¿Naguá kuu Reino Yandios?

Tuʼun kánuu ja kachi nu̱u̱ Biblia yitaʼan jín Reino Yandios. Ja sɨkɨ Reino, Jeová saʼa-Ya ja kunda̱a̱ tiñu ja ni kúni-Ya ja koo nu̱u̱ Ñuʼun nde xinañuʼun. ¿Naguá kuu Reino? ¿Na̱sa jíni̱-yo ja̱ ja tatuni-ji? ¿Naguá ja ni saʼa-ji nde mita? ¿De naguá sáʼá-ji ichi nu̱u̱? Nda tuʼun ja jikatuʼun yaʼa xndikó tuʼun nu̱u̱ lección yaʼa ji nu̱u̱ ndúu̱ ka lección ichi nu̱u̱.

1. ¿Naguá kuu Reino Yandios, de nde ɨn kuu Rey-ji?

Reino Yandios kuu ɨn gobierno ja ni jani̱ maa Jeová. De Rey kuu Jesucristo de tatuni-de nde andɨvɨ́ (Mateo 4:17; Juan 18:36). Ta kaʼan sɨkɨ Jesús, Biblia kachi: “De níí cání tatúni̱ ji” (Lucas 1:32, 33). Sɨkɨ ja kuu-de Rey nu̱u̱ Reino Yandios, tatúni-de nu̱u̱ ndɨʼɨ ñayí nu̱u̱ Ñuʼun.

2. ¿Nde ɨn ka tatuni jín Jesús?

Jesús nduu tatuni matuʼun-de. “Nchivi̱ ma̱ʼñú nda̱cá raza, nda̱cá yuʼú, nda̱cá ñuu̱, nda̱cá nación [...] ndacu ji tiñu ini̱ ñayi̱ví” (Apocalipsis 5:9, 10). ¿Nasaa ñayí tatúni jín Cristo? Nde kɨvɨ ja ni iyo Jesús nu̱u̱ Ñuʼun, kuaʼa millón ñayí ni ka kandija-ji ja kundiki̱-ji nu̱u̱ Cristo, de ni ka ndu̱u̱-ji cristiano. De 144.000 ni̱ ñayí kiʼin andɨvɨ́ tágua tatúni-ji jín Jesús (kaʼvi-ní Apocalipsis 14:1-4). Nda̱ká ka cristiano ka kundee-ji nu̱u̱ Ñuʼun ta tatúni Reino yaʼa (Salmo 37:29, TNM).

3. ¿Nakú Reino Yandios kuu ja vaʼa ka ma sú ja tatuni nda ñayí?

Vese iyo nda teé tatuni ja ka kúni-ji ka saʼa-ji tiñu vaʼa, nduu ka nevaʼa-ji nda ja jiniñuʼun tágua ka saʼa-ji ndɨʼɨ ja ka kúni-ji. De ya̱ʼa tiempo de inka ñayí kuu ja tatuni de sanaa nduu ka ndɨʼvɨ ini-ji sɨkɨ ñuu. De Jesús, ja kuu-de Rey nu̱u̱ Reino Yandios, ni ɨn ma kindee kuiti̱ ja tatuni-de. Yandios ni jani̱-Ya “ɨn reino ja ma naa” (Daniel 2:44, TNM). Jesús tatúni-de nu̱u̱ ndɨʼɨ Ñuʼun de ma saʼa siin-de nu̱u̱ ni ɨn ñayí. Maa-de kutoo-de, vaʼa ini-de ji saʼa nda̱a̱-de tiñu, de steʼen-de nu̱u̱ nda ñayí ja suni sukua saʼa-ji: ja kutoo-ji, ja vaʼa ini-ji ji ja saʼa nda̱a̱-ji tiñu jín nda ñayí (kaʼvi-ní Isaías 11:9, TNM).

4. Ɨn Reino ja ndakui ja tatúni-ji nu̱u̱ ndɨʼɨ nu̱u̱ Ñuʼun

Jesucristo kuu ja nevaʼa ja ndakui ji ja jiniñuʼun tágua tatúni-de de ni ɨn ñayí nduu kuu saʼa-ji sukua. Ka kaʼvi-ní Mateo 28:18 de ka ndatuʼun-ní sɨkɨ nda tuʼun yaʼa:

• ¿Nakú ja tatuni Jesús kuu ja súkún ka ma sú ja tatuni nda teé ndíso tiñu?

Nda teé ndíso tiñu nduu ka tatuni-ji nu̱u̱ ndɨʼɨ nu̱u̱ Ñuʼun de jaku ni̱ tiempo de kenda ja naa ja tatuni-ji. ¿A sukua ku̱ú jín Reino Yandios? Ka kaʼvi-ní Daniel 7:14, TNM de ka ndatuʼun-ní sɨkɨ nda tuʼun yaʼa:

• ¿Na ja vaʼa koo ja Reino Yandios ma naa kuiti̱-ji?

• ¿Na ja vaʼa koo ja tatúni-ji nu̱u̱ ndɨʼɨ nu̱u̱ Ñuʼun?

5. Nda teé ka ndíso tiñu nu̱u̱ ñuuyɨvɨ́ jiniñuʼun ja nasa̱ma-ji

¿Nakú jiniñuʼun ja Reino Yandios nukuiñi-ji nu̱u̱ ja tatuni nda teé ndíso tiñu? Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:

VIDEO: ¿Naguá kuu Reino Yandios? (fragmento) (1:41)

• ¿Na tundoʼo ka saʼa nda teé ndíso tiñu nu̱u̱ ñuuyɨvɨ́?

Ka kaʼvi-ní Eclesiastés 8:9, TNM de ka ndatuʼun-ní sɨkɨ nda tuʼun yaʼa:

• ¿A káʼán-ní ja jiniñuʼun ja Reino Yandios nukuiñi-ji nu̱u̱ nda teé ndíso tiñu nu̱u̱ ñuuyɨvɨ́? ¿Nakú?

6. Nda-ji ja ka tatuni-ji nu̱u̱ Reino Yandios ka jakuʼun ini-ji nu̱u̱-yo

Tanu Rey nda-yo, Jesús, ni kuu-de ɨn ñayí ja ni iyo-de nu̱u̱ Ñuʼun, kuu “cúndáʼví ini̱ yóʼó ja̱á nduú na̱ fuerza o̱” (Hebreos 4:15). Jeová ni ka̱ji-Ya 144.000 nda teé jín ñaʼan ja ka iñi tu̱u̱n nu̱u̱-Ya tágua tatúni-ji jín Jesús. Ndɨʼɨ ñayí yaʼa kuu nu̱u̱ “nda̱cá raza, nda̱cá yuʼú, nda̱cá ñuu̱, nda̱cá nación” (Apocalipsis 5:9).

• ¿A chíndeé nu̱u̱-ní ta jani ini-ní ja Jesús ji ndɨʼɨ ñayí ja tatúni jín-de ka jíni̱ vaʼa-ji na̱sa kuu ja teku nda-yo? ¿Nakú?

7. Nda ley Reino Yandios kuu ja vaʼa ka ma sú nda ley ñayí

Nda teé ka tatuni ka jani̱-ji ley chi ka kúni-ji chíndeé-ji ji chisa̱ʼvi-ji nu̱u̱ nda ñayí. Reino Yandios suni nevaʼa-ji nda ley, de nda ñayí ja yiʼi nu̱u̱ ndaʼá Reino jiniñuʼun ja kandija-ji ja kachi-ji. Ka kaʼvi-ní 1 Corintios 6:9-11 de ka ndatuʼun-ní sɨkɨ nda tuʼun yaʼa:

• ¿Na̱sa káʼán-ní ja koo nu̱u̱ ñuʼun ta ndɨʼɨ ñayí kandija-ji tuʼun tetiñu Yandios?a

• ¿A jani ini-ní ja kuu ɨn ja vaʼa ja Jeová ndetu-Ya ja nda ñayí ja yiʼi-ji nu̱u̱ ndaʼá Reino-Ya kandija-ji tuʼun ja tatuni-Ya? ¿Nakú kachi-ní sukua?

• ¿Na̱sa jíni̱-yo ja nda ñayí ja nduu kandija-ji ley yaʼa ku̱ú sa̱ma-ji? (Ka kundeʼe-ní versículo 11).

JA NI KUTUʼVA-YO

Reino Yandios kuu ɨn ja nda̱a̱ de iyo-ji nu̱u̱ andɨvɨ́ ji tatúni-ji nu̱u̱ níí ñuuyɨvɨ́.

Tuʼun núku̱ʼun ini

• ¿Nde ɨn ka kuu ka ñayí tatuni nu̱u̱ Reino Yandios?

• ¿Nakú Reino Yandios ɨn ja vaʼa ka kuu ma sú ja tatuni nda ñayí?

• ¿Naguá ndetu Jeová ja saʼa nda ñayí ja yiʼi nu̱u̱ ndaʼá Reino maa-Ya?

NU̱U̱ NDANIʼI KA-NÍ TUʼUN

Kaʼvi-ní ja ni steʼen Jesús sɨkɨ ndenu koo Reino.

“¿A kuu Reino Yandios ɨn ja ñúʼun ini anu-yo?” (Artículo nu̱u̱ jw.org)

¿Nakú ka kúni nda testigo Jeová ja ka kuiñi tu̱u̱n-de nu̱u̱ Reino Yandios ma sú nu̱u̱ nda teé ja ndíso tiñu?

Ja ni ka iñi tu̱u̱n nu̱u̱ Reino Yandios (1:44)

Kutuʼva-ní ja kachi Biblia sɨkɨ nda 144.000 ñayí ja ni ka̱ji Jeová tágua tatúni nda-ji jín Jesús.

“¿Nde ɨn ka kuu ja kiʼin nu̱u̱ andɨvɨ́?” (Artículo nu̱u̱ jw.org)

¿Naguá ni sínu ini nu̱u̱ ɨn ñaʼan ja ni yi̱nee-ña ini veka̱a ja matuʼun ni̱ Yandios kuu saʼa ja koo tiñu nda̱a̱ nu̱u̱ ñuuyɨvɨ́?

“Ni kutuʼva-sa na̱sa nduvaʼa tiñu nduu iyo nda̱a̱” (¡Despertad!, yo̱o̱ noviembre kuiya 2011)