Balingile Cikumiiyo na Yehova

BaIsalele betele ku Munkinda wa Sinai mu kwetile bingonde bibali kutunda habatundilile mu Ijipiti, co bashimbikile cilombo. Yehova wasanene Mosesa ha munkinda na kukamuleka ngwendi: ‘Njinobola baIsalele. Nga banjononoka na kunyunga mashiko ange, co bapwa banu bange ba kulitila.’ Mosesa wasikumukile kutunda ha munkinda na kukaleka baIsalele byuma byendekele Yehova. BaIsalele bakumbulwile bati? Bendekele ngwabo: ‘Tulinga byoshe byanendeka Yehova.’

Mosesa wakandukile lalo ha munkinda. Mwaketele, Yehova wamulekele ngwendi: ‘Munima ya matangwa atatu, njikendeka na baIsalele. Uleke banu ngwobe keti beseke kukanduka ha munkinda.’ Mosesa wasikumukile na kukaleka banu ngwendi balibwahesele kwakutolilila byabaleka Yehova.

Mu kwetile matangwa atatu, baIsalele bamwene mihyato na lishelwa lya kuzibala ha munkinda. Bazibile na cililimo cakama na cilumo ca limbinga. Co Yehova wezile ha munkinda mu tuhya. BaIsalele bazibile manene lyoba, ngeci bashangumukile kujaja. Munkinda woshe wa Sinai walingile bwisi kondakani, co munkinda woshe wajajele manene. Cilumo ca limbinga cakele na kutwalelelaho kulibwezelela. Kutundaho, Njambi wendekele ngwendi: ‘Yange Yehova, keti mulemese binjambi beka.’

Mosesa wakandukile ha munkinda, co Yehova wamwanene mashiko aje amwesele mubapandele kumulemesela na futisi ibapandele kukala nayo. Mosesa wasonekele aje mashiko na kukabatandelawo. Ngeci baIsalele bakulahesele ngwabo: ‘Tulinga byuma byoshe byanatuleke Yehova.’ BaIsalele balingile cikumiiyo na Njambi. Kuma bacinyungile ndi?