MUTWE WAKAMA
Nga Munu Imwathzema Nathsi
“Kethi. . . ulile . . . mbai, . . . Njambi ikeye athzivuka.”
Awa majwi vawalekele munakathzi umo wa lithzina lya Bebe, omwo wakele ha vya kuthsa vya vaishe vaje vathsile mu monde ya mu minyau.
Bebe walithzivathanene manene na vaishe. Munu umo uje walithzivathanene manene na nanga yavo ikeye wakele na kuthzembeleka Bebe. Oloni kulinga ngocho kwathzeyethele manene Bebe. Bebe welukilileilukilile kwendeka ngwendi: “Vatate kuvathsile mwamuvwa.” Nameme mwetile myaka kutunda oho, omwo Bebe wawanene kuthsa kwa vaishe mu livulu limo, anga wachikele mu vuthiwa.
Munu natha kulifwita na vuthiwa ha myaka yaingi, maneneni nga walithzivathanene manene na muka-kuthsa ngwe muchafwile kuli Bebe. Mukemwo Mbimbiliya yatumbula kuthsa ngwavo “chitothzi wa kukotokela.” (1 Kolinte 15:26) Na chimo chayi chatha kwonowetha kuthsa. Kukatwithzila ha thimbu ije kutwalivwaethelele na kuthsiya vene vaje vatwathzema. Kuthsa kukaviyithila munu na munu woshe. Ngechi kutwatha kukomoka nga munu athzeya manene omwo ya kuthsitha, na vukalu vukasholoka munima.
Hamo mwalihulaho ngweni: ‘Kuma njinatha kwambata thimbu ya kupwa hali mu kulifwita na vuthiwa? Munu natha kulifwita vati na vuthiwa? Njatha kuthzembeleka vati vakwetu vaje vanathsitha? Lilavelelo muka litwakala nalyo ha vanu vatwathzema vaje vanathsi?