Mwalibwahesela ‘Kuswana Lifuti-Libu’ Ndi?

TWABANDAMENA kukalimwena mwajwi a Yesu mwakalishulisilila. Wakulahesele ngwendi: “Banabwahelela baje banau mbunge, mwafwa bakaswana lifuti-libu.” (Mate 5:5) Baka-Kristu ba kubwabesa bakaswana kaye omwo bakayula na Yesu mwilu. (Kujo 5:10; 20:6) Baka-Kristu babangi bali na lilabelelo lya kukala hano hasi myaka yoshe mu kwoloka na kubwahelela oku banapu ba kulumbunuka. Nameme ngoco bakakala na bipangi byabingi bya kulinga. Cakumwenako, bakakala na cipangi ca kubwahesa kaye kapwe paradaisi, kukwasa baje bakasanguka na kubalongesa. Acisinganyekeni ha byuma bimwasa kulinga ha simbu ino bije bimwesa ngwabyo mushaka kukalinga ebi bipangi mu kaye kakaha.

MWALIBWAHESELA KUPWISA KAYE PARADAISI NDI?

Yehova mwashikile ngwendi banu ‘batume hano hasi hoshe na kukakala na moko ya kuswanaho,’ wamwesele ngwendi mu kwita kwa simbu kaye kapandele kupwa paradaisi. (Kusha 1:28) Baje bakayoya myaka yoshe hano hasi banapande kukononoka eli lishiko. Kaye kukakapu paradaisi ha kulibanga mwafwa lihya lya Edeni lyaziluka. Munima ya nzita ya Alamagidoni tukakala na cipangi cakama ca kubwahesa mitambela ya kaye ije inabihya. Eci cikapwa cipangi cakama.

Ei ñanda itwanukisa cipangi cibakapangele Baisalele mubatundile mu Mbambilone. Mu lifuti lyabo kumwakele banu ha myaka 70. Oloni Isaya wapolofwetele ngwendi Yehova abakwasa babwahese lifuti lyabo. Wapolofwetele ngwendi: “Nameme lifuti lyabo linapu mambo, njikalipwisa ngwe citungu ca Edeni cije cinjakunine.” (Isaya 51:3) Yehova wakwasele Baisalele babwahese lifuti lyabo. Mu ngila imo lika, Yehova akakwasa baje bakaswana kaye bakakapwise paradaisi. Neni kuli bimo bimwasa kulinga ha simbu ino bije bimwesa ngwabyo mushaka kukalinga eci cipangi.

Cuma cimo cimwasa kulinga cinapu kujelesa na kunyungilila mwamubwa hamwakala. Jeleseni hamwakala nameme banu bamwatunga nabo kubesi kulinga ngoco. Mwasa lalo kukwasa mu kujelesa na kunyungilila Njibo ya Bumwene na Njibo ya Biwano Byakama. Nga kukwesi bimyonowesa, shulisilileni fomu mangana mulyane mu cipangi ca kukwasa baje banaliwana na bukalu bwa kulizila. Nga mulinga ngoco, co mumwesa ngweni mwalyana kukwasa bandolome na bandokazi beni. Mwasa kulilongesa bipangi bimo bimunasa kukalinga mu kaye kakaha, nga Yehova amitabesa kukakalamo.

Cibunga ca bandolome na bandokazi bali na kujelesa Njibo ya Bumwene.

MWALIBWAHESELA KUKAKWASA BAJE BAKASANGUKA NDI?

Muna Jailosi mwasangukile Yesu wendekele ngwendi uje mwanike bamwane byakulya. (Maki 5:42, 43) Hamo kucapwile cipangi cakama kunyunga uje mwanike wa mumbanda wa myaka 12. Oloni acisinganyekeni cipangi cikakalako Yesu mwakashulisilila cikulaheso cendi. Wakulahesele ngwendi: “Boshe bali mu bimbumbo bya canukiso bakaziba lijwi lyendi, co bakatuhukamo.” (Yiwa 5:28, 29) Nameme Mbimbiliya kuyendekele byuma byoshe, oloni twakulahela ngwetu baje bakasanguka bakatonda bukwasi bwa byakulya, kwakulala na bizalo. Lingeniko byuma bimo ha simbu ino bije bimwesa ngwabyo mwalibwahesela kubakwasa. Acisinganyekeni ha byuma binatako bimunasa kulinga.

Bika bimunapande kulinga ha simbu ino mangana mumwese ngweni mwalibwahesela kukaswana lifuti-libu?

Bandolome na bandokazi banabwahelela omwo batambula bangenzi baje banaija ku ciwano ca mafuti mu Paris.

Mwasa kulanya kanyungi wa kuzenguluka ku ca kulya ha simbu yendela cikungulukilo ceni. Nga bandolome na bandokazi baje bali na kupangela ha Mbetele batundaho nambe nga kanyungi wa kuzenguluka bamwecelesa cipangi cendi mwasa kumuwanenako kwa kukala. Nga ciwano ca mutambela nambe ca kulitila bacilingila ku mutambela kumwakala, mwasa kupangako bipangi bimo simbu kanda ciwano cishangumuke na munima nambe kukala ha mutambela wa ciwano mangana mutambule bandolome na bandokazi.

LIBWAHESELENI KULONGESA BAJE BAKASANGUKA

Mukanda wa Bilinga 24:15 umwesa ngwabo banu babangi bakasanguka. Co bwingi bwabo bakapwa baje batsile oku kanda bazibuke Yehova. Oloni mubakasangukaa bakalilongesa byendi. Bangamba ba Njambi ba kulongwa bakebo bakalongesa aba banu. (Isaya 11:9) Ndokazi Charlotte uje nalikuwu kwambwilila mu Europe, South America na mu Africa nashungwiya kukapanga eci cipangi. Akendeka ngwendi: “Njishaka kukalongesa banu babangi baje bakasanguka. Munjikatanda bya munu uje wayoyele kusañulu, kakangi njikasinganyeka ngwange: ‘Ngwe ou munu wazibukile Yehova ngwe yoyesi yendi yapwile yaibwa.’ Njashungwiya kukaleka banu baje bakasanguka bya Yehova nomu mubukafwila buyoye bwabo nga bamupangela.”

Bangamba ba Yehova ba kulongwa baje bayoyele hano hasi simbu kanda Yesu eje nabo kuli byuma byabingi bibanapande kukalilongesa. Acisinganyekeni kubwaha kutukaziba mutukalumbunwina Daniele mubwalishulisilile bupolofweto bwasonekele nameme ikeye kabuzibisisile. (Ndanye 12:8) Nambe mutukaleka Ruthi na Naumi ngwetu umo wa batekulwila babo wapwile Mesiya. Tukabwahelela manene mutukalinga eci cipangi ca kulongesa banu mu kaye koshe kwa kujeneka bishoti na byuma byeka bya kutanganesa bije bituli na kuliwana nabyo muno mu kaye ka Satana.

Ndokazi ali na kwana trakiti munakazi umo mu mulili wa kukushila bizalo.

Bika bimunapande kulinga ha simbu ino mangana mulibwahesele kukalongesa banu bakasanguka? Cuma cimo cimunasa kulinga cinapu kweseka mwoshe mumwasela kubwezelela ku butongwe bweni bwa kulongesa na kupanga na ntwima cipangi ca kwambulula simbu yoshe. (Mate 24:14) Nameme nga kumwasa kupanga byabingi mu cipangi ca kwambulula ha simbu ino mwafwa ya myaka yeni nambe byuma byeka, mwasa kumwesa ngweni mushaka kukalongesa banu baje bakasanguka nga mulingako bimwasa mu cipangi ca kwambulula.

Ngeci, kunapu kwa seho manene kusinganyekesesa ha bihula binatako: Kuma cili bene mushaka kukaswana lifuti-libu ndi? Kuma mwashungwiya kukayoya mu kaye kakaha, kukatambula baje bakasanguka na kukabalongesa ndi? Mumwesa ngweni mwalibwahesela nga mulingako bipangi bimo ha simbu ino bije bilifwa na bipangi bimushungwiya kukalinga mu kaye kakaha.

a Taleni ñanda ya mutwe wa “Longeseni Babangi Kulinga bya Busunga” mu Kaposhi ka Kukengela ka September 2022.