Naumo Wahi Asa Kutewa Kutsa

ACISINGANYEKENI ngweni muli na kukenga vidio ya munu wa kutsimana, hamo muka-kwimba uje imwashaka manene. Imwesa kuyoya kwendi kushangumuka ku bwanike, ha simbu yalilongesele kwimba, na ha simbu yashangumukile kwimba kushwa kumo. Co mumumona ashangumuka kwimbila ku mbunga, kukembila mu mafuti a kulisezaseza, mu kwita kwa simbu bamuzibuka mu kaye koshe. Kukapwa muje bamumwesa oku nakulubala, co mu kuhwa kwa vidio mumumona atsa.

Eyi vidio kuili, imwesa muzimbu wa kuyoya kwa munu umo uje natsi. Ou muzimbu wa cifwa eci twasa kuwendeka hali baka-kwimba, baka-sayansi, baka-kushatuka nambe hali banu beka ba kutsimana. Munu nasa kufwitangana byuma byabingi byabibwa mu kuyoya, oloni ngwe kukwesi kukala kukulubala na kutsa ngwe asa kupanga byabingi manene.

Ca lubinda, tubaboshe twabandamena kuliwana nobu bukalu. (Muka-kwambulula 9:5) Nameme tulifwite bati, oloni kubanga bene tukulubale na kutsa. Kesi bukulukazi lika, oloni twasa kutsa oku tucili tu banike mwafwa ya bubezi nambe bimonde. Ngwe muyendekela Mbimbiliya, twapwa lika ngwe mbundu ije “isholoka kasimbu kakandondo lika, co inyonga.”—Yakomba 4:14.

Banu bamo bamona ngwabo kubasa kuyoya simbu yailaha mukemwo bakendeka ngwabo “tulyeni na kunwa, omwo imene tutsa.” (1 Kolinte 15:32) Oloni banu bakakala na bisinganyeka bya cifwa eci mwafwa bazibuka ngwabo simbu yoshe basa kutsa co kubesi na lilabelelo lya kukayoya lalo. Nga muliwana na bukalu mu kuyoya munasa kulihula ngweni: ‘Bukebwo lika buyoye buliko obu ndi?’ Mwasa kuwana kuli cikumbululo?

Banu babangi bakulahela ngwabo baka-sayansi bakebo basa kubakumbulula. Bumbanda na byuma bikwabo bibanalingi baka-sayansi bili na kutukwasa kuyoyako myaka yaingi. Baka-sayansi bamo bali na kupanga na nzili mangana bakwase banu kuyoya myaka yaingi manene. Nameme basa kulinga ngoco nambe bonowa, oloni banu hanga bacitonda kuzibuka bituli na kukulubalela na kutsa. Kuma kutsa kukahwa ndi? Bilongesa binatako bisimutwiya ha biñanda ebi na kukumbulula eci cihula: Obu bukebwo lika buyoye buliko ndi?