“Yeni, . . . ku Miyati Yoshe ya Vanu na Kuvapwitha Vandongethi”

1, 2. Vihula muka vya kukundama ku majwi endekele Yesu ku Mateo 24:14?

YESU wendekele ngwendi mu matangwa a kukotoka, muthzimbu wauvwa vakawambulula ku vanu voshe. (Mateo 24:14) Ha kupwa Vakaleho va Yehova, twathsimana mu kaye mwoshe, mwafwa ya chipangi chetu cha kwambulula. Vanu vamo vashaka muthzimbu wetu, veka vauthzinda. Oloni nameme vaje vathzinda muthzimbu utukambulula, vakatuthingimika mwafwa ya chipangi chetu. Tuthzivuka ngwetu yetu tuli na kupanga chipangi chashikile Yesu. Tuli na ndthzili ya kwendeka ngocho ndi? Tuthzivuka vati ngwetu chipangi chetu cha kwambulula chikecho chije chendekele Yesu?

² Vaka-vulombelo vwavungi vakalishasha ngwavo vakambulula muthzimbu wa Yesu. Oloni vakevo vakambulwila lika mu vi chachi nambe ha TV nambe ha Intaneti nambe kulekako vakwavo muvalilongethelele vya Yesu. Veka vakalithzivi ngwavo vakambulula kwitila mu kukwatha vanu vaje vali mu vujene nambe kulyana kupwa vaka-kuthaka nambe vaka-kulongetha. Oloni evi vikevyo vipangi vya kwambulula vyendekele Yesu ndi?

3. Kwetheketha na mukanda wa Mateo 28:19, vyuma muka viwana vivanapande kulinga vaka-kukavangeya Yesu?

³ Yesu washakele ngwendi vanu vaije kuli vandongethi vendi ndi? Embwe. Yesu mwathangukile, walekele vaka-kumukavangeya ngwendi: “Yeni, oni ku miyati yoshe ya vanu na kuvapwitha vandongethi vange, vambwitikeni . . . , valongetheni kwononoka vyuma vyoshe vije vinjamishiki.” (Mateo 28:19, 20) Ha kupwa vaka-kukavangeya Yesu, tunapande kulinga vyuma viwana. Tunapande kupwitha vanu kupwa vandongethi na kuvambwitika na kuvalongetha. Oloni tunapande tahi kuya ku vanu. Muka-kulilongetha vya Mbimbiliya umo walumbunwine ngwendi: “Muka-kukulahela woshe napande ‘kuya,’ nameme vungendthzi vwa kujavuka kalunga ndonga nambe kutumbuka tapalo.”—Mateo 10:7; Luka 10:3.

4. Vyuma muka vyalivungila mu kupwa “vaka-kujevela vanu”?

⁴ Yesu washakele ngwendi vandongethi vendi valinge vika? Washakele ngwendi vambulule umo umo, indi washakele ngwendi vapangele hamo? Vandongethi vendi vanapandele kupangela hamo mwafwa munu umo lika katha kwambulula “ku miyati yoshe.” Echi chikecho chalumbunwine Yesu mwalanyene vandongethi vendi kupwa “vaka-kujevela vanu.” (Tandeni Mateo 4:18-22.) Kujevela kwalumbunwine Yesu aha kethi kulovela. Oloni Yesu walumbunwine kupangetha manimbwa. kuthsiya vithi mu ngila eyi kutondeka kupanga na ndthzili, na kulikwatathana kwa vanu vavangi.—Luka 5:1-11.

5. Vihula muka viwana vitunapande kukumbulula, cho mwafwa vika?

⁵ Twatha kuthzivuka vaje vali na kwambulula muthzimbu wauvwa matangwa ano, nga tukumbulula evi vihula viwana:

• Muthzimbu muka uvanapande kwambulula vaka-kukavangeya Yesu?

• Mwafwa vika vanapande kuwambulula?

• Vanapande kuwambulula mu vingila muka?

• Vanapande kupanga echi chipangi kweta hali, cho chinapande kuhwa tangwa lika?

Kukumbulula evi vihula, kutukwatha tuthzivuke vali na kulinga echi chipangi cha kwovola vanu, cho tukala na lishungu lyakama lya kutwalelelaho kwambulula.—1 Timateo 4:16.

MUTHZIMBU MUKA UVANAPANDE KWAMBULULA?

6. Mwafwa vika mwatha kukulahela ngweni Vakaleho va Yehova vakambulula muthzimbu wa vuthunga?

⁶ Tandeni Luka 4:43. Yesu wambulwile “viñanda vyavivwa vya Vumwene,” cho ashaka vandongethi vendi navo vamutembwinine. Veya vali na kwambulula ou muthzimbu ku vanu voshe? Vakaleho va Yehova lika. Nameme vaje vatuthzinda navo vathzivuka ngocho. Chakumwenako, tolilileni omwo kapilisitu wa kamishinali uje wakele mu mafuti a kulithethza-thethza walekele Vakaleho va Yehova. Mu mafuti mwoshe mwakele, ou kapilisitu wakele na kwihula Vakaleho va Yehova muthzimbu uvakele na kwambulula. Kapilisitu wendekele ngwendi: “Voshe vapwile vilema mwafwa vanjikumbulwile chikumbululo chimo ngwavo: ‘Muthzimbu wauvwa wa Vumwene.’” Majwi ou kapilisitu amwetha ngwavo kethi tuvilema, oloni twalikwatathana ha kupwa vaka-Kilisitu va vuthunga. (1 Kolinte 1:10) Muthzimbu wa Vumwene vwa Njambi ukewo uvakendeka manene mu Kaposhi ka Kukengela Kali na Kutambeka Vumwene vwa Yehova. Eyi mangazini ili mu vindaka vya kupwa 254 cho vakapulita mangazini a kupwa 59,000,000 kwetheketha na avalenji. Echi chikecho chinailingitha ipwe ya kuthsimana manene mu kaye.

7. Tuthzivuka vati ngwetu vakulunu va mu Vulombelo kuvethi na kwambulula muthzimbu wa vuthunga?

⁷ Vakulunu va mu Vulombelo vwa makuli kuvethi na kwambulula Vumwene vwa Njambi. Nga vendeka vya Vumwene, vwingi vwavo vakendeka ngwavo inapu chuma chili mu mbunge ya munu. (Luka 17:21) Kuvethi kulongetha vanu ngwavo Vumwene inapu fulumende mpundu ya mwilu ije yakayula Yesu. Oloni vakendeka vya Yesu ha Kilisimasi nambe ha Isita. Kuvethi kulumbunwina vanu ngwavo Vumwene vwa Njambi vukamanetha vukalu vwa vanu vwoshe, cho lalo ololo vutunditha vuvi vwoshe mu kaye. (Kujombolola 19:11-21) Vakulunu va mu vulombelo kuvathzivuka vyakalinga Yesu ha kupwa Mwene wa Vumwene vwa Njambi. Kutundoho lalo, kuvathzivuka vivanapande kwambulwila mwafwa kuvethi kuthzivithitha muthzimbu wa Yesu.

MWAFWA VIKA TUNAPANDE KWAMBULULA?

8. Vithinganyeka muka vyavivi vitunapande kujenjuka ha kwambulula?

⁸ Vandongethi va Yesu kuvapandele kwambulula mwafwa ya vimbongo nambe mwafwa ya kushaka kutunga vinjuvo vyakukomowetha. Yesu wendekele ngwendi: “Yeni munavitambula vyangocho kujeneka kufweta, ngechi vene, neni lalo aneni ngocho kujeneka kutambulaho chimo.” (Mateo 10:8) Ngechi, chipangi cha kwambulula ku chapandela kupwa mingotho. (2 Kolinte 2:17) Vandongethi va Yesu kuvapandele kutonda fweto ha chipangi chavo cha kwambulula. (Tandeni Vilinga 20:33-35.) Nameme lishiko lya Yesu lyalyathi kulithzivithitha, oloni mu vichachi vyavingi anga vakakungulula vimbongo vya kuvwahethetha vichachi na vya kufweta vakulunu va vulombelo na vaka-kupanga. Mukemwo vwingi vwa vakulunu va mu Vulombelo vapwa va kufuka.—Kujombolola 17:4, 5.

9. Vakaleho va Yehova vanamwetha vati ngwavo vakapanga chipangi chavo mu kulyana?

⁹ Vakaleho va Yehova vakafwetetha vimbongo ku Vinjuvo vyavo vya Vumwene nambe ku viwano vyakama ndi? Embwe. Vipangi vyavo vakavikundwiya na milambu ya kulyanukila. (2 Kolinte 9:7) Oloni mwakawali, Vakaleho va Yehova vanapangele maola 2 biliyoni mu chipangi cha kwambulula muthzimbu wauvwa, cho lalo vanendethele vilongetha vya Mbimbiliya 9 miliyoni ngonde na ngonge. Kuvethi kutambula fweto ha chipangi chavo cha kwambulula, oloni vanavwahelela kupangetha vimbongo vyavo mu chipangi echi. Muka-kulengeya umo wendekele hali Vakaleho va Yehova ngwendi: “Vakevo chilengo chavo chakama chinapu kwambulula na kulongetha.” Wendekele lalo ngwendi Vakaleho va Yehova kuvethi kufweta vakulunu va mu vulombelo vwavo. Nga kutwethi kushaka fweto ha kwambulula kwetu, cho vika vitukambulwila? Tunalyana kupanga echi chipangi mwafwa twathzema Yehova na vanu. Oku kulyana kukashulithilila vupolofweto vuje vuli ku Myatho 110:3. (Tandeni.)

VANAPANDE KUWAMBULULA MU VINGILA MUKA?

10. Yesu na vandongethi vendi vapangethele vingila muka mu kwambulula?

¹⁰ Yesu na vandongethi vendi vapangethele vingila muka mu kwambulula? Vakele na kuya kwoshe kuvawanene vanu. Chakumwenako, vakele na kwambulula mu vitapalo na ku mitambela ya mingotho. Vakele na kuya lalo ku vinjuvo vya vanu. (Mateo 10:11; Luka 8:1; Vilinga 5:42; 20:20) Kwambulula ku njuvo na njuvo yapwile ngila yaivwa ije yavathiwithile kwambulwila vanu voshe.

11, 12. Kwambulula muthzimbu wauvwa kwa Vaka-vulombelo kunalithethze vati nomwo vakambulwila Vakaleho va Yehova?

¹¹ Vaka-Vulombelo vwa makuli vakambulula muthzimbu wauvwa ngwe mwalingilililemo Yesu ndi? Kakangi, vakulunu va mu vulombelo vwa makuli vaje vavakafwete, vakambulula lika kuli vanu vavo. Ava vantwama kuvethi kushakathzeka vandongethi vavaha, oloni vakavingilikiya vene vanu vavo va laja. Thimbu imo, vaketheka kushongangeya vanu vavo kuya na kwambulula. Chakumwenako, mu mwaka wa 2001, Pope John Paul II wendekele mu mukanda ngwendi vaka-vichachi voshe vanapande kwambulula Muthzimbu wauvwa na ntwima ngwe kapositola Paulu, uje wendekele ngwendi: “Ngongo yange nga kunjambulula muthzimbu wauvwa.” Ou pope wendekele ngwendi vanu voshe vanapande kulinga echi chipangi, kethi vanu vavandondo lika vaje vavanalongetha. Oloni vavandondo lika vanakavangeya echi kushongangeya.

¹² Vakaleho va Yehova cho? Vakevo lika vakambulula ngwavo Yesu napu Mwene kushwa mu 1914. Vakononoka Yesu, cho lalo vamona chipangi cha kwambulula kupwa cha theho mu kuyoya kwavo. (Mako 13:10) Livulu lya Pillars of Faith—American Congregations and Their Partners lyendekele ngwavo Vakaleho va Yehova vamona chipangi cha kwambulula kupwa cha theho manene. Lyendekele lalo ngwavo nga vawana vanu vaje vali mu njala nambe mu vuli nambe vaka-kuvinja, vaketheka kukwatha, oloni kuvethi kwivala ngwavo chipangi chavo chakama chapwa cha kwambulula vya kuhwa kwa kano kaye na kulongetha vanu vya kwovoka. Vakaleho va Yehova vanatwalelelaho kwambulula muthzimbu na kutembwinina vingila vyapangethele Yesu na vandongethi vendi.

VANAPANDE KUPANGA ECHI CHIPANGI KWETA HALI, CHO CHINAPANDE KUHWA TANGWA LIKA?

13. Muthzimbu wauvwa vanapande kuwambulula ku mafuti angayi?

¹³ Yesu wendekele ngwendi vaka-kumukavangeya vakambulula na kulongetha muthzimbu wauvwa “mu kaye mwoshe.” Wavashikile kupwitha vanu va “miyati yoshe” kupwa vandongethi. (Mateo 24:14; 28:19, 20) Echi chilumbununa ngwavo muthzimbu wauvwa vanapande kuwambulula mu kaye mwoshe.

14, 15. Vyuma muka vimwetha ngwavo Vakaleho va Yehova vakevo vali na kushulithilila vupolofweto vwa Yesu vwa kwambulula mu kaye mwoshe? (Kengeni chikupulo chili ha liputa.13)

¹⁴ Vakaleho va Yehova lika vakevo vali na kushulithilila vupolofweto vwa Yesu vwa kwambulula muthzimbu wauvwa mu kaye mwoshe. Vika twendekela ngocho? Mu United States muli vakulunu va vulombelo vwa makuli vakweta ku 600,000, oloni kuli Vakaleho va Yehova vakupwa 1,200,000 vali na kwambulula muthzimbu wauvwa mu lifuti olyo. Mu kaye mwoshe tupilisitu vaka-Katolika vapwa 400,000, oloni Vakaleho va Yehova vakupwa 8 miliyoni vali na kwambulula muthzimbu wauvwa mu mafuti akupwa 240. Vakaleho va Yehova vali na kwambulula muthzimbu wauvwa mu kaye mwoshe, cho echi chipangi chili na kushangala na kunena kathingimiko kuli Yehova.—Myatho 34:1; 51:15.

¹⁵ Ha kupwa Vakaleho va Yehova, tushaka kwambulula muthzimbu wauvwa ku vanu vavangi thimbu mamanethelelo kanda achije. Tuli na mavulu na mangazini na matilakiti amangi avanathoneka na kunungulula. Twakala lalo na viwano vya mutambela na tumapapelo twa kulanya vanu ku Chanukitho mu vindaka vya kutuvakana 700. Tukana awa mavulu vwana. Mwakawali, tunathonekele mavulu a Mbimbiliya akupwa 4.5 biliyoni. Cho lalo tunathonekele viMbimbiliya 200 miliyoni vya New World Translation of the Holy Scriptures mu vindaka vya kutuvakana 130. Wembusaiti yetu ili na viñanda mu malimi a kutuvakana 750. Vakaleho va Yehova lika vakevo vali na kupanga chipangi chakama cha kufwa ngechi.

16. Tuthzivuka vati ngwetu Vakaleho va Yehova vali na sipilitu ya Njambi?

¹⁶ Chipangi cha kwambulula chihwa tangwa lika? Yesu wendekele ngwendi muthzimbu wauvwa vakawambulula kweta noho kukotoka kwa kaye kukaija. Ha kupwa Vakaleho va Yehova, sipilitu ya Yehova yatukwatha kukanyamena vukalu vutukaliwana navwo mu chipangi cha kwambulula, mu thimbu ino ya kukotoka. (Vilinga 1:8; 1 Petulu 4:14) Vaka-vulombelo vamo vakendeka ngwavo: “Twakala na sipilitu ya kujela.” Oloni vatha kulinga chipangi chivana kulinga Vakaleho va Yehova ndi? Vimbunga vimo vinetheka kututembwinina, oloni vanonwa. Veka vashaka kwambulula, oloni vashaka kulinga ngocho ha thimbu yaindondo lika. Vamo vakambulula ku njuvo na njuvo, oloni kuvethi kwambulula muthzimbu wauvwa wa Vumwene. Ngechi, kuvatha kupanga chipangi chije chalingile Yesu.

VEYA VALI NA KWAMBULULA MUTHZIMBU WAUVWA MATWANGWA ANO?

17, 18. (a) Vika twendekela ngwetu Vakaleho va Yehova vakevo vali na kwambulula muthzimbu wauvwa wa Vumwene matwangwa ano? (b) Mwafwa vika twatha kutwalelelaho kupanga echi chipangi?

¹⁷ Veya vali na kwambulula muthzimbu wauvwa wa Vumwene matwangwa ano? Vakaleho va Yehova lika. Tuthzivuka vati ngocho? Mwafwa tuli na kwambulula Muthzimbu wa vuthunga, muthzimbu wauvwa wa Vumwene. Tuli na kutonda vanu mu chipangi chetu, ngechi tunapande kupangetha vingila vyavivwa. Kuli vimo vikatulingitha twambulule. Twathzema Yehova na vanu. Chipangi chetu cha kwambulula chinapu chakama mwafwa tukambulula ku vanu va ku mafuti oshe na vindaka vyoshe. Tutwalelelaho kwambulula muthzimbu wauvwa wa Vumwene noho kukotoka kukaija.

¹⁸ Vipangi vya kwambulula muthzimbu wauvwa vivali na kupanga vanu va Yehova mu matangwa ano a kukotoka, kukomowetha. Oloni tuli na kwatha vati kwambulula mu kaye mwoshe? Kapositolo Paulu walumbunwine ngwendi: “Thimbu yoshe Njambi alinakupanga muli yeni ngechi mukale na chithzango, cho ngechi mwathe kwononoka vutumbe vwendi vavenya.” (Filipu 2:13) Tulomba ngwetu Yehova atwaleleleho kutwana ndthzili mangana tutwaleleleho kwambulula muthzimbu wauvwa na ntwima.—2 Timateo 4:5.