DILONGI 49
Mambu ma u fe hanga mumwila dibuda dienu di kadi mu gieshi—Gidjini 1
Hadu o agaduga gugwelana, a guyindulanga mbi gieshi gio giefa mu gilumbu giowu gi magwela, mu gigalaba gukala mvula yi mvula. Ee gu le hangamana. Akristu o agagwelana yandjiga tunda kega o aguhanganga yigesa yiguhangila mandongishila ma Bible, ma gwishiyanga mbi gu le hangamana.
1. Mandongishila meki Bible di guhwanga amala?
Yehowa u gahwa yala giyega gi gukala fumu u dibuda. (Danga Baefezo 5:23.) Yehowa a guzolanga mbi, yala a sendji maluganu mo m’aneyila dibuda di kima mapimbu. Bible di nalongishila amala mbi: “Labenu guzola agashi enu.” (Baefezo 5:25) Gunadendula yigi? Yala yo u guzolanga mugashi wendji a gumuhangilanga mambu mu mawete, gukadi ena owu mbadi gunzu to a mesu ma hadu. A gudaninanga mugashi wendji, a gumusadisanga mu gukala mu gieshi kega a gumuhwanga yima yo yena yoyi funu. (1 Timoteo 5:8) Gima gi guhida funu giena mbi, a gusadisanga mugashi wendji mu gukala yi gindugu gi pimbu yi Yehowa. (Matayo 4:4) Mumbandu, ma gusambanga kega ma gudanganga Bible yi mugashi wendji. Yala a galaba gudanina gindugu giendji yi Yehowa mbi, ma nalungisa manzala ma mugashi wendji mu zola di kima.—Danga 1 Piere 3:7.
2. Mandongishila meki Bible di guhwanga agonusa?
Ndaga yi Nzambi yi bahosa mbi mugonusa a “fwe kala yi lujidu lwingi gibeni mumwila yi mulumi wendji.” (Baefezo 5:33) Pila yigi a le lesa mbi ma gujidjisanga mulumi wendji? A le lesa lujidu beni mbi ma nayindula yigalulu yi pimbu yi mulumi wendji kega yigesa yo mulumi wendji a guhanganga, mu gulungisa manzala mendji kega gusasa anowu. Mugonusa a gulesanga kega mbi ma gujidjisanga mulumi wendji, mbi ma nahana miogu mu maluganu mo mulumi wendji a nasenda, mbi ma nasolula yi mulumi wendji mu mawete kega mbi ma nahosa mambu ma pimbu mumwila yi mulumi wendji ada mulumi wendji lō ena Mbangi u Yehowa.
3. Yala yi mugonusa a fwe hanga yigi mu gugumisa magwela mowu ngolu?
Bible di guhosanga mbi, mbi yala yi mugonusa magwelana: “Owu mbadi a gaguma musuni u moshi.” (Matayo 19:5) Gunadendula mbi a fe duna mambu makima mo ma le hanga mbi akondji zolana kega ngolu. Hohana, a fedji hidjisanga dangu mbala yi mbala owu mbadi, a fe solulanga mu masonga kega mu zola pila y’anadifa. Lō a fe gwega mbi gima gimoshi to mudu mumoshi, a gumi funu yingi guhida mudu mumoshi mu gadji diowu—gadula gaga Yehowa—Lō a fe gandamana ngolu yi mudu mwega mu pila yi mbi.
WISHIYA KEGA MAMBU MENGI
Dudadi pila yiki guhangila mishigu mi Bible gu le gumisa magwela menu ngolu.
4. Amala—zolenu kega lungisenu manzala m’agashi enu
Bible di nahosa mbi “amala a fwe zola agashi owu nga mwila wawu beni.” (Baefezo 5:28, 29) Gunadendula yigi? Dalenu VIDEYO, gudima hanenu mvudu mu muwu’a wu:
Danga ndambu yimambu mo yala a fe hanga mu gulesa mbi ma guzolanga mugashi wendji kega ma gulungisanga manzala mendji?
Dangenu Bakolosai 3:12, gudima hanenu mvudu mu muwu’a wu:
Pila yiki yala a le lesa yigalulu yi, mu magwela mendji?
5. Agonusa—zolenu kega jidjisenu alumi enu
Bible di gulombanga mugonusa mu gujidjisa mulumi wendji, gukadi mulumi beni a gusambilanga Yehowa to lō. Dangenu 1 Piere 3:1, 2, gudima hanenu mamvudu mu miwu mi:
Mbi mulumi weyi lō a gusambilanga Yehowa, gugigidi u guzolanga mbi a gumi gusambila kega Yehowa. U nayindula mbi, yigi yihida pimbu—gumulonga sangu ji pimbu mbala yi mbala to gumulesa yigalulu yi pimbu yi lujidu? Mumwilegi?
Yala yi mugonusa a le senda maluganu mapimbu o mbadi. Gashi madangu mega, mugonusa u le konda sepela yi luganu’alo lusenda mulumi wendji. Ada gio, a fe hosa mambu mo m’anayindula mu mawete kega mu lujidu lukima. Gashi lō a fe bila mbi, Yehowa u gahwa yala giyega gi gusenda maluganu mumwila yi mapimbu ma dibuda. Mugonusa a fe hanga yigesa yingolu mumwila mu guhana miogu mu maluganu mo mulumi wendji a senda. Mbi mugonusa ma hanga gio, dibuda diowu di gajinga mu gieshi. Dangenu 1 Piere 3:3-5, gudima hanenu mvudu mu muwu’a wu:
Mbi mugonusa ma najidjisa mulumi wendji Yehowa a gwifanga pila yiki?
6. Yidigenu mambu ma pashi mo ma naduga mu magwela menu
Mu magwela mambu ma pashi lō ma gugondanga. Hohana, yala yi mugonusa a fwe hanga yigesa yingolu mumwila o mbadi ayidigi mambu ma pashi mo, ma le duga mu magwela mowu. Dalenu VIDEYO, gudima hanenu mamvudu mu miwu mi:
Mu videyo di, yigi yina lesa mbi zola di yala yu yi mugashi wendji mu di gayandjigidi guhwa?
A gahangidi yigi mu gugumisa magwela mowu ngolu?
Dangenu 1 Bakorinto 10:24 yi Bakolosai 3:13. Gudima di gudanga kosu verse, hanenu mvudu mu muwu’a wu:
Pila yiki guhangila ndongishila yi, gu le gumisa magwela ngolu?
Bible di nahosa mbi du fe hanagana lugumu. Guhwa mudu lugumu gu nadendula kega gumuhangila mambu mu mawete yi lujidu. Dangenu Baroma 12:10, gudima hanenu mamvudu mu miwu mi:
Yala to mugonusa a fe mena mbi kwelani wendji ayandjigi tegu gu muhwa lugumu? Mbi gwena gio to lowu, mumwilegi?
HADU EGA ENI GUHOSA MBI: “Ami yi kwelani wami, lō du guzolananga kega gi du gazolananga tegu.”
Pila yiki u le gu’asadisa mu gubagisa mbi Bible di le gu’asadisa?
MU KUFI
Yala yi mugonusa a gujinganga mu gieshi mbi ma nazolagana, ma najidjisagana kega mbi ma nahangila mishigu mi Bible.
Mvudugilu
Yala a fwe hanga yigi mumwila magwela mowu makadi mu gieshi?
Mugonusa a fwe hanga yigi mumwila magwela mowu makadi mu gieshi?
Mbi u gagwela, mushigu wigi u Bible u le gugusadisa mu gugumisa magwela menu ngolu?
DALA KEGA
Dala mambu ma le gugusadisa mu gujinga mu gieshi mu dibuda.
Dala mugunga u videyo wo u ba lesa malusagumunu ma nu le senda, mbi mu nu ba hangila mandongishila ma Bible mu magwela menu.
Dala mbi gulemfuga mu giyega gi mulumi wayi gunadendula yigi.
“Agonusa, mumwilegi gulemfuga mu giyega?” (Nzozulu ya Nkengi 15/5/2010)
Dala pila guhangila mandongishila ma Bible ma le sadisa gibeni magwela menu.