Buyoye Bwetu Baka-Kilistu na Cipangi Cetu. Mutamba wa kulibanga wa Bisimpi bya Seho bya mu Lijwi lya Njambi ukatukwasa tuzibuke mwamubwa macapita a mu Mbimbiliya aje abakalibwahesela cimweja banu mu cikungulukilo. Co mutamba unatako wa Akeni Mbunge ku Cipangi ca Kwambulula uli na bingila bya kwambulwilamo bije bitukwasa kusimutwiya na banu Mbimbiliya. Muka-kunangula akatolilila manene mangana akwase baje bali na biñanda mu sikola babwezelele ku butongwe bwabo bwa kutanda na kwendeka. (1 Timateo 4:13) Mutamba wa mamaneselelo wa Yoyesi ya Baka-Kilistu, ukamwesa mwakupangesela binangulo bya mu Mbimbiliya mu buyoye bwetu. Co unambateselela na mitamba ya bihula na bikumbululo ije ikatukwasa tuzibisise mwamubwa Mbimbiliya.

Nga muya ku biwano byetu mukaziba kubwaha kumona ngila yaibwa itukalilongeselamo Mbimbiliya.—Isaya 54:13.

• Byuma muka bimwasa kukaziba ku biwano bya Bakaleho ba Yehova?

• Ciwano muka ca mu calumingo cimushaka kuya mu kukunguluka netu?

Munamono munabazalela mwamubwa Bakaleho ba Yehova nga bali ku biwano byabo ha bikupulo bili omu mu libulu ndi? Mwafwa bika tukakela manene mana ku zalesi na sholwesi yetu?

Mangana tumwese kasingimiko kuli Njambi yetu. Mwa busunga bene, Njambi kesi kutala ha sholwesi ya munu ya hanja embwe. (1 Samwele 16:7) Nameme ngoco, omwo tukungulukila hamo mu kumulemesa, tunapande kumona ngwetu tunasingimika Njambi na bakwetu baka-kukulahela. Cakumwenako, nga mwene natulanya kukalimona nendi, tukazala mwamubwa mwafwa tuzibuka ngwetu napu munu wa seho. Mu cifwa cimolika, sholwesi yetu nga tuli ku biwano, imwesa indi twasingimika Yehova Njambi, ‘Mwene wa hano hasi hoshe’ na mwela utumulemesela.—Njelemiya 10:7.

Mangana tumwese futisi yetu yaibwa. Mbimbiliya ishongangeya baka-Kilistu ngwayo banapande kuzala mu ‘kulikehesa na mana.’ (1 Timateo 2:9, 10) Kuzala mu “kulikehesa” kulumbununa kujeneka kuzala mu kulishasha, kuzala buzalo buje bushangumuna mashungu a kulilala, nambe buzalo bwa kuhwalala. Co lalo kukala na “mana” kutukwasa twangule buzalo mwamubwa, buje kubumwesa sipilitu ya kaye. Ebi binangulo kubyatubindikile kuzala buzalo bwa kulisezaseza buje butushaka embwe. Zalesi na sholwesi yetu yaibwa ‘ibwahesa bilongesa bya Njambi yetu’ na kulingisa banu ‘bashangazale Njambi.’ (Tito 2:10; 1 Petulu 2:12) Nga tuzala mwamubwa ku biwano byetu, co tulingisa banu bamone bubwa bwa kulemesa Yehova.

Keti mulikele kuya ku Njubo ya Bumwene mwafwa ngweni kumwesi na buzalo bwabubwa embwe. Buzalo bweni bunapande lika kupwa bwa kujela, buje bunafwila, keti bwa ndando yakama, nameme bwa kukomokesa embwe.

• Mwafwa bika tukazalela mwamubwa nga tuya mu kulemesa Njambi?

• Binangulo muka bitukwasa tuzibuke mutunapande kuzalela na kusholokelamo?

Nga muli na kulilongesa Mbimbiliya na Bakaleho ba Yehova, twakulahela ngwetu mukalibwahesela cimweja bilongesa byeni. Simbu kanda muye ku biwano, munapande lalo kulibwahesela mangana mukazibisise. Kulibwahesela simbu yoshe kumikwasa manene.

Anguleni simbu na mwela wa kulilongesela. Simbu muka ije imwasa kulilongesa mwamubwa? Simbu ya mutondo omwo kanda mushangumuke bipangi ndi? Indi hamo ku mangwezi a butsiki nga banike banai mu kulala? Nameme ngwabo simbu yaingi mukapu ba kuzezama, oloni waneniko simbu ya kulilongesa. Anguleni mwela wa kwoloka, co zimeni byuma bije bimitanganesa, bya kufwa ngwe cisanzi, TV na foni. Lombeleni simbu kanda mushangumuke kulilongesa. Oku kumikwasa mutale ha kulilongesa Lijwi lya Njambi, keti lalo kusinganyeka ha byuma bimunacakana mu litangwa.—Filipu 4:6, 7.

Fundikeni bisimpi mangana mukakumbulule. Shangumukileni tahi kuzibuka bika byalibungila mu cilongesa. Singanyekeni ha mutwe wa ñanda, moneni omwo tumitwe twa biñanda mutunalitombwela na mutwe ñanda. Iluleni bikupulo na bihula bya kwitulukamo bije bimwesa bisimbi byakama bya cilongesa. Kutundaho, tandeni palagilafu imo na imo, co waneni cikumbululo ku cihula cibanehula mu palagilafu. Tandeni bisoneka bibanamwesa ngwabo tandeni na bije lalo bibanekila lika. Co singanyekeni mubinalitombwela na ñanda imusimutwiya. (Vilinga 17:11) Nga munawana cikumbululo ku cihula, cifundikeni nameme kusoneka tumajwi ku mukulo wa palagilafu mangana mukase kukumbulula. Omwo mweta ku biwano, mwasa kwimika liboko lyeni na kukumbulula mu bwihi mu majwi eni.

Nga mulibwahesela biñanda bya kulisezaseza bije bitulilongesa calumingo na calumingo, co mubwezelela bisimpi byabiha mu ‘mulili weni wa kutulikila’ mana a mu Mbimbiliya.—Mateo 13:51, 52.

• Bika bimunapande kulinga mangana mulibwahesele biwano simbu yoshe?

• Mwasa kulibwahesela bati mangana mukakumbulule ku biwano?

Kushwa kusañulu, Yehova washaka ngwendi binaanga bikale na simbu ya kuliwana hamo mangana bakanyamese busamba bwabo na Njambi na kulikanyamesa umo na mukwabo. (Kwituluka mu Mashiko 6:6, 7) Mukemwo Bakaleho ba Yehova bakala na simbu mu calumingo ya kulingila hamolika kulemesa kwa naanga. Bakasimutwiya biñanda bimo bya ku sipilitu bije bibakwasa mu naanga yabo. Nameme mwakala likalyeni, mwasa kupangesa eyi simbu kusimutwiya na Njambi mu kulilongesa Mbimbiliya ha ñanda yoshe imushaka.

Inapu simbu ya kushwenya kuyehi na Yehova. ‘Shwenyeni kuyehi na Njambi, co na ikeye lalo ashwenya kuyehi neni.’ (Yakomba 4:8) Nga tulilongesa cifwa ca Yehova na bilinga byendi ngwe mubanabimwesa mu Mbimbiliya, kutulingisa tumuzibuke mwamubwa. Ngila yayasi ya kushangumukilamo kulemesa kweni kwa naanga inapu ya kutandela hamolika Mbimbiliya. Mwasa kukabangeya cinoneko ca Ciwano ca Buyoye na Cipangi Cetu ca calumingo na calumingo. Mwasa kulipangela mavesi amutanda, co hanima ya kutanda musimutwiya bimunalilongesa mu Bisoneka.

Inapu simbu ya kushwenya kuli umo na mukwabo mu naanga. Nga banalume na banakazi babo, nambe bisemi na bana babo balilongesela Mbimbiliya hamolika, busamba bwabo bukanyama. Inapande kupwa simbu yaibwa mu calumingo ije ibashaka boshe mu naanga. Kwesekesa na myaka ibali nayo bana beni, mwasa kwangula ñanda mu magazini ya Kaposhi ka Kukengela na Toneni! nameme ha webusaiti yetu ya jw.org. Mwasa kusimutwiya ha bukalu bubanaliwanene nabwo bana beni ku sikola, nomwo banasa kubuhyanena. Mwasa kutala pulogilamu ya ha JW Broadcasting na kusimutwiya bimunamono. Mwasa lalo kulilongesa myaso imukaimba ku biwano, co munima ya kulemesa kwa naanga mulyako tubyakulya tumo twatubwa.

Eyi simbu ya kulemesa Yehova calumingo na calumingo, ikwasa boshe mu naanga bazeme Lijwi lya Njambi, co amibezikisa mu kulifwita kweni.—Myaso 1:1-3.

• Bika bitunapande kukela na simbu ya kulemesa kwa naanga?

• Bika bibanapande kulinga bisemi mangana kulemesa kwabo kwa naanga kubwahe?

Mwafwa bika aba banu bali na kusholoka kubwahelela? Mwafwa bali ku ciwano cimo ca biwano byetu byakama. Kusañulu, Njambi walekele bangamba bendi ngwendi bakunguluke lutatu ha mwaka. Netu tukashungwiya kukunguluka na mbunga ya bakwetu ku biwano byetu byakama. (Kwituluka mu Mashiko 16:16) Tukakala na biwano byakama bitatu mu mwaka. Ebi binapu biwano bya citingitingi bibali bitukakunguluka litangwa limo limo na ciwano ca mutambela ca matangwa atatu. Bukwasi muka butukawana oku ku biwano?

Bikakanyamesa busamba bwetu baka-Kilistu. Baisalele babwahelelele mubakele na kushangazala Yehova “mu mbunga yakama.” Netu tukabwahelela ha kulemesa Njambi ku biwano ebi bya kulitila. (Myaso 26:12; 111:1) Ebi biwano bikatwana simbu ya kulikwatasana hamolika na bakwetu Bakaleho ba ku bikungulukilo byeka, nameme bene ba ku mafuti eka. Simbu ya mutanya, tukali byakulya na bakwetu ha mwela utunakungulukila, co oku kukalingisa biwano byetu bibwahe. (Vilinga 2:42) Kukala oku ku biwano, kutukwasa tulimwene cizemo cije cili na kukwatasanesa ‘bamunanana boshe’ ba mu kaye.—1 Petulu 2:17.

Bikatukwasa tutwaleleleho kukola ku sipilitu. Baisalele bamwene bubwa ‘omwo bazibisisile majwi’ a mu Bisoneka bije bibabalumbunwinine. (Nehemiya 8:8, 12) Netu tukamono seho ya bilongesa bya mu Mbimbiliya bitukatambula ku biwano byetu byakama. Biñanda bya litangwa na litangwa bikemana ha mutwe wa ñanda wa kutunda mu Bisoneka. Co bimweso, biñanda bya kulitepela na biñanda byeka, bikatulongesa mwakulingila cizango ca Njambi mu buyoye bwetu. Mutukatolilila kuli bakwetu baka-Kilistu baje bali na kuhyana bukalu bubali na kuliwana nabyo mu kuyoya kwabo, kukatukanyamesa. Ku biwano bya mutambela kukakala bweho buje bukatukwasa tuzibisise mizimbu ya banu ba mu Mbimbiliya na kwasa kulilongesako bimo kuli bakebo. Ku biwano byetu byakama byoshe, bakambwitika baje bashaka kumwesa kulikundika kwabo kuli Njambi.

• Mwafwa bika simbu ya biwano byakama ikapu simbu ya kubwahelela?

• Bubwa muka bumuwana nga muya ku ciwano cakama?

Simbu kanda Yesu atse, wendekele ngwendi: “Co ebi biñanda byabibwa bya Bumwene bakabyambulula mu kaye mwoshe ngwe kupwa bukaleho ku miyati yoshe, co asinoni kukotoka kwa kaye kukaija.” (Mateo 24:14) Oloni twasa kushulisilila bati eci cipangi ca kwambulula mu kaye koshe? Twasa kulinga ngoco nga tukabangeya mwanja watumwesele Yesu mwakele hano hasi.—Luka 8:1.

Tukasimutwiya na banu ku binjubo byabo. Yesu walongesele bandongesi bendi kwambulula biñanda byabibwa ku njubo na njubo. (Mateo 10:11-13; Vilinga 5:42; 20:20) Baje baka-kwambulula ba mu simbu ya tupositolo, babanene bitingitingi bya kwambulwila. (Mateo 10:5, 6; 2 Kolinte 10:13) Nameme ano matangwa, cipangi cetu ca kwambulula banacibwahesa mwamubwa. Cikungulukilo na cikungulukilo cili na mutambela waco wa kwambulwila. Oku kunatukwasa tushulisilile majwi a Yesu atushikile ‘a kwambulula lijwi kuli banu na kwambulula bukaleho.’—Vilinga 10:42.

Tukai na kwambulwila ku myela ya kulisezaseza kuje kuli banu. Yesu waile na kwambulwila ku myela ya mbunga, ya kufwa ngwe ku ngenge ya kalunga-ndonga na ku lisima lya kutekwila mema. (Mako 4:1; Yowano 4:5-15) Netu ano matangwa tukasimutwiya na banu bya mu Mbimbiliya kwoshe kutubawanena: mu bingila, ku mingoso, ku myela ya kuhwimina, nambe kupangesa foni. Co lalo tukambulwila banu batwatunga nabo, batwapanga nabo, batwakobela nabo sikola na babushoko bwetu. Ebi bingila bya kwambulwilamo binakwasa banu babangi mu kaye bazibe muzimbu waubwa wa kwobola banu.—Myaso 96:2.

Beya bamusinganyeka ngweni mwasa kubambulwila muzimbu waubwa wa Bumwene bwa Njambi na byuma bibukalinga kulutwe? Keti mushwekele bakweni ou muzimbu waubwa. Balekeniwo, keti mukwatekwate ku masinde embwe.

• ‘Muzimbu muka waubwa’ utunapande kwambulula?

• Bingila muka bya kwambulwilamo bibali na kupangesa Bakaleho ba Yehova mu kutembwinina Yesu?

Lijwi lya “painiya” kakangi bakalisanesa banu baje bakai ku mitambela yaiha na kukalingako byuma bimo asinoni beka bakaba hanima. Yesu nendi wafwile ngwe painiya, mwafwa bamutumine hano hasi kwa kupanga cipangi ca kupatula banu na kubashokolwela ngila ya kwoboka. (Mateo 20:28) Ano matangwa bandongesi bendi bali na kumutembwinina ha kupanga simbu yaingi mu ‘kupwisa banu bandongesi.’ (Mateo 28:19, 20) Co bamo banalyana kupanga cipangi ca bupainiya.

Painiya wapwa munu uje akambulula simbu yoshe. Bakaleho ba Yehova boshe bakambulula muzimbu waubwa. Oloni bamo banatepululako ku bipangi bya ku mubila mangana bapwe bapainiya ba simbu yoshe. Co ha ngonde na ngonde bakapanga maola 70 mu kwambulula. Bakwabo bakabangula bapwe bapainiya ba kulitila, co bakabatumu kukapangela kuje kutondeka baka-kwambulula bya Bumwene. Aba bapainiya ba kulitila bakambulula maola 130 nameme kutubakana ha ngonde na ngonde. Bapainiya kubesi kulishoshomwena ha buyoye, mwafwa bakulahela ngwabo Yehova abana byuma bya kulikwasa nobyo mu buyoye. (Mateo 6:31-33; 1 Timateo 6:6-8) Baje kubasa kulinga bupainiya bwa simbu yoshe, basa kulinga bupainiya bwa kukwasa. Nabo bakabwezelela ku cipangi cabo ha kwambulula maola 50, co bisimbu bimo 30, ha ngonde na ngonde.

Kuzema Njambi na banu kukekwo kushongangeya munu apwe painiya. Ano matangwa, banu babangi bali na lihwila lya ku sipilitu ngwe mukwafwile mu simbu ya Yesu. (Mako 6:34) Oloni tunazibuka busunga buje bwasa kubakwasa ha simbu ino na kubaleka lalo byuma byanakulahesa Njambi kulutwe. Kuzema banu kukashongangeya painiya apangese simbu yendi na nzili yendi mu kukwasa bakwabo bazibuke muzimbu waubwa. (Mateo 22:39; 1 Tesalonika 2:8) Oku kukanyamesa likulahelo lyendi, co lalo akanyamesa busamba bwendi na Njambi na kupwa wa kubwahelela.—Vilinga 20:35.

• Painiya wapwa iya?

• Bika bikashongangeya bamo balinge bupainiya bwa simbu yoshe?

Bakaleho ba Yehova banapangesa masikola a kulilongesa bya Njambi ha simbu yailaha. Baje bakapanga cipangi ca kwambulula bya Bumwene simbu yoshe banababwahesela masikola a kulitila mangana ‘bapange mwamubwa bipangi byabo.’—2 Timateo 4:5.

Sikola ya Cipangi ca Bapainiya. Nga painiya wa simbu yoshe namanesa mwaka wa mutunu wa kulibanga mu cipangi cendi ca kwambulula, nasa kukobela eyi sikola ya matangwa 6 ije ikakala ha Njubo ya Bumwene. Eyi sikola ikakwasa bapainiya bakanyamese busamba bwabo na Yehova, bakale na butongwe mu kupangesa bingila byoshe bya kwambulwilamo na kubakwasa batwaleleleho kupanga eci cipangi mu kulongwa.

Sikola ya Baka-kwambulula bya Bumwene. Eyi sikola ya bingonde bibali banaibwahesela kulongesa bapainiya ba kuhya baje balyana kuseza membo abo na kukapangela kwoshe kwoshe kubabatuma. Bakendeka ngwabo: “Yange unoye. Njitumeni.” Ngeci bakatembwinina Muka-kwambulula wakama, Yesu Kilistu, uje wezile na kupangela hano hasi. (Isaya 6:8; Yowano 7:29) Kukapangela ku mwela weka kutondeka kuyoya buyoye bwabwasi. Bisemwa, bingonde, na byakulya bya ku mwela weka hamo byaliseze na bije bya ku mutambela wabo. Hamo lalo batondeka kulilongesa ndaka yeka. Eyi sikola ikakwasa bandolome na bandokazi babazike na baje bali mu malo, ba myaka ya kusemuka 23 kutwala 65 bakale na bifwa byabibwa bije bibakwasa mu cipangi cabo. Co lalo ibakwasa bakale na butongwe buje bubalingisa babapangese manene kuli Yehova na munga yendi.

Sikola ya Ngilyande ya Kulilongesa Mbimbiliya. Mu Cihebelu, lijwi lya “Ngilyande” lilumbununa “Mutumbo wa Bukaleho.” Kushwa hayangumukilile sikola ya Ngilyande mu 1943, banu ba kutubakana 8,000 banabatumu mu bumishinali mangana bane bukaleho ‘kweta na kushongoshongo ya lifuti-libu.’ (Vilinga 13:47) Bamishinali mubetele mu Peru lwa kulibanga, kubawanenemo bikungulukilo. Oloni hano muli bikungulukilo bya kutubakana 1,000. Omwo bamishinali bashangumukile kupangela mu Japan, mwakele lika Bakaleho ba kukokela ku 10. Oloni hano muli Bakaleho ba kutubakana 200,000. Sikola ya Ngilyande ikambata bingonde bitanu, co bakalilongesa manene Lijwi lya Njambi. Bapainiya ba kulitila, bamishinali baje kanda bakobele eyi sikola, banu baje bali ha minango, nameme tunyungi ba kuzenguluka, bakabalanya oku ku sikola mangana bakabalongese mwakukundwiiya cipangi ca mu kaye koshe.

• Bika bibanabwahesela Sikola ya Cipangi ca Bapainiya?

• Sikola ya Baka-kwambulula bya Bumwene banaibwahesela beya?