Yala mumoshi yo u nanwana yi ngindu ji gudijiya

Yiba zola gufwa—Bible di le gusadisa ami mbi yena yi ma ngindu ma gudijiya?

Mvudu yi Bible

Giogiogi! Bible diena muganda wo u gaduga gwena “Nzambi, awo weni gusadisa hadu’o ena a guhelwa.” (2 Bakorinto 7:6) Ada Bible lō wena muganda wo weni guhoshila pila yi gusasa makashi ma mudu, di gasadisa hadu engi’o a gakedi yi ngindu ji gudijiya. Mandongishila momu, ma lenda gugusadisa kega.

Bible di guhananga mandongishila megi?

● Hosa pila yi unadifa.

Mambu mo manahosa Bible: “Ndugu u giediga a guzolanga dangu dikima, kega ena pangi yo u gabuduga mumwila yi madangu ma pashi.”—Bingana 17:17.

Tendula: Mu dweni gukala yi funu yi lusadisu lu apangi ega, mbi mu dunadiyangisa mu mabanza.

Mbi lō dunalesa hadu ega pilayi du nadifa, mangindu medu mambi ma le gu dugumisa gisaga-saga. Gashi mbi mu nadela hadu ega pila yi u nadifa, mu wa yandjiga gudifa pimbu kega mu wa guma gudadila mambu mu pila yi pimbu.

Mambu ma u le hanga: Solula yi mudu mumoshi yandjiga mwaniowu, gukadi pangi u dibuda to pangi yo u weni gushila mudjima.a U le gusoniga kega pila yi u nadifa.
● Gamba lusadisu gwena aminganga.

Mambu mo ma nahosa Bible: “Hadu’o ena yi sante di pimbu lō a gukalanga yi funu yi munganga, gashi hadu’o a nayinza a gukalanga yi funu yendji.”—Matayo 9:12.

Tendula: Du fedji gugamba lusadisu lu aminganga mbi mu dunayinza.

Mangindu ma gudijiya mena yidimbu yo yina lesa kega mbi mudu mana zola guyinza makashi ma mudu. Lō dufe gwifa ufudu mumwila mena gaga nga makashi mo meni gudugama mumwila. Makashi ma mudu a le gumasasa gwena aminganga.

Mambu ma u le hanga: Mbi muweshiya mbi wena yi makashi ma mudu, gamba lusadisu swalu gwena aminganga pila mbi yena.
● Lō gubila mbi Nzambi meni gudiyangigisa mumwila yi ayi.

Mambu mo ma nahosa Bible: “Meni gwadiga dundjila du danu mu mbongu jadi ji yibende jo jena yi funu ndambu, agio lō? Gashi Nzambi lō eni gubila ada ga moshi mu gadji dodu. . . . Lō gwifenu woma; nwena yi funu yingi guhida dundjila dwingi.”—Luka 12:6, 7.

Tendula: Wena funu yingi gumesu ma Nzambi.

U le gudala mbi ada mudu lō a nagushila digebi, gashi Nzambi ma gudalanga pashi ji u guwanagananga joji. Nzambi ma gudiyangigisanga mumwila yi ayi —ada lō weni gwifa kega nzala yi lujingu. “Nkunga 51:17 dina hosa mbi: Mudjima awo wena niogama kega awo wena mu kenda, O Nzambi, lō wa yiduna.” Nzambi a nazola mbi ukadi mu lujingu mumwila ma guguzolanga.

Mambu ma u le hanga: Dadila mu Bible mambu mo mana lesa mbi Nzambi ma guguzolanga. Mumbandu, dala kapu 24 di muganda Kwenda Pene-Pene na Yehowa.
● Samba Nzambi.

Mambu mo ma nahosa Bible: “Wumba masusi mayi makima gwena [Nzambi], mumwila ye ma gudiyangigisanga mumwila yi enu.”—1 Piere 5:7.

Tendula: Nzambi a nazola mbi u muleshi mu masonga makima pila yi u nadifa kega mambu makima mo mena guyangisa.

Nzambi u le guguhwa mbala yimoshi ngemba ji mabanza kega ngolu ji gulaba guganda mudjima. (Bafilipi 4:6, 7, 13) Kega meni gusadisa hadu’o eni gumusamba mumwila yi lusadisu—Nkunga 55:22.

Mambu ma u le hanga: Samba Nzambi mwaniowu. Hangila jina diendji Yehowa kega mwambidi pila yi u nadifa. (Nkunga 83:18) Mu lombi mu gugusadisa mumwila u gandji mudjima.
● Yindula yivuvu yi Bible mumwila yi yilumbu yi nagwisa.

Mambu mo ma nahosa Bible: “Dwena yi givuvu gi nga longo, mumwila yi lujingu lwedu, giena gi gigidi kega gi ngolu.”—Baebreo 6:19, noti gu mashina ma gasa.

Tendula: Pila yi u nadifa gu le gusoba gaga nga pila muhunga weni guneta maswa ndanbu yi ndambu, gashi givuvu gio giena mu Bible, gi le gugusadisa mu gudifa pimbu.

Givuvu agi gi Bible, lō giena nga ndoshi gashi gi gandamana mu lushilu alo lugaduhwa Nzambi lu gugadula mambu makima ma pashi. —Kusonga 21:4.

Mambu ma u le hanga: Longuga mambu mengi mo ma dadila givuvu agio giena mu Bible mu gamuganda Nsangu ya Mbote ya Mekatuka na Nzambi! Mu dilongi 5
● Hanga gima gimoshi gio gi weni guzola.

Mambu mo ma nahosa Bible: “Mudjima wu gieshi wena mwemu wu pimbu.”—Bingana 17:22.

Tendula: Mbi mu nahanga mambu mo meni guguhwa gieshi, gu le gu gusadisa mu gukala yi manunga ma pimbu to sante di pimbu.

Mambu ma u le hanga: Hanga gima gimoshi gio gieni gu guhwa gibeni gieshi. Mumbandu, guwidigila mijigi mi pimbu, gudanga miganda amio mi nahana gigesa to guhanga gima gimoshi mumwila mu guhidjisa dangu. U le guma yi gieshi gingi mbi mu nahanga gima gimoshi mumwila mu gusadisa hadu’ega, gukadi mu mambu madjigi-djigi. —Bisalu 20:35.
● Danina sante diayi.

Mambu mo ma nahosa Bible: “Mumwila ngalasisi yi mwila yena funu.”—1 Timoteo 4:8.

Tendula: Sante diedu di’akala pimbu mbi mu dunahanga ma ngalasisi, mbi mu dunabida pimbu kega mbi mu dunadia madia amo meni gudunga mwila.

Mambu ma u le hanga: Senda tshina, ada mu minuda 15 buna.
● Lō gubila mbi pila yi u nadifa kega mambu mega ma le gusoba mu lujingu.

Mambu mo ma nahosa Bible: “Lō nu nagwishiya pila yiki lujingu lwenu lugakala gikela.”—Yakobo 4:14.

Tendula: Pandji jo ji na guyangigisa—ada jo ji u nagonda gwishiya gima gi gihanga—ji le guhwa gudima di dangu ndambu.

Ada lujingu lwayi lwena pashi mwaniowu, lu le gusoba gikela. Hohana gamba pila yi gu yigandjila mudjima. (2 Bakorinto 4:8) Mbala jega pandji jo ji naguhwa pashi ji le guhwa gudima di mwa dangu, gashi mbi mu dijiya, lō w’ahonguluga kega.

Mambu ma u le hanga: Danga masolu ma Bible ma hadu’o a gahelwidi mwila kega hadu’o a gagambidi gudijiya, dala kega pila yiki lujingu lowu lugagumini gibeni pimbu—kutu mu pil’ayo y’aga gondjidi guyindula. Du dadidi ndambu yi jimbandu.

Gu gigidi Bible mu dieni guhoshila hadu’o agambanga gudijiya?

Giogiogi. Bible mu dieni guhoshila hadu ega awo a “gagambidi gudijiya.” Nzambi lō a g’anganinini, gashi ma g’asadishidi. U le guhanga kega pila yi moshi mumwila yi ayi.

Eliya

● Na a gakedi? Eliya a gakedi profete u gigesa gashi madangu mega, ma gahelwidi mwila. Yakobo 5:17 di nahosa mbi “Eliya a gakedi mudu yi mawi nga medu.”
● Mumwilegi a gagambanga gudijiya? Mu dangu dimoshi gigi, Eliya ma gadifidi ye beni, ma gefidi woma, kega ma gadidadidi gugonda funu. Hohana ma gahoshidi mbi: “Yehowa, ndjiyi.”—1 Bantotila 19:4.
● Yigi yi gamusadishidi? Eliya ma galeshidi Nzambi pimbu-pimbu pila y’agadifanga. Pila yiki Nzambi a gamuhwedi gigesa? Nzambi ma gamuleshidi mbi ma gudiyangigisanga mumwila yi ye. Kega ma gamuleshidi mbi wena yi ngolu ji gumusadisa. Ma galeshidi kega Eliya mbi ena gaga yi funu yingi. Kega ma gahwedi Eliya ndugu mumoshi mupimbu ayo u fwana ayo u gamushilanga digebi.
▸ Danga mambu mo ma gaguminini Eliya: 1 Bantotila 19:2-18.

Yobi

● Na a gakedi? Yobi a gakedi mvwama kega yi dibuda di neni kega a gasambilanga Nzambi u gigidi mu gwigama gukima.
● Mumwilegi a gagambanga gudijiya? Yobi a gawanaganini yi mambu mengi mambi mu mbala yi moshi. Ma gabidishidi yima yendji yikima. An’endji akima ma gafidi mu gisumbula. Kega, ma gayindjidi makashi mamoshi mambi. Hadu ma gahosanga mambu mambi mumwila yi ye kega ma gamufudjigilanga mbi ye beni wena mu gishina gi mapashi mendji. Yobi ma gahoshidi mbi: “Mi namenga lujingu lwami; lō yina zola gulaba gujinga.”—Yobi 7:16.
● Yigi yi gamusadishidi? Yobi ma gasambidi Nzamb kega ma galeshidi hadu ega mapashi mendji. (Yobi 10:1-3) Ndugu’endji Elihu ma gamusadishidi mu gusenda gigesa. Kega Yobi a gakedi mugieshi mu gugumbula ma ndongishila yi lusadisu lu Yehowa.
▸ Danga mambu mo magaguminini Yobi: Yobi 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moize

● Na a gakedi? Moize a gakedi twadishi u Izrael di tunda kega profete u gwigama.
● Mumwilegi a gagambanga gudijiya? Moize a gakedi yi mikumba mingi mi neni, hadu ma gahosanga mambu mambi mumwila yi yendji, kega ma gahelwidi mwila. Hohana ma galeshidi Nzambi mbi: “Pardo ndjiyi gaga dangu di.”—Kutanga 11:11, 15.
● Yigi yi gamusadishidi? Moize ma galeshidi Nzambi pila y’agadifanga. Nzambi ma gasadishidi Moize mu gugapula gisalu giendji yi hadu ega mumwila a gondji gudiyangigisa kega ngolu.
▸ Danga mambu mo ma gaguminini Moize: Kutanga 11:4-6, 10-17.

Maverse meki ma Bible ma lenda gu gusadisa mbi wena yi ngindu ji gudijiya?

Maverse mo manalesa mbi, Nzambi ma gugushilanga digebi:

“Yehowa ena heyi-heyi yi hadu’o ena mu kenda; meni gugulusa hadu’o eni gunioguga mu mabanza.”—Nkunga 34:18.
“Dangu masusi ma gapidaganini, m’ugapedi gigesa kega m’ugandembigidi.”—Nkunga 94:19.

(Dala kega Nkunga 27:10; 103:12-14; 2 Bakorinto 1:3, 4.)

Maverse mo manalesa mbi Nzambi ma gubagisanga pashi jayi:

“U dadidi pashi jami; weshinini pashi jami ji ngolu.”—Nkunga 31:7.
“Mu dangu dikima dio di’agadalanga pashi, mu gugamuhwanga kega pashi. . . . Mu zola diendji yi kenda jendji. . . , ma g’azangudidi.”—Yezaya 63:9.

Maverse mo manalesa mbi Nzambi ana zola mbi wendji heyi-heyi yi yendji kega u mugangudidi mudjima mu gisambu:

“Lō gudiyangisenu mumwila yi kosu gima gio, gashi mu mambu makima mu mbuga yi gisambu. . . Zabisenu Nzambi mambu ma nuna lomba; kega ngemba ji Nzambi jo ji hida mayela makima ma gubagisa mambu mu j’adanina midjima mienu kega mabanza menu mu mbuga yi Kristu Yezu.”—Bafilipi 4:6, 7.
“Ndenu heyi-heyi yi Nzambi, ebuna ye ma gesa heyi-heyi yi enu.”—Yakobo 4:8.

(Dala kega Nkunga 34:4, 15; 55:22.)

Maverse mo manalesa mbi Nzambi m’aguhwa ngolu:

“Mu mambu makima, yena senda ngolu mu mbuga yi mudu yo u gupanga ngolu.”—Bafilipi 4:13.
“Lō gwifa woma, mumwila ami yena yi ayi. Lō gudi yangisa, mumwila ami yena Nzambi wayi. M’igaguhwa gigesa, ee, m’igagusadisa.”—Yezaya 41:10.

(Dala kega Nkunga 138:3; Yezaya 40:29-31.)

Yigi w’ahanga mbi ndugu wayi mumoshi u gulesa mbi, “ma nazola gudijiya”?

Mbi ndugu mumoshi u gulesa mbi ma nazola gudijiya lō guyisenda mu nsaga. Shamisa ndugu wayi mu guhosa; muhwi gigesa a hoshi pila y’anadifa. (Bingana 20:5) Mbi mudu ma nahoshila ngindu jendji ji gudijiya jo j’akwedji, gu le gumusadisa mu gugonda gudijiya kega.
widigila yi digebi dikima. “Wifa swalu, lō gunwanina mu gwagula.” (Yakobo 1:19) U fe gwishina mbi, mbi mudu mana wanagana yi jipashi to ma naniogugua mu mabanza, gu le gumupusa mu “gwagula mambu ma pamba-pamba.” (Yobi 6:2, 3) Hohana, mbi ndugu mumoshi m’agula ngogu gugonda guyindula to mambu ma pamba-pamba, lō gwifa kabu kega lō gumuhongulushila mbi.
Wagula mu pila yo yi balembiga. Bible di na dulongishila mbi: “hoshilenu hadu’o ena mu kenda mu pila yo yi balembiga.” (1 Batesalonika 5:14) Lō gudala pamba pila ndugu wayi a na difa jidjisa mawi mendji kega yiguma yo yi na mupusa mu gudifa pila yo. Lesa ndugu wayi mbi ena gibeni funu gu mesu mayi.
Lesa ndugu wayi mu gugamba lusadisu. Bingana 13:10 dinahosa mbi “Mayela mena gwena hadu’o eni gugamba mandongishila.” Mbi ndugu wayi ma gayindjidi makashi ma ngolu, muleshi mugwenda gwena doctere. Ngindu ji gudijiya ji le gwishila mudu mbi ma nayinza makashi ma mudu to ma nadiyangisa mu mabanza. Hohana, muleshi mu gwe gudala munganga yo weni gusasa makashi beni. Kutu u le gwe gumusuwa gwena doctere.
Lesa mbi mu weni guzola ndugu wayi. Bible di nahosa mbi: “Ndugu u giediga a guzolanga dangu dikima, kega ena pangi yo u gabuduga mumwila yi madangu ma pashi.” (Bingana 17:17) Lō u le hanga mbi ndugu wayi a bidi pandji to ngindu jendji ji gudijiya. Gashi mbi mu mugumbudisa mbi muweni gumuzola, kega mbi wena yi funu yi gu musadisa—muwa mu sadisa mu gugadula mangindu mendji ma gudijiya. Kega u le gudifa pimbu.

Yigi yi le guhanga mbi m’igagambanga gudijiya mafugu mahida?

Gu gigidi, u le gwifa ufudu to gudifa nga mudu u bwisa pandji. U le guyindula kega mbi ada mudu lō ana bagisa pandji jo ji nahanga mbi u gumi yi nzala yi gudijiya to mambu mo ma naguhwa pashi mudangu dio.

Bible di nahosa mbi gwena pashi mu gubagisa pimbu-pimbu pila hadu ega a nadifa. Di nahosa kega mbi: “Gaga mudjima weni gwishiya pashi joji.” (Bingana 14:10; 1 Bantotila 8:38) Hohana, ada hadu’o eni guguzola a le guguhwa gigesa, a le gukala yi mandjilu. Ada gio, wishina mbi, lō wena ayi beni.

Nzambi meni gwishina mudjima u mudu. (2 Bansangu 6:30) Yehowa ma nagwishiya mambu mo ma nagupusa mu guyindula mbi, mbi m’udijiya mu wadigadula mu pashi ji ukwedji. Mana gwishiya kega pila yi u nadifa mudangu di. Pila yi du yihoshila gadi, ma nagwishiya gi u le gwifa ufudu to gudifa nga mudu u bwisa pandji—Nkunga 139:1.

Ada Nzambi ma gusendanga lujingu mu mbalu, meni gulolula hadu’o a gakedi yi ngindu ji gudijiya. (Nkunga 86:5) Meni gwishiya mbi hadu engi’o a gambanga gudijiya lō eni guzola gufwa—ma gazolanga gaga gusugisa pashi jowu. Hohana Yehowa u le gudusadisa, ada ‘mudjima wayi mu w’unagubedisa. . . , mumwila Nzambi ena muneni guhida mudjima wayi kega ma gwishiyanga mambu makima.’ (1 Yoane 3:19, 20) Gumbula mbi, Mumwila yi ayi, Yehowa ma nazola gukala “Dada u kenda jingi kega Nzambi yo weni gulembiga hadu akima.”—2 Bakorinto 1:3.

a Mbi ngindu jayi ji gudijiya jena jingi kega hadu’o a weni gushila mudjima lō ena, lendjiga nimero di hadu’o a le gwisa mumwila mu gugusadisa.

Yiba zola gufwa—Bible di le gusadisa ami mbi yena yi ma ngindu ma gudijiya?

Mvudu yi Bible

Bible di guhananga mandongishila megi?

● Hosa pila yi unadifa.

● Gamba lusadisu gwena aminganga.

● Lō gubila mbi Nzambi meni gudiyangigisa mumwila yi ayi.

● Samba Nzambi.

● Yindula yivuvu yi Bible mumwila yi yilumbu yi nagwisa.

● Hanga gima gimoshi gio gi weni guzola.

● Danina sante diayi.

● Lō gubila mbi pila yi u nadifa kega mambu mega ma le gusoba mu lujingu.

Gu gigidi Bible mu dieni guhoshila hadu’o agambanga gudijiya?

Eliya

Yobi

Moize