CILONGESA 42
Mbimbiliya Yendeka Bika ha Buzike na Bulo?
Mu bisemwa bimo bamona ngwabo munu napande kwambata nambe kushomboka asina apwa wa kubwahelela. Oloni bazike na baje bali mu bulo boshe basa kupwa ba kubwahelela. Mbimbiliya ngwayo buzike na bulo byoshe byapwa bwana.
1. Bubwa muka buli mu kupwa muzike?
Mbimbiliya ngwayo: ‘Woshe akobela mu bulo alinga mwamubwa, oloni uje kakobela mu bulo alinga mwamubwa manene.’ (Tandeni 1 Kolinte 7:32, 33, 38.) Bika biinendekela Mbimbiliya ngwayo muzike ‘alinga mwamubwa manene’? Bazike kubesi na munu ibanalyambata nendi ibanapande kushota mbunge. Ngeci, banazituka kutubakana baje bali mu bulo. Banasa kulinga byabingi mu cipangi ca kwambulula. Bamo banasa kukambulwila ku myela yeka. Co lalo basa kuwana simbu yaingi ya kukanyamesa busamba bwabo na Yehova.
2. Bubwa muka buli mu kulyambata kwesekesa na mashiko?
Kukala mu bulo nakwo kwakubwa. Mbimbiliya ngwayo ‘babali banabwaha kutubakana umo.’ (Muka-kwambulula 4:9) Mukemwo bene, maneneni nga baje banalyambata bapangesa binangulo bya mu Mbimbiliya. Baje balyambata kwesekesa na mashiko balinga cikumiiyo ca kulizema, kulisingimika na kulyaka mbunge. Ngeci, banasa kushubuluka na kukala mwamubwa kutubakana baje bayoya lika hamo okuni kubalyambatele kwesekesa na mashiko. Co lalo nga bakala na bana, bana nabo basa kupwa ba kushubuluka na kukala mwamubwa.
3. Yehova wamona bati bulo?
Yehova mwashangumukile bulo, wendekele ngwendi: “Munalume akaseza ishe na baina na kulipandakana na munakazi wendi.” (Kushangumuka 2:24) Ngeci, atonda ngwendi munalume na munakazi wendi balizeme na kukala hamo mu kuyoya kwabo kwoshe. Yehova natabesa lika kulikondola nga kuli umo mukati kabo nalingi bukoi. Co uje kesi na mulonga nasa kulyangwila kutwalelelaho kukala na muka-limbo lyendi nambe kutsiya bulo.a (Mateo 19:9) Yehova katabesa bulo bwa lwale.—1 Timateo 3:2.
TONDESESENI
Bika bimikwasa mupwe ba kubwahelela na kuzibisa Yehova kubwaha ku mbunge nga mubazike nambe nga muli mu bulo?
4. Pangeseni mwamubwa buzike bweni
Yesu wamwene buzike kupwa bwana. (Mateo 19:11, 12) Tandeni Mateo 4:23, na kusimutwiya ha cihula cinatako:
Yesu wapangesele bati buzike bwendi mu kupangela Ishe na kukwasa bakwabo?
Baka-Kilistu babazike basa kulikuwa kupangesa mwamubwa buzike bwabo ngwe Yesu. Kengeni VIDIO na kusimutwiya ha cihula cinatako.
Baka-Kilistu babazike basa kupangesa bati mwamubwa buzike bwabo?
Muzibuka ndi?
Mbimbiliya kuyendekele myaka yanapande kukala nayo munu uje ashaka kukobela mu bulo. Nameme ngoco, imwesa ngwayo munu napande kutubakana ha ntwitwi ya bukwenje haje hanasa kukela na mashungu a kulilala aje anasa kumwonowesa kwangula mwamubwa byakulinga.—1 Kolinte 7:36.
5. Anguleni mwamubwa munu wa kulyambata nendi
Kwangula munu wa kulyambata nendi cinapu cuma cimo ca seho manene ku byuma bimunasa kwangula kulinga mu kuyoya. Tandeni Mateo 19:4-6, 9, na kusimutwiya ha cihula cinatako:
Mwafwa bika muka-Kilistu kapandele kushatukila kukobela mu bulo?
Mbimbiliya yasa kumikwasa kunanguka bifwa byabibwa byanapande kukala nabyo munu imushaka kulyambata nendi. Oloni cuma ca seho manene cinapu kulyambata na munu uje wazema Yehova.b Tandeni 1 Kolinte 7:39 na 2 Kolinte 6:14. Kutundaho, simutwiyeni ha bihula binatako:
Mwafwa bika munu napande kwambata nambe kushomboka lika kuli mukwabo muka-Kilistu?
Nga ngamba ya Yehova alyambata na munu uje kazemene Yehova, musinganyeka ngweni Yehova aliziba bati?
Nga bimuna babali ba kuliseza babaka ku joko imo, obo bimuna bayanda. Mu ngila imolika, nga muka-Kilistu alyambata na munu uje kalemesele Yehova, basa kuliwana na bukalu bwabwingi mu bulo bwabo
6. Moneni bulo ngwe mwabumwena Yehova
Kusañulu, Baisalele bamo bakele na kukondola banakazi babo kwa kujeneka mulonga. Tandeni Malakiya 2:13, 14, 16, na kusimutwiya ha cihula cinatako:
Mwafwa bika Yehova wazinda kutsiya bulo nga wahi hakati ka baje banalyambata nalingi bukoi?
Munu alinga bukoi azibisa muka-limbo lyendi na bana bendi kubabala ku mbunge
Kengeni VIDIO na kusimutwiya ha cihula cinatako.
Nga mwalyambata na munu uje kalemesele Yehova, bika bimunapande kulinga mangana mukale mwamubwa mu bulo bweni?
7. Pangeseni mashiko a Yehova aje endeka bya bulo
Munu napande kulifwita mangana apangese mashiko a Yehova aje endeka bya bulo.c Yehova abezikisa baje bononoka mashiko endi. Kengeni VIDIO.
Tandeni Vahevelu 13:4, na kusimutwiya ha bihula binatako:
Mumona bati, kuma mashiko a Yehova aje endeka bya bulo amabwa ndi? Mwafwa bika?
Bifulumende byabingi bishaka ngwabyo banu basonekese bulo bwabo nambe kubumanesa kwesekesa na mashiko. Ngeci, Yehova ashaka ngwendi baka-Kilistu basonekese bulo bwabo kuli baka-mashiko. Co lalo nga balikondola, banapande kukamanesela bulo bwabo kuli baka-mashiko. Tandeni Tito 3:1, na kusimutwiya ha cihula cinatako:
Nga muli mu bulo, kuma mwasonekesa bulo bweni ku fulumende ndi?
BAMO BANASA KWIHULA NGWABO: “Kuma banu kubasa kuyoya hamo nameme kubalyambatele ndi?”
Yeni ngwe mubakumbulula bati?
SIMPI YAKAMA
Buzike na bulo byoshe byapwa bwana bwa kutunda kuli Yehova. Bazike na baje bali mu bulo boshe basa kupwa ba kubwahelela nga bapangesa mwamubwa bwana bwabo kwesekesa na cizango ca Yehova.
Kwitulukamo
Munu asa kupangesa bati mwamubwa buzike bwendi?
Bika biinendekela mbimbiliya ngwayo muka-Kilistu napande kulyambata lika na mukwabo muka-Kilistu?
Mulonga muka ubanendeka mu Mbimbiliya uje wasa kutsiya bulo?
WANENI BIKWABO
Kulyambatela lika muli Mwene kulumbununa bika?
“Bihula bya Baka-kutanda” (Kaposhi ka Kukengela ka July 1, 2004)
Kengeni mavidio abali aje amikwasa mangana mwangule mwamubwa byakulinga nga mushaka kukobela mu bulo.
Moneni byuma byalingisile ndolome umo endeke ngwendi Yehova namwana byuma byabibwa byabingi kutubakana byanaseze.
Bika byanapande kwaka munu mu bisinganyeka nga ashaka kutsiya bulo nambe nga ashaka kulitepa na muka-limbo lyendi?
“Singimikeni Bulo Bwanabwahesa Njambi” (Kaposhi ka Kukengela ka December, 2018)
a Taleni Biñanda bya Kushongo 4 bije byendeka byuma byasa kulingisa baje banalyambata balitepe nameme wahi mukati kabo nalingi bukoi.
b Mu bisemwa bimo, bisemi bakangwila munabo munu wa kulyambata nendi. Nga bisemi balinga ngoco, co kubapandele kukaba lika bufuko nambe byuma byeka byanasa kukala nabyo owo munu. Cuma cakama cinapu kumona indi owo munu wazema Yehova.
c Nga mwakala na munu uje kumwalyambatele nendi, mwasa kulyangwila kulyambata nendi nambe kulitepa.