LECCIÓN 14
¿Naguá jiniñuʼun tágua kuataʼvi Yandios ja chiñuʼun yo-Ya?
Tanu ni ndeʼe-yo nu̱u̱ lección 13, ma sú ndɨʼɨ nda religión jetaʼvi-Ya. De ja nda̱a̱ kuu ja kuu ndachiñuʼun-yo Yandios de kuu saʼa sii-yo ini-Ya. ¿Na̱sa “kúni Yandios ja ndachiñuʼun yo-Ya” axi na “religión” jetaʼvi-Ya? (Santiago 1:27; nota). Ná kundeʼe-yo naguá kuu ja steʼen Biblia.
1. ¿Ndenu ndaniʼi-yo tuʼun ja kachi na̱sa ndachiñuʼun-yo Yandios?
Nda tuʼun ja kachi na̱sa ndachiñuʼun-yo Yandios yoso nu̱u̱ Biblia. Jesús ni kachi-de nu̱u̱ Yandios: “Ndá tu̱ʼun cáʼa̱n maá ní cúu tu̱ʼun nda̱a̱” (Juan 17:17). Sava nda religión nduu ka tíin kuenda-ji tuʼun nda̱a̱ ja kachi Tuʼun Yandios, ja yoso nu̱u̱ Biblia; chi sá, ka taʼa̱n ka ini-ji tuʼun ji viko ja ka saʼa nda ñayí. De Jeová chi nduu taʼa̱n ini-Ya ja ka saʼa siin-ji tuʼun ja tatuni-Ya (kaʼvi-ní Marcos 7:9). De inka kuu, ja nda-yo saʼa sii-yo ini-Ya ta tíin kuenda-yo ja kachi Biblia de saʼa-yo tiñu tanu kachi-Ya.
2. ¿Na̱sa jiniñuʼun ndachiñuʼun-yo Jeová?
Sɨkɨ ja Jeová ni saʼa-Ya nda-yo, jiniñuʼun ja ndachiñuʼun-yo nu̱u̱ maa-Ya (Apocalipsis 4:11). Yaʼa kúni kaʼan ja jiniñuʼun kutoo yo-Ya ji ndachiñuʼun-yo nu̱u̱ matuʼun-Ya, de ma kuatiñu-yo ni ɨn ídolo, imagen axi símbolo (kaʼvi-ní Isaías 42:8, TNM).
Ja ndachiñuʼun-yo Yandios jiniñuʼun ja “coo ndoo coo ii̱” (Romanos 12:1). Yaʼa kúni kaʼan ja jiniñuʼun kundee-yo tanu tatuni-Ya. Tanu kuu, nda ñayí ja kutoo-ji Jeová ka teya̱ʼvi-ji ji ka kandija-ji nu̱u̱ tuʼun ja tatuni sɨkɨ ja tánda̱ʼá. Suni ka kandija-ji nu̱u̱ sava ka tuʼun, tanu ja nduu ka jatiñu-ji yuku̱ xée̱n, ni nduu ka te̱e̱-ji yuku̱ iinu̱ ni nduu ka ji̱ni-ji.a
3. ¿Nakú jiniñuʼun ndachiñuʼun-yo Jeová jín sava ka ñayí ja ka kúni-ji ka kandija-ji nu̱u̱-Ya?
Nu̱u̱ reunión nda̱ká semana kuu ndachiñuʼun-yo nu̱u̱ “Jeová [...] ini congregación” (Salmo 111:1, 2, TNM). De saʼa-yo ta jíta-yo yaa̱ nu̱u̱-Ya (kaʼvi-ní Salmo 104:33, TNM). Nú Jeová jikan-Ya ja ná ndutútú-yo kuu sɨkɨ ja kutoo-Ya yoʼo de jíni̱-Ya ja nda reunión yaʼa chindeé nu̱u̱-yo tágua kundee sii ini-yo nɨkani. Ta ndutútú-yo, sama̱taʼan-yo tuʼun ndeé ini.
NÁ KUTUʼVA KA-YO SƗKƗ TUʼUN YAʼA
Ná kutuʼva-yo nakú Jeová nduu kúni-Ya ja kuatiñu-yo nda imagen tágua ndachiñuʼun yo-Ya. Ná kundeʼe-yo sava nda tuʼun kánuu ja kachi na̱sa ndachiñuʼun yo-Ya.
4. Nduu iyo vaʼa ja kuatiñu-yo nda imagen tágua ndachiñuʼun yo-Ya
¿Nakú jíni̱-yo ja nduu taʼa̱n ini Yandios sukua? Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
¿Naguá ni kuu kɨvɨ ichi yáta̱ ta sava ka ñayí nu̱u̱ ñuu Yandios ni ka jatiñu-ji ɨn ídolo tágua ndachiñuʼun-ji Ya̱a̱?
Sava nda ñayí ka jani xini-ji ja ka kuñati-ji nu̱u̱ Yandios nú ka jatiñu-ji nda imagen tágua ndachiñuʼun-ji Ya̱a̱. De ¿a ka saʼa vaʼa nda ñayí ta ka saʼa-ji sukua? Ka kaʼvi-ní Éxodo 20:4-6 ji Salmo 106:35, 36, TNM de ka ndatuʼun-ní sɨkɨ nda tuʼun yaʼa:
¿Na ndatiñu axi nda imagen jíni̱-ní ja jatiñu nda ñayí?
¿Naguá jani ini Jeová ta nda ñayí jatiñu-ji nda imagen?
¿Naguá jani ini maa-ní?
5. Nú ndachiñuʼun-yo matuʼun Jeová, kuji̱ka-yo nu̱u̱ nda tuʼun túʼu̱n
Ná kundeʼe-yo ja nú ndachiñuʼun-yo Jeová tanu kúni maa-Ya saʼa ja ma kandija ka-yo tuʼun túʼu̱n. Ka kundeʼe-ní VIDEO.
Ka kaʼvi-ní Salmo 91:14, TNM de ka ndatuʼun-ní sɨkɨ nda tuʼun yaʼa:
Nú steʼen-yo nu̱u̱ Jeová ja kutoo yo-Ya ji ndachiñuʼun-yo matuʼun-Ya, ¿naguá kachi-Ya ja saʼa-Ya jín yoʼo?
6. Ndachiñuʼun-yo Yandios nu̱u̱ nda reunión congregación
Ta jíta-yo yaa̱ ji kaʼan-yo nu̱u̱ nda reunión ja iyo nu̱u̱ congregación ndachiñuʼun-yo Jeová ji sama̱taʼan-yo tuʼun ndeé ini. Ka kaʼvi-ní Salmo 22:22, TNM de ka ndatuʼun-ní sɨkɨ nda tuʼun yaʼa:
¿A kuu sii ini-ní ta níni-ní nda tuʼun ja kaʼan nu̱u̱ nda reunión?
¿A taʼa̱n ini-ní satuʼva-ní ɨn tuʼun de kuu kaʼan-ní nu̱u̱ nda reunión?
7. Jeová taʼa̱n tuni ini-Ya ja kaʼan-yo nu̱u̱ inka ñayí sɨkɨ tuʼun ja kutuʼva-yo
Iyo kuaʼa ja kuu steʼen-yo nu̱u̱ nda ñayí sɨkɨ ja steʼen Biblia. Ka kaʼvi-ní Salmo 9:1 ji 34:1, TNM de ka ndatuʼun-ní sɨkɨ nda tuʼun yaʼa:
Nu̱u̱ ndɨʼɨ tuʼun ja ni kutuʼva-ní sɨkɨ Biblia, ¿naguá taʼa̱n ka ini-ní nakani-ní nu̱u̱ sava ka ñayí?
JA KACHI SAVA NDA ÑAYÍ: “Nú kuu-yo ɨn ñayí vaʼa ini, nduu kánuu na̱sa ndachiñuʼun-yo Yandios”.
¿Naguá jani ini maa-ní?
JA NI KUTUʼVA-YO
Saʼa sii-yo ini Yandios-yo ta ndachiñuʼun-yo matuʼun-Ya, ta ndachiñuʼun yo-Ya nu̱u̱ nda reunión congregación ji ta kaʼan-yo nu̱u̱ sava ka ñayí sɨkɨ ja ni kutuʼva-yo.
Tuʼun núku̱ʼun ini
¿Ndenu kachi tuʼun na̱sa kúni Yandios ja ndachiñuʼun yo-Ya?
¿Nakú jiniñuʼun ndachiñuʼun-yo nu̱u̱ matuʼun Jeová?
¿Nakú jiniñuʼun ndachiñuʼun-yo Yandios jín nda ñayí kúni-ji kandija-ji nu̱u̱-Ya?
NU̱U̱ NDANIʼI KA-NÍ TUʼUN
Kaʼvi-ní nu̱u̱ tuʼun sɨkɨ ñayí “Nduu kɨ̱vɨnduu ka-sa jín nda tiñu ja yitaʼan jín tiñu tásí” kaʼan sɨkɨ ɨn ñaʼan na̱sa ni kuji̱ka-ña nu̱u̱ nda ídolo.
“Tuʼun nda̱a̱ Yandios ni sa̱ma ini-ji” (La Atalaya, 1 yo̱o̱ julio kuiya 2011)
Nandukú-ní tuʼun ja kuu chindeé nu̱u̱-ní tágua kaʼan-ní nu̱u̱ nda reunión.
“Ná saʼa súkún-yo Jeová nu̱u̱ congregación” (La Atalaya, yo̱o̱ enero kuiya 2019)
Kundeʼe-ní na̱sa ni chindeé nda reunión nu̱u̱ ɨn suchí kua̱chi vese víjin ni kuu nu̱u̱-ji kiʼin-ji.
Kuaʼa ñayí skanitaʼan-ji cruz jín cristianismo, ¿de a jiniñuʼun kuatiñu-yo ta ndachiñuʼun-yo Yandios?
“¿Nakú nda testigo Jeová nduu ka jatiñu-ji cruz?” (Artículo nu̱u̱ jw.org)
a Kutuʼva ka-yo sɨkɨ tuʼun yaʼa nu̱u̱ lección ichi nu̱u̱ ka.