CILONGESA 37
Bika Biyendeka Mbimbiliya ha Bipangi na Bimbongo?
Kuma simbu imo mukalishoshomwena ha bipangi na bimbongo ndi? Bisimbu bimo, kuwana byakulikwasesa ku mubila na kulemesa mwamubwa Yehova kunasa kutukaluwila. Mu Mbimbiliya muli binangulo bije byasa kutukwasa.
1. Bika biyendeka Mbimbiliya ha bipangi?
Njambi ashaka ngwendi tulikuwe bipangi. Mbimbiliya ngwayo ‘kukwesi cuma cacibwa ku munu cije cinatubakana . . . kulikuwa bipangi byendi.’ (Muka-kwambulula 2:24) Yehova akapanga na nzili. Nga netu tupanga na nzili, co tulikuwa bipangi byetu na kumuzibisa kubwaha ku mbunge.
Bipangi byapwa bya seho. Oloni kubyapandele kupwa bya seho manene kutubakana kulemesa Yehova. (Yowano 6:27) Njambi natukulahesa ngwendi nga tutwameka byendi kulutwe, co atwana bitutonda ku mubila.
2. Tunapande kumona bati bimbongo?
Mbimbiliya ngwayo ‘bimbongo byasa kutukwasa.’ Oloni yatunangula lalo ngwayo bimbongo habyolika kubyasa kutupwisa ba kubwahelela. (Muka-kwambulula 7:12) Ngeci, kutwapandele kuzema bimbongo. Tunapande ‘kujauka na byuma bituli nabyo.’ (Tandeni Vahevelu 13:5.) Nga tujauka na byuma bituli nabyo, co kutukala na bishoti bya kutonda bimbongo byabingi. Co lalo kutulikobelesa mu mikuli. (Visimo 22:7) Kutukala na linyanyamena nambe kulikobelesa mu bingila byabibi bya kutondelamo bwasi bimbongo.
3. Twasa kupangesa bati bimbongo mu ngila yaibwa?
Yehova Njambi wapwa muka-kwana. Nga netu ‘twanako bakwetu’ bituli nabyo, co tutembwinina Yehova. (1 Timateo 6:18) Twasa kupangesa mwamubwa bimbongo nga tulambula ku cikungulukilo na kukwasa bakwetu, maneneni bandolome na bandokazi. Yehova akaka manene mbunge ku byuma bitulingisa tulambule keti ku bukama nambe bundondo bwa mulambu wetu. Nga twana kutundilila kwisi ya mbunge, tupwa ba kubwahelela, co lalo tuzibisa Yehova kubwaha ku mbunge.—Tandeni Vilinga 20:35.
TONDESESENI
Bubwa muka buli mu kumona bipangi mu ngila yaibwa na kujauka na byuma bituli nabyo?
4. Twasa kupanga bati bipangi mu ngila imwesa kasingimiko kuli Yehova?
Busamba bwetu na Yehova bunapande kutukwasa tumone bipangi mu ngila yaibwa. Kengeni VIDIO na kusimutwiya ha bihula binatako.
Kwesekesa nei vidio, Jason namwene bati bipangi? Co bifwa muka byakele nabyo?
Bika byanalingile mangana bipangi keti bimwonowese kulemesa mwamubwa Yehova?
Tandeni Kolose 3:23, 24, na kusimutwiya ha cihula cinatako:
Bika bitunapande kumwena bipangi mu ngila yaibwa?
Bipangi byapwa bya seho. Oloni kubyapandele kupwa bya seho manene kutubakana kulemesa Yehova
5. Kujauka na byuma bituli nabyo kutukwasa
Banu babangi bashaka kulikungulwila bimbongo byabingi. Oloni Mbimbiliya kuitushongangeya kulinga ngoco. Tandeni 1 Timateo 6:6-8, na kusimutwiya ha cihula cinatako:
Mbimbiliya itushongangeya kulinga bika?
Twasa kupwa ba kubwahelela nameme kutwesi na byuma byabingi bya ku mubila. Kengeni VIDIO na kusimutwiya ha cihula cinatako.
Bika binalingisa banu bamo bapwe ba kubwahelela nameme kubesi na bimbongo byabingi?
Bati nga tuli na bimbongo byabingi, oloni anga tucitonda kulikungulwila bikwabo? Yesu wendekele cakumwenako cije cimwesa bukalu bwasa kutundamo. Tandeni Luka 12:15-21, na kusimutwiya ha cihula cinatako:
Bika bimunalilongesa ku cakumwenako eci?—Taleni vesi 15.
Tandeni Visimo 10:22, co esekeseni na 1 Timateo 6:10. Kutundaho, simutwiyeni ha bihula binatako:
Byuma muka bya seho manene, kulikuta busamba na Yehova indi kukala na bimbongo byabingi? Mwafwa bika?
Bukalu muka bwasa kutunda mu kushaka kukala na bimbongo byabingi?
6. Yehova atukwasa tuwane byuma bitutonda
Kujeneka cipangi nambe bimbongo bya kupwamo kutukwasa tumone indi twakulahela Yehova. Kengeni VIDIO mangana mumone byasa kumikwasa nga mwaliwana nobu bukalu. Kutundaho, simutwiyeni ha bihula binatako.
Kwesekesa na vidio, bukalu muka bwanaliwanene nabwo uje ndolome?
Bika byanalingile bije binamukwasele akolese?
Tandeni Mateo 6:25-34, na kusimutwiya ha cihula cinatako:
Yehova nakulahesa bika baje batwameka byendi kulutwe?
BAMO BAKENDEKA NGWABO: “Njinapande kupanga na nzili mangana njiwane byakulikwasesa na baka-naanga yange. Kunjasa kukunguluka calumingo na calumingo.”
Cisoneka muka camikwasa mumone ngweni kulemesa Yehova cikeco cuma ca seho manene?
SIMPI YAKAMA
Nameme bipangi na bimbongo byapwa bya seho, oloni kubyapandele kutwonowesa kupangela mwamubwa Yehova.
Kwitulukamo
Bika bimikwasa mumone bipangi mu ngila yaibwa?
Kujauka na byuma bimuli nabyo kumikwasa bati?
Yehova asa kukwasa bangamba bendi mangana bawane bibatonda. Mwasa kumwesa bati ngweni mwakulahela ngoco?
WANENI BIKWABO
Kuma Mbimbiliya imwesa ngwayo bimbongo byapwa byabibi ndi?
“Kuma Bimbongo Byapwa Nsina ya Bubi Bwoshe Ndi?” (Ñanda ya ha webusaiti)
Twasa kupangesa bati bimbongo mu ngila ije izibisa Njambi kubwaha ku mbunge?
“Bika Biyendeka Mbimbiliya ha Kwana?” (Ñanda ya ha webusaiti)
Bukalu muka bwasa kutunda mu kweha bweho bwa linyanyamena?
“Biyendeka Mbimbiliya ha Kweha Bweho bwa Linyanyamena” (Toneni! ya March 2015)
Bika byalingisile munalume umo uje wakele na linyanyamena, co lalo wapwile mwizi, atengulule futisi yendi?
“Njashakele Manene Bweho bwa Kulonda Tubalu” (Kaposhi ka Kukengela ka November 1, 2011)