Yehova Atuma Jelemiya Akambulule

Yehova wangwile Jelemiya kupwa kapolofweto wa baJuda. Yehova walekele Jelemiya ngwendi ambulwile banu na kubanangula ngwendi banapande kwecela kulinga byuma byabibi. Oloni Jelemiya wendekele ngwendi: “Yehova, kunjizibuka kwendeka mwafwa njicili nji mwanike wamundondo.” Yehova wamulekele ngwendi: ‘Keti uzibe lyoba. Njikuleka byakwendeka. Njikukwasa.’

Yehova walekele Jelemiya akungulule bamyata ba banu na kutika njaba ya buma oku bali na kulimwena na kubaleka ngwendi: ‘Omu mukemwo mubakatikila Jelusalema.’ Jelemiya mwalingile byuma byamulekele Yehova, baje bakulunu balubalele manene. Kapilistu wa lizina lya Pasha wapupile Jelemiya na kumwaka mu tukunju twa biti. Kasele nambe kupinda butsiki bwoshe. Lyamukwabo mutondo, Pasha watundisile Jelemiya mu tukunju. Co Jelemiya wendekele ngwendi: ‘Obu bukalu bunanjamena, kunjesi na nzili ya kutwalelelaho kukolesa. Njilikela kwambulula.’ Kuma walikelele kwambulula ndi? Embwe. Jelemiya mwasinganyekeseseleho, wendekele ngwendi: ‘Muzimbu wa Yehova unapu ngwe tuhya muli yange. Ngeci kunjilikele kwambulula.’ Ngeci, Jelemiya watwaleleleleho kunangula banu.

Munima ya myaka yaingi, mwene wamuha washangumukile kuyula Juda. Tupilistu na tupolofweto ba makuli bazindile muzimbu wa Jelemiya. Co balekele bamyata ngwabo: ‘Ou munalume napande kutsa.’ Jelemiya wendekele ngwendi: ‘Nga munjitsiya, co munjitsiya lika ngoco kwa kujeneka mulonga. Njikendeka majwi a Yehova, keti ange.’ Bamyata mubazibile ngoco, bendekele ngwabo: ‘Ou munalume kapandele kutsa.’

Jelemiya watwaleleleleho kwambulula, co bamyata balubalele manene. Balombele mwene ngwabo atsiye Jelemiya. Mwene wabalekele ngwendi balinge byoshe-byoshe bibashaka kuli Jelemiya. Bambatele Jelemiya na kukamumbila mu lisima lya kuloba lije lyakele na mandoba mangana atsilemo. Jelemiya washangumukile kumbombomena mu mandoba.

Ebedi-meleki uje wakele na kupangela mu nkuta walekele mwene ngwendi: ‘Bamyata banombila Jelemiya mu lisima. Nga kutumutundisamo, atsa.’ Co mwene washikile Ebedi-meleki ambate banalume 30 na kukatundisa Jelemiya mu lisima. Netu tunapande kutembwinina Jelemiya uje katabesele cuma coshe-coshe cimwonowese kwambulula.