Baisalele ba Kusañulu Bakele na Kulwa Binzita, Yetu Bika Kutwesi Kulwa?

HA SIMBU ikwakele Nzita ya Kaye yamucibali, mukulunu wa maswalale baka-Nazi walekele Bakaleho ba Yehova ngwendi: “Nga mukati keni kuli umo kashaka kulwisa baka-France nambe baka-England, co mubaboshe tumitsiya.” Nameme maswalale baka-Nazi babandamenene kuziba mubakumbulwila bandolome, oloni naumo wahi watabele kukalwa nzita. Aba bandolome bapwile ba kusimpa. Ou mwanja umwesa mwamubwa Bakaleho ba Yehova mubakamwena binzita: Tukabyana kulwa binzita bya muno mu kaye. Nameme batuleka ngwabo batutsiya nga tubyana kulwa, tukabyana kulikobelesa mu binzita bya mu kaye.

1. BANU BA NJAMBI BOSHE BAPWILE BA MUYATI UMO

Kusañulu, Yehova wangwile muyati umo wa Baisalele kupwa banu bendi. Wasanene Baisalele ngwendi, “bufuko bwange bwa kulitila mukati ka banu boshe.” (Kutu 19:5) Njambi wabanene lalo mwela wabo wakukala. Ngeci, Njambi mwakele na kuleka Baisalele ngwendi baye na kulwa nzita, kubakele na kulwisa nambe kutsiya bakwabo baka-kulemesa Yehova.a

Ano matangwa, baka-kulemesa Yehova batunda “mu mafuti oshe na mu miyati yoshe na mu banu boshe na mu bindaka byoshe.” (Kujo 7:9) Nga banu ba Njambi balwa nzita, co banasa kulwisa nambe kutsiya bakwabo baka-kulemesa Njambi.

2. YEHOVA WASHIKILE BAISALELE BAYE KU NZITA

Kusañulu, Yehova ikeye wakele na kuleka Baisalele bibapandele kulwila nzita na simbu ibanapande kulwa. Cakumwenako, Njambi walekele Baisalele balwise Bakanana mwafwa bakele na kulemesa manene tuponya, kulinga bupangala, na kwana bana babo kupwa mulambu. Yehova washikile Baisalele ngwendi banyongese banu baje bakele na kulinga ebi byuma byabibi mu lifuti lya Kanana kutewa nabo bashangumuka kulinga byuma byabibi. (Levi 18:24, 25) Baisalele mubaketele mu Lifuti lya Cikulaheso, simbu imo Njambi wakele na kubatabesa kulwa binzita mangana balinyungilile ku bitozi babo. (2 Samwe 5:17-25) Oloni Yehova katabesele Baisalele balwe nzita kwa kujeneka kubashika. Omwo bakele na kulwa kwa kujeneka kubashika, kakangi bakele na kubahyana.—Kula 14:41-45; 2 Mizi 35:20-24.

Ano matangwa, Yehova katabesele banu kulwa binzita. Banu bakalu mangana balinge bibatonda keti byatonda Njambi. Banasa kulilwisa mwafwa bashaka kukala na lifuti lyakama nambe bimbongo byabingi nambe mwafwa ya biñanda bya bupolitiki. Batico baje bakendeka ngwabo bali na kulwa mangana banyungilile bulombelo bwabo nambe kutsiya bitozi ba Njambi? Yehova akanyungilila baka-kumulemesa mu busunga na kunyongesa bitozi bendi ha nzita ya Alamagidoni kulutwe. (Kujo 16:14, 16) Tungelo na bakubwabesa bakebo bakalwa omu mu nzita, keti banu baka-kumulemesa.—Kujo 19:11-15.

3. BAISALELE KUBANYONGESELE BANU BAJE BAMWESELE LIKULAHELO KULI YEHOVA

Kusañulu, baisalele kubanyongesele banu baje bamwesele likulahelo kuli yehova, banyongesele lika baje bendekele Yehova ngwendi banapande kutsa. Tusimutwiyeni ha byakumwenako bibali. Nameme Yehova washikile ngwendi Baisalele banyongese nganda ya Jeliko, oloni kubanyongesele Rahabu na naanga yendi mwafwa bamwesele likulahelo. (Yosh 2:9-16; 6:16, 17) Kutundaho, Bangimbiyone boshe bobokele mwafwa basingimikile Njambi.—Yosh 9:3-9, 17-19.

Ano matangwa, baka-mafuti baje bakalu, bakanyongesa na banu baje bakulahela Njambi. Co simbu imo, banu baje kubapwile maswalale bakabanyongesa nga baka-mafuti balilwisa.

4. BAISALELE BAPANDELE KUKABANGEYA MASHIKO AKELE NA KUBANA NJAMBI

Kusañulu, Yehova washakele ngwendi maswalale ba Baisalele bakabangeye mashiko endi omwo baya na kulwa nzita. Cakumwenako, simbu imo Njambi wakele na kuleka Baisalele ngwendi baleke bitozi babo “bibanapande kulinga mangana bakale nabo mu kwoloka.” (Kwitu 20:10) Yehova washakele lalo ngwendi maswalale ba Baisalele bapwe ba kujela ku mubila na kukabangeya mashiko endi. (Kwitu 23:9-14) Maswalale ba mu binganda bya mafuti eka, bakele na kulilala na banakazi babafungulwile, oloni Yehova wabindikile maswalale ba Baisalele kulinga ngoco. Kubapandele kwambata munakazi ibanafungulula kubanga munima ya ngonde imo kutunda habanafungulwila oyo nganda.—Kwitu 21:10-13.

Ano matangwa, kuli mashiko abanapande kukabangeya baka-mafuti nga balilwisa. Nameme awa mashiko banawaka mangana anyungilile banu baje kubapwile maswalale, oloni kubesi kuwakabangeya.

5. NJAMBI WAKELE NA KULWILA BANU BENDI

Kusañulu, Yehova wakele na kulwila Baisalele, co wakele na kulinga bikomokeso mangana bahyane. Cakumwenako, Yehova wakwasele bati Baisalele mangana bahyane Jeliko? Baisalele balingile byabalekele Yehova, co “batambekele manene, ngeci cibumbe calundumukile,” co oku kwabalingisile bafungulule ije nganda. (Yosh 6:20) Bahyanene bati Baamoli? “Shukulu Kalunga wabanyokeselele nyonzi yakama ya mamanya. . . Babangi batsile ku nyonzi ya mamanya kutubakana baje babatsiile Baisalele.”—Yosh 10:6-11.

BAKA-KRISTU BA BUSUNGA BASHAKA KUKALA MU KWOLOKA NA BAKWABO

Ngwe mutunamwena, byuma bituli na kuliwana nabyo ano matangwa, byaliseze nebi bibakele na kuliwana nabyo Baisalele ba kusañulu. Oloni ebi keti bikebyo lika bikatulingisa tujeneke kulwa binzita. Kuli byuma bikwabo bikatulingisa ngoco. Cakumwenako, Njambi wapolofwetele ngwendi mu matangwa a kukotoka bangamba bendi “kubakalibwahesela lalo kulwa nzita embwe,” kulumbununa ngwabo kubakalu nzita. (Isaya 2:2-4) Kutundaho, Kristu walekele bandongesi bendi ngwendi ‘keti baka-kaye,’ kulumbununa ngwabo kubakalikobelesa mu binzita bya mu kaye.—Yiwa 15:19.

Kristu walekele baka-kumukabangeya byuma bikwabo bibapandele kulinga. Wabalekele ngwendi keti balinge byuma bije byasa kubalingisa bakale na nkulundundu, kulubala na kulwa. (Mate 5:21, 22) Co lalo walekele baka-kumukabangeya bakale mu “kwoloka” na kuzema bitozi babo.—Mate 5:9, 44.

Bika bitulilongesako yetu? Tunasa kuliziba ngwetu kutushaka kulwa, oloni kuma kuli munu umo mu cikungulukilo uje itwamona kupwa citozi cetu ndi? Tunapande kulinga mutwasela mwoshe kutundisa bisinganyeka byacifwa eci mu bimbunge byetu.—Jemu 4:1, 11.

Kutwesi kulikobelesa mu binzita bya baka-mafuti, oloni tukeseka mutwasela mwoshe kukala mu kwoloka na bakwetu na kubazema. (Yiwa 13:34, 35) Tutwaleleleniho kujeneka kulikobelesa mu biñanda bya muno mu kaye, omwo tubandamena simbu ije Yehova akamanesa binzita byoshe.—Myaso 46:9.