Mwehwa wa Paulu Wapwile Wakuthimpa

Eyi ñanda, ituleka vya mukwenje umo uje wovwele mwonyo wavainanu yendi. Vandamena tulilongetheyo mukushula. Inanu you mukwenje wapwile muluwa Paulu. Kututhzivuka mwamuvwa lithzina lyou mukwenje, oloni tuthzivuka ngwetu walingile vyuma mukuthimpa. Ushaka kuthzivuka vyuma vyalingile ndi?—

Paulu wakele mukamenga mu Yelusalema. Vamukutile mwafwa wakele nakwambulula vya Yesu. Vanalume vamo vathzindile Paulu, ngechi valingile vutumbe vwavuvi. Vendekele ngwavo: ‘Tuyeni tuleke muka-kushika maswalale, aleke maswalale vendi ngechi vatwale Paulu munkuta. Yetu tulishweka kumukulo wa ngila mangana tumuthsiye omwo eta!’

Mwehwa wa Paulu wathzivile ovu vutumbe. Vika nethi kulinga? Waile mukamenga kukaleka Paulu. Oho vene Paulu wamulekele ngwendi akaleke muka-kushika maswalale. Uthinganyeka vati, chapwile chachathi kuli mwehwa wa Paulu kwendeka na muka-kushika maswalale ndi?— Embwe, mwafwa muka-kushika maswalale wapwile munalume wa theho manene. Oloni mwehwa wa Paulu wapwile wakuthimpa ngechi walekethele muka-kushika maswalale.

Muka-kushika maswalale wathzivukile chuma chanapandele kulinga. Wambatele maswalale vakupwa 500 ngechi vakavingilikiye Paulu! Wavalekele ngwendi ovwo vene vuthsiki vatwale Paulu ku Sesaliya. Umona vati, Paulu wovokele ndi?— Chili vene, vutumbe vwa vaje vanalume vavavi kuvwapangele. Kuvathele kumuthsiya!

Vika watha kulilongetha kuli eyi ñanda?— Nove vene watha kuthimpa ngwe mwauje mwehwa wa Paulu. Tunapande kuthimpa nga tuleketha vakwetu vya Yehova. Vati oni, upwa wakuthimpa nakutwala lutwe kwendeka vya Yehova ndi?— Nga ulinga ngocho, cho nove unatha kwovolako munu umo.