Bihula Bya Baka-kutanda

Mwafwa bika Jozefu na Maliya batwaleleleleho kukala mu Betelehema kutubakana kwiluka kwimbo lyabo ku Nazaleta munima ya kusemuka kwa Yesu?

Mbimbiliya kuyendekeleho. Oloni inendeka byuma bimo bije byasele kubalingisa batwaleleleho kukala mu Betelehema.

Kangelo walekele Maliya ngwendi akala na cikute, co akakala na mwana. Kangelo mwetesele ou muzimbu, Maliya na Jozefu bakele na kukala mu mbongi ya Nazaleta mu Galileya muje mwapwile mwimbo lya Jozefu. (Luka 1:26-31; 2:4) Mu kwita kwa simbu mubelukile kutunda mu Ijipiti, bakakele lalo mu Nazaleta. Yesu wakolelele mu Nazaleta, co wapwile muka-Nazaleta. (Mate 2:19-23) Ngeci, boshe mu butatu bwabo, Yesu, Jozefu, na Maliya bapwile baka-Nazaleta.

Maliya wakele na kabushoko wa lizina lya Elizabethi uje wayoyele mu Juda. Elizabethi wapwile munakazi wa Zakaliya uje wapwile kapilistu, co ikeye wapwile ina ya Iwano Muka-kumbwitika. (Luka 1:5, 9, 13, 36) Maliya wendelele Elizabethi, co wakakele nendi bingonde bitatu mu Juda. Kutundaho, Maliya welukilile ku Nazaleta. (Luka 1:39, 40, 56) Ngeci, twasa kwendeka ngwetu Maliya wazibukile mwamubwa mutambela wa Juda.

Mu kwita kwa simbu Jozefu wononokele lishiko lya “kulisonekesa.” Ngeci, Jozefu watundile mu Nazaleta kuya ku Betelehema, ije yapwile “nganda ya Devidi.” Co ei nganda ikeyo ibendekele mu bupolofweto ngwabo mukemwo mwakasemukila Mesiya. (Luka 2:3, 4; 1 Samwe 17:15; 20:6; Mika 5:2) Maliya mwatundile ha kupapa Yesu, Jozefu kabandamenene ngwendi Maliya enda bungenzi bwabulaha bwa kwilukila ku Nazaleta na mbututu wamundondo. Bakele mu Betelehema ije yapwile makilomita 9 kutunda ku Jelusalema. Oku kwalingisile kubapwile kwakwasi kutwala mbututu yabo ku tempele mangana bakane mulambu.—Levi 12:2, 6-8; Luka 2:22-24.

Kangelo ka Njambi walekele Maliya ngwendi munendi akaswana ha ‘litanda lya Devidi,’ co “akapwa Mwene.” Yesu mwasemukilile mu nganda mwasemukilile Devidi, kuma Jozefu na Maliya bamwene ngwabo eci capwile cuma ca seho ndi? (Luka 1:32, 33; 2:11, 17) Hamo basinganyekele ngwabo bapandele kukala bene muje mu nganda na kubandamena kuziba byuma byabaleka Njambi.

Kutuzibuka simbu ibakele mu Betelehema kweta noho ababawanenene baka-kutahesa bingongonosi. Ha simbu oyo ei naanga yakele mu njibo, co munabo kapwile mbututu wamundondo, te nakoloko. (Mate 2:11) Cisholoka ngwe ei naanga kuyelukile bwasi ku Nazaleta. Co yatwaleleleleho kukala mu Betelehema.

Heloda washikile ngwendi batsiye “banike ba banalume boshe ba mu Betelehema . . . baje bakele na myaka ibali na kwiluka mwisi.” (Mate 2:16) Kangelo walekele Jozefu bibapandele kulinga mwafwa you mutambi, co Jozefu na Maliya batewelele ku Ijipiti hamolika na Yesu, co bakakeleko kweta noho hatsililile Heloda. Mu kwita kwa simbu, Jozefu waile na naanga yendi ku Nazaleta. Mwafwa bika kubelukile ku Betelehema? Mwafwa ha simbu oyo, Akelausi muna Heloda uje wapwile wa kukaluwa mbunge ikeye wakele na kuyula mu Judeya. Co lalo Jozefu washakele kwononoka cinangulo ca Njambi. Mu Nazaleta, Jozefu wasele kulela mwamubwa Yesu na kumukwasa alemese mwamubwa Njambi.—Mate 2:19-22; 13:55; Luka 2:39, 52.

Cisholoka ngwe Jozefu watsile simbu kanda Yesu atse na kushokolwela banu ngila ya kuya mwilu. Ngeci, Jozefu akasanguka na kukala hano hasi. Banu babangi bakamumona, co bakalilongesa byabingi kuli ikeye, bije byalingisile ikeye na Maliya batwaleleleho kukala mu Betelehema munima ya kusemuka kwa Yesu.