LECCIÓN 25
¿Naguá kúni Yandios saʼa-Ya jín nda-yo?
Biblia kachi ja nda ñayí “jaku ni̱ tiempo teku-ji de iyo kuaʼa tuni tundoʼo nu̱u̱-ji” (Job 14:1, TNM). De ¿a sukua kuu ja kúni Yandios ja kuteku-yo? De, nú ma sú sukua kuu, ¿na ja vaʼa kúni-Ya ja kunevaʼa-yo? ¿A kunda̱a̱ tuʼun yaʼa ɨn kɨvɨ? Kundeʼe-ní tuʼun xndikó Biblia.
1. ¿Na̱sa kúni Yandios ja kuteku-yo?
Jeová kúni-Ya ja kunevaʼa-yo ɨn ja vaʼa tuni. Ta ni saʼa-Ya ñayí xinañuʼun —Adán ji Eva—, ni jeʼe-Ya nu̱u̱ nda-ji ñuʼun vii: jardín Edén ja na kundee-ji. De ñukua “Ni saʼa i̱i̱ Yandios ndúu̱-de de ni kachi Yandios: ‘Ka koo seʼe-ro, de nakaya̱ nda-ro, de ka saʼa chitú-ro nu̱u̱ ñuʼun de kuñaʼnu nda-roʼ” (Génesis 1:28, TNM). Jeová ni kúni-Ya ja na koo seʼe-ji, ja saʼa-ji ja Ñuʼun ndu̱u̱-ji ɨn ñuʼun vii de ja na koto-ji nda kɨtɨ. Ni kúni-Ya ja ndɨʼɨ ñuuyɨvɨ́ ma kukúʼu̱-ji ji kuteku-ji nɨkani.
Vese nduu ni kuu tiñu ja ni jani ini Yandios,a nduu sa̱ma ini-Ya (Isaías 46:10, 11, TNM). Ja xinañuʼun kúni-Ya ja ndɨʼɨ ñayí kandija nu̱u̱-Ya de kuteku-ji nɨkani de koo vaʼa-ji (kaʼvi-ní Apocalipsis 21:3, 4).
2. ¿Na̱sa kuu koo sii ini-yo de kundee vaʼa-yo nde mita?
Jeová ni saʼa-Ya yoʼo, tágua kutuʼva-yo de chiñuʼun-yo nu̱u̱-Ya (kaʼvi-ní Mateo 5:3-6). Yandios kúni-Ya ja na kitaʼan vaʼa-yo jín-Ya, ja kaka-yo “nu̱u̱ ndɨʼɨ ichi-Ya”, kutoo yo-Ya ji satiñu-yo nu̱u̱-Ya jín ndɨʼɨ anu-yo (Deuteronomio 10:12; Salmo 25:14, TNM). Nú saʼa-yo ja yaʼa, kuu koo sii tuni ini-yo vese iyo tundoʼo. Ja chiñuʼun-yo nu̱u̱ Jeová saʼa ja kundee vaʼa-yo, de koo sii ini-yo.
NÁ KUTUʼVA KA-YO SƗKƗ TUʼUN YAʼA
Kundeʼe-yo ja too tuni ini Jeová ja ñukua kuu ja ni saʼa-Ya ñuʼun tágua kuu kundee-yo ji ja steʼen Tuʼun-Ya sɨkɨ ja kundee sii ini-yo.
3. Jeová kúni-Ya ja ndɨʼɨ ñayí kuteku-yo vii tuni
Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
¿Nakú vii tuni ni saʼa Yandios Ñuʼun-yo?
Ka kaʼvi-ní Eclesiastés 3:11, TNM de ka ndatuʼun-ní sɨkɨ nda tuʼun yaʼa:
¿Naguá kachi tuʼun yaʼa sɨkɨ Jeová?
4. Ja kúni saʼa Jeová nduu sa̱ma
Ka kaʼvi-ní Salmo 37:11, 29 ji Isaías 55:11, TNM de ka ndatuʼun-ní sɨkɨ nda tuʼun yaʼa:
¿Na̱sa jíni̱-yo ja tiñu kúni saʼa Jeová nu̱u̱-yo nduu sa̱ma?
Ɨn veʼe ja ni tíví kuu nduvaʼa. Suni sukua kuu jín Ñuʼun: ñayí nduu jito-ji, de Yandios ndasaʼa vaʼa-Ya tágua kundee ñayí ja kutoo nu̱u̱-Ya.
5. Ja chiñuʼun-yo nu̱u̱ Jeová saʼa ja ndee sii ndija ini-yo
Ta jíni̱-yo nakú teku-yo saʼa ja koo sii ini-yo. Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
¿Na̱sa ni chindeé nu̱u̱ Terumi ja ni ndaniʼi-ña ja kusii ndija ini-ña?
Ka kaʼvi-ní Eclesiastés 12:13, TNM de ka ndatuʼun-ní sɨkɨ nda tuʼun yaʼa:
Ta ndeʼe-yo ndɨʼɨ tiñu ni saʼa Jeová sɨkɨ ndɨʼɨ-yo, ¿naguá jiniñuʼun saʼa-yo tágua steʼen-yo ja jetaʼvi-yo?
JA KA JIKATUʼUN SAVA NDA ÑAYÍ: “¿Nakú iyo-yo yaʼa? ¿Na sɨkɨ kuu ja teku-yo?”.
¿Naguá kachi-ní?
JA NI KUTUʼVA-YO
Jeová kúni-Ya ja na koo sii ini-yo nɨkani nu̱u̱ Ñuʼun ji ja kundee vaʼa-yo. De mita, koo sii ndija ini-yo chi chiñuʼun-yo nu̱u̱ Jeová jín ndɨʼɨ anu-yo.
Tuʼun núku̱ʼun ini
Ta ni saʼa Jeová Adán ji Eva, ¿naguá ni kúni-Ya ja kunevaʼa nda-ji?
¿Na̱sa jíni̱-yo ja jani ini Yandios ja kunevaʼa nda ñayí nduu sa̱ma?
¿Naguá chíndeé nu̱u̱-ní tágua kundee sii ndija ini-ní?
NU̱U̱ NDANIʼI KA-NÍ TUʼUN
Kundeʼe-ní nakú kuʼun kají ini-yo ja ni iyo ndija jardín Edén.
“Jardín Edén, ¿a kuentu ni̱ kuu?” (La Atalaya, 1 yo̱o̱ enero kuiya 2011)
Kundeʼe-ní nakú kuʼun kají ini-yo ja Ñuʼun yaʼa ma naa kuiti̱-ji.
Kundeʼe-ní ja kachi Biblia na sɨkɨ kuu ja teku-yo.
Kundeʼe-ní na̱sa ɨn teé ja ni jani ini-de ja nevaʼa-de ndɨʼɨ ndatiñu ni jíni̱-de ja iyo ɨn ja kumani nu̱u̱-de.
a Nu̱u̱ inka lección kundeʼe-yo naguá kuu ja nduu ni kee vaʼa.