Gugigidi manu mu magafwa?
Mvudu yi Bible
Lowu, manu lō magafwa ada ki, lō ma galungula kega gu tuya kega lō a gamayingisa mu manu mega. Bible dinalonga mbi Nzambi a gahangidi manu mumwila hadu a jingi mvula yi mvula a wulu di mowu.
“Hadu a lunungu ma gasenda manu, kega ma gajinga mu gieshi mvula yi mvula a wulu di mowu.”—Nkunga 37:29.
“[Nzambi] u ga zangulusa manu mu ma gundji momu; lō ma gagaduga mu gihani giomu mvula yi mvula.”—Nkunga 104:5.
“Manu mu meni gusala mvula yi mvula.”—Longi 1:4.
“Mudu yo u gayidigidi manu, mudu yo u gamahangidi, ayo u gamashidi ngolu. . . lō a gamagangidi gugonda giguma, gashi a gamahangidi mumwila hadu a jingi.”—Yezaya 45:18.
Gu gigidi Hadu m’a gabebisa manu?
Nzambi lō a gega mbi hadu a bebishi gibeni manu mu mbuga yi gubebisa muhunga, mu mbuga yi yidumba to mu mambu meka amo m’eniguhanga. Gashi, ma “gabebisa (gujiya) hadu’o eni gubebisa manu.” (Kusonga 11:18) Pila yiki a gayihanga?
Nzambi ma gagadula yifumu yi hadu, ayo yina gonda gu guga gudanina manu kega ma gasa Gifumu gimoshi gi pimbu gi guwulu. (Daniele 2:44; Matayo 6:9, 10) Munendji Yezu-Kristu wena Fumu u gifumu gio (Yezaya 9:6, 7) Dangu di’a gakedi a wulu di manu, Yezu ma gahangididi ngolu ji guyiduga jo ji gamuhwedi Nzambi mumwila mu guyala lugangu. (Marko 4:35-41) Mumwila ena Fumu u Gifumu gi Nzambi, Yezu ma gakala yi giyega gingi a wulu di manu kega a wulu di yima yikima ayo yena awulu di mowu. Ma gaganga kega to gugumisa manu gihani gi pa, gaga pila yi magakedi tegu mu gilanga gi Edeni.—Matayo 19:28; Luka 23:43.
Bible mu dieni gulonga mbi manu mu ma galungula gu tuya?
Lowu, lō dieni gulonga pil’ayo. Hadu meni guguma yi ma ngindu ma, ma luvunu mumwila lō eni gubagisa pimbu mambu mo mena mu 2 Piere 3:7, adio dinahosa mbi: “Wulu yi manu ma dangu di amaswega mumwila mu guma jiya gu tuya.” Du dadidi mambu madi ma funu a mo m’a dusadisa mu gwishina tendula di verse di :
Bible dieni guhangila mangogu “wulu,” “manu,” kega “tuya” mumwila mu guhoshila mambu mengi. Mumbandu, Kuyantika 11:1 dinahosa mbi : “Manu makima mu ma gahosanga gaga ndaga yi moshi.” Mu verse di, ngogu “manu” gu na dendula hadu.
Ma verse mo mena gutwala yi gudima di 2 Piere 3:7 mu mana dendula pimbu mangogu wulu, manu yi tuya, amo mana hoshila Bible mu verse 7. Verse 5 yi 6 mu dina fwanigisa mambu ma yi mvula yi ngolu yi yilumbu yi Nowa. Mu dangu dio, gifudji gi dangu ditunda mu gigafidi, gashi, manu lō ma gafidi. Mvula yi ngolu mu yigajidi manu gisongidila “hadu” akima a mubulu. (Kuyantika 6:11) Mu yigajidi kega “wulu”—gisongidila hadu’o a gayalanga manu mudangu dio. Gu gigidi, hadu a mbi ma gafidi gashi manu lō ma gafidi. Nowa yi dibuda diendji ma ga gulugidi dangu di a jidi gifudji gi dangu dio kega ma galabidi gujinga a wlu di manu gudima di Mvula yi ngolu.—Kuyantika 8:15-18.
Pila mema ma Mvula yi ngolu ma gajidi hadu, pila yi moshi kega “tuya,” ado duna hoshila 2 Piere 3:7 mu du gajiya hadu a mbi gashi lō du gajiya manu. Nzambi ana shila “wulu di pa yi manu ma pa” ago lunungu mu lugakala.” (2 Piere 3:13) Wulu “di pa,” to Gifumu gi pa,—gisongidila Gifumu gi Nzambi mu gigayala “manu ma pa”, a mo ma nadendula gimvuga gi moshi gi pa gi hadu. Dangu Gifumu gieni gi gabanda guyala, manu mu ma gaguma paladisu gihani gimoshi gi ngemba.—Kusonga 21:1-4.