Paulu Bamutwala ku Loma

Bungenzi bwa Paulu bwamucitatu bwa kwambulula bwahwililile mu Jelusalema. Mwakele mu Jelusalema, bamukwatele na kumwaka mu kamenga. Ku butsiki, Yesu wamulekele mu cimona ngwendi: ‘Uya ku Loma mangana ukambulwileko.’ Paulu bamutundisile mu Jelusalema na kumutwala ku Sezaliya kuje kwakakele myaka ibali mu kamenga. Mubakele na kumusompesa kuli Ngubulu Festasi, Paulu wendekele ngwendi: ‘Njilomba ngwange Sezale akanjisompe ku Loma.’ Festasi wendekele ngwendi: “Unalombo ngwobe ñanda yobe bakaitale kuli Sezale, ngeci kuli Sezale bene kukekwo kuuya.” Paulu bamulondesele mu bwato buje bwakele na kuya ku Loma, co bandolome babali Luka na Alistakasi baile nendi.

Mubakele ha kalunga-ndonga, kwakatukile lihunzi lyakama lije lyambatele matangwa amangi. Banu boshe basinganyekele ngwabo kubayoyo. Oloni Paulu wabalekele ngwendi: ‘Eni banalume, kangelo nanjileke mu cilota ngwendi: “Keti uzibe lyoba Paulu. Uketa mwamubwa ku Loma na boshe bauli na kwenda nabo mu bwato.” Ngeci, simpeni! Kututsi.’

Lihunzi lyambatele matangwa 14. Ku mamaneselelo, nunda yasholokele. Lyapwile liñanda lya Mauta. Bwato bwatabukile bimbazubwila, oloni banu boshe ba kupwa 276 baketele mwamubwa ha nunda. Bamo balapele, beka balikwatelelele ku bimbazubwila bije byatabukile ku bwato, co bongumukilile ku nunda. Banu ba ha liñanda lya Mauta babatambwile mwamubwa na kubabwekela tuhya mangana mazibeko shalu.

Munima ya bingonde bitatu, maswalale batwalele Paulu ku Loma mu bwato bukwabo. Mwaketele, bandolome bezile na kumutambula. Mwabamwene, wakandelelele kuli Yehova, co wasimpile. Nameme Paulu wapwile lipanditi, bamutabesele kukala mu njibo ya kufwetela oku liswalale ali na kumunyunga. Wakele kuje ha myaka ibali. Banu mubakele na kumumenekela, wakele na kubambulwila bya Bumwene bwa Njambi na kubalongesa bya Yesu. Paulu wasonekelele mikanda bikungulukilo bya mu Asia na Judeya. Cili bene, Yehova wapangesele Paulu mu kwambulula muzimbu waubwa ku baka-mafuti.