DILONGI 24

Awandjo ena anani kega gisalu gigi a guhanganga?

W'adusa mu Papie

Yehowa a guzolanga mbi dwishiyi dibuda diendji dio diena gu wulu. Dibuda dieni diena yi awandjo, o Bible di gu’alendjiganga mbi “ana’a Nzambi.” (Yobi 38:7) Bible di guhosanga yigi mumwila yi awandjo? Yigi a guhanganga mumwila yi hadu? Awandjo a kima a gukalanga mu dibuda di Nzambi?

1. Awandjo ena anani?

Yehowa a gahangidi tegu awandjo gu twala yi guhanga manu. Nga Yehowa, awandjo a gujinganga gu wulu kega lō du le gu’adala. (Baebreo 1:14) Awandjo ena engi, kega ow’akima lō ena gidesu gi moshi. (Kusonga 5:11) Ma “gujidjisanga ndaga yi [Yehowa] kega ma gulemfuganga mu ndaga yendji.” (Nkunga 103:20) Mu dangu di tunda, Yehowa ma gadumanga awandjo ma dangu mega mumwila mu gwe lesa asadi endji sangu djendji, mumwila mu gu’asadisa kega gu’agulusa. Mwaniowu, awandjo ma gudwadisanga Alongogi a Yezu gwena hadu o aguzolanga gulonguga mambu ma Nzambi.

2. Sadana yi ademo endji ena a nani?

Awandjo ega ma gagolamanini gwena Yehowa. Wandjo u tegu yo u gagolamanini ena “ayo w’agulendjiganga Diabulu kega Sadana, ayo u gufudanga gifudji gi kima.” (Kusonga 12:9) Sadana ma gakedi gibeni yi nzala yi guyala, tunda a gapushidi Adamu yi Eva kega kutu awandjo ega mu gugolama gwena Yehowa. Bible di gulendjiganga awandjo ana a gagolamanini mbi ademo. Yehowa u g’ahanga gu wulu u ga’embila awulu di manu, kega ma gesa gu’ajiya.—Danga Kusonga 12:9, 12.

3. Pila yigi Sadana yi ademo a gufudanga hadu?

Mumwila mu gufuda hadu engi, Sadana kega ademo a guhangilanga yisalu yi apeve a mbi, gisongidila gupusa hadu mu gusolula yi owu. Mu mbandu hadu ega a gwendanga gusolula yi hadu’ana a gudalanga mioda mumwila mu gwambila hadu mambu mo ma gahangamana mu yilumbu yina gwisa, a gwendanga gusolula yi hadu’ana a gwambilanga hadu mambu ma g’agumina, a nganga kega a logi. Hadu ega a gugumbulanga mbi a’asashi yi yima yo yigukalanga mu guwagana yi apeve a mbi. Kutu hadu ega a gaguma gugumbula mbi a le solula yi hadu o’agafwa. Gashi Yehowa ma gudugebisanga mbi: “Lō gwenda gwena hadu ana a gusolulanga yi apeve a’afwa, kega lō guhula hadu’ana a gwambilanga hadu mambu mo ma g’agumina.” (Levi 19:31) Yehowa a gudugebisanga mu gududanina. Mumwila Sadana yi ademo ena ambeni endji ana a guzolanga guduhanga mbi.

WISHIYA KEGA MAMBU MENGI

Dudadi mambu ma pimbu mo ma guhanganga awandjo, yigonsa y’isalu yi apeve a mbi, kega mambu ma du fe hanga mumwila mu gudidanina gwena Sadana yi ademo.

Wandjo u moshi ena mu gudwadisa Ambangi a Yehowa mbadi o ena mu gulonga nzu yi nzu.

4. Awandjo a gusadisanga hadu mu gwishiya Yehowa

Awandjo a Nzambi lo’agwisanga gimudu-gimudu mumwila mu gulonga hadu sangu ji pimbu. Gashi, a gudwadisanga asadi a Nzambi gwena hadu’ana ena yi funu yi gumwishiya. Danga Kusonga 14:6, 7, gudima hanenu mamvudu mu miwu mi:

Mumwilegi du gukalanga yi funu yi lusadisu lu’awandjo mu gulonga sangu ji pimbu?
Ayi, mu gunaguhwa gigesa mu gwishiya mbi awandjo a le gugudwadisa gwena hadu’ana ena yi funu yi gwifa mambu ma Bible? Mumwilegi?

Yima yi luswaswanu yo yena yi guwagana yi lusambu lu yidegi kega yi yisalu yi apeve a mbi mumbandu: tablo dio di’aguhangilanga mu gugamba ma sangu gwena ademo, lundumba lu kristale, muganda wu avampir, ma carte ma taro, yidegi yi vodu, bidi, mishinga mi akida, akida.

5. Duna yisalu yi apeve a mbi

Sadana yi ademo ena ambeni a Yehowa. Ena kega ambeni edu. Dangenu Luka 9:38-42, gudima hanenu mvudu mu muwu wu:

Mambu megi ademo a guhanganga hadu?

Lō du le hwa ademo mbuga yi guduyala. Dangenu Kulonga 18:10-12, gudima hanenu mamvudu mu miwu mi:

Pila yigi ademo eni gugamba guduyala kega gusolula yi edu? Yisalu yigi yi apeve a mbi yi guhangamananga ngolu mu gihani gi’ugu jinganga?
U na yindula mbi gwena pimbu pila Yehowa a gadunisa yisalu yi midjindu mi kima yi apeve a mbi? Mumwilegi?

Dalenu VIDEYO, gudima hanenu mamvudu mu miwu mi:

VIDEYO: “Kalenu ambeni a Diabulu” (5:02)

Mu nagumbula mbi mushinga wuna Palesa a gavadjishidi munendji u mugonusa u gakedi gigonsa? Mumwilegi?
Gugalombidi mbi Palesa a hangi yigi mu gudidanina gwena ademo?

Akristu a giediga a gukalanga dangu di kima ambeni a’ademo. Dangenu Bisalu 19:19 kega 1 Bakorinto 10:21, gudima hanenu mvudu mu muwu wu:

Mumwilegi gwena funu mbi wimbidi yima yikima yo y’ukwedji yena yi guwagana yi yisalu yi apeve a mbi?

Mugonusa mumoshi ena mu guzenga yima yi luswaswanu yo yena yi guwagana yi yisalu yi apeve ambi.

6. U le nunga yidumba yi Sadana yi ademo

Sadana ena fumu w’ademo. Gashi Mikaele fumu wu awandjo, gisongidila Yezu, mudu weni gudwadisa awandjo a gwigama a Nzambi. Mikaele ena yi ngolu ji pila yigi? Dangenu Kusonga 12:7-9, gudima hanenu mamvudu mu miwu mi:

Nani wena ngolu djingi? Mikaele yi awandjo endji to Sadana yi ademo endji?
U yindula yigi, alongogi a Yezu a fe gwifa Sadana yi ademo endji woma?

U le nunga yidumba yi Sadana yi ademo. Dangenu Yakobo 4:7, gudima hanenu mvudu mu muwu wu:

Pila yigi u le gudidanina gwena Sadana yi ademo?

HADU EGA ENI GUHOSA MBI: “Lō gwena mbi mu gubula nsaga to gudala ma filme mo ma gulesanga yisalu yi apeve a mbi. Gwena gaga nsaga yi guhidjisa dangu.”