Kuma Biñanda bya mu Lijwi lya Njambi Binatenguluka Ndi?

Banu bamo bakasinganyeka ngwabo biñanda bya mu Lijwi lya Njambi binatenguluka. Oloni kapolofweto Isaya wasonekele ngwendi lijwi lya Njambi “likakala simbu yoshe.” (Isaya 40:8) Tuzibuka bati ngwetu bikulaheso bya Njambi bitukatanda mu Mbimbiliya bikebyo bene byakulahesele Njambi kusañulu?

Njambi ali na nzili ya kunyungilila lijwi lyendi mangana keti balibiise. Kusañulu, banu mubakele na kunungulula bisoneka, baka-kunungulula bakele na kutanda bije bisoneka byoshe mangana keti babwezeleleko, kutengulula nambe kujomboka byuma bimo. Oloni tuzibuka ngwetu banu kubalumbunukile, ngeci baka-kunungulula bamo bakele na kusebuka.

TUZIBUKA BATI NGWETU MBIMBILIYA INAPU LIJWI LYA NJAMBI MPUNDU?

Kuli makopi a kusañulu a Bisoneka bya Kujela amangi abanawana. Nga kopi imo ili na kapenga, co basa kuyesekesa na makopi akwabo mangana bawane busunga.—Nga mushaka kuzibuka byabingi taleni ñanda ya “Kuma Mbimbiliya banaitengulula ndi?” (“Has the Bible Been Changed or Tampered With?”) ije ili mu Ingilishi ha webusaiti ya jw.org.

Cakumwenako, kuli mabulu a kuzenga a kusañulu abatumbula ngwabo ma Dead Sea Scrolls aje abawanene ma bedouins mu manzenzengoma, kuyehi na Dead Sea mu mwaka wa 1947. Omu mu mabulu muli mitamba ya Bisoneka bya Kujela bije bibasonekele myaka ya kutubakana 2000 kunima. Baka-kulilongesa besekesele awa mabulu na mikanda ili mu Mbimbiliya. Banawanene bika?

Aba baka-kulilongesa banawanene ngwabo biñanda bili mu Mbimbiliya binalifu na bije bili mu Bisoneka bya kulibanga.a Oku kumwesa ngwabo Mbimbiliya inapu lijwi lya Njambi mpundu. Ngeci, twasa kukulahela ngwetu Njambi nanyungilila Bisoneka byendi bya Kujela mangana byase kutukwasa.

Ngeci, omwo tutanda lijwi lya Njambi, tunapande kukulahela ngwetu biñanda bilimo kubyatengulukile. Tusimutwiyeni oni bitulilongesa hali Njambi ku tupolofweto bendi.