Bihula Bya Baka-kutanda

Satana mwalekele Eva ngwendi katsi nga alya ku muti wa kuzibuka bubwa na bubi, kuma walumbunwine ngwendi mwonyo kuwesi kutsa, ngwe mubali na kulongesela banu ano matangwa ndi?

Embwe. Satana mwalikwasesele linyoka ha kuleka Eva ngwendi ‘kakatsi’ nga alya ku muti wabindikile Njambi, kalumbunwine ngwendi mubila utsa, oloni mwonyo wendi ukayoya ku mwela weka. Satana walumbunwine ngwendi Eva atwalelelaho kuyoya mwamubwa hano hasi kwa kujeneka kumutwamenena kuli Njambi.​—Kusha 2:17; 3:3-5.

Nga cilongesa ca kwendeka ngwaco mwonyo kuwesi kutsa kucashangumukilile mu lihya lya Edeni, co cashangumukilile kuli? Kutuzibuka bwino. Tuzibuka ngwetu bulombelo bwoshe bwa makuli babunyongesele ha Libazi lya Nowa. Co lalo bilongesa byoshe bya makuli byahilwe. Nowa na naanga yendi lika, baje bapwile baka-kulemesa Njambi mu busunga bakebo bobokele.

Co hamo eci cilongesa ca kwendeka ngwaco mwonyo kuwesi kutsa cashangumukile hanima ya libazi. Njambi mwatanganesele muyati wa baje bakele mu nganda ya Mbambilone, banu ‘bashandokelele hano hasi hoshe,’ co hamo baile neci cilongesa ca kwendeka ngwaco mwonyo kuwesi kutsa. (Kusha 11:8, 9) Nameme kutuzibuka kucashangumukilile eci cilongesa ca makuli, oloni tuzibuka ngwetu Satana Liyabolo “ishe ya makuli” ikeye wacinenele, co wabwahelelele omwo cashandokelele mu kaye mwoshe.​—Yowa 8:44.