LECCIÓN 49
Na̱sa kuu kundee sii ini ñayí veʼe-ní (parte 1)
Nda ñayí tánda̱ʼá jáá kúni-ji kundee sii ini-ji nɨkani ta ni kuu kɨvɨ ja ni tánda̱ʼá-ji. De kenda kuu ndija. Chi sukua ka jíni̱ nda cristiano ja ni kuu kuaʼa tuni kuiya ja ni ka tánda̱ʼá-ji ji ka chuʼun tuni ini-ji ka kandija-ji tuʼun ja tatuni nu̱u̱ Biblia.
1. ¿Na tuʼun tatuni Biblia nu̱u̱ nda yɨɨ́?
Jeová ni kachi-Ya ja nda yɨɨ́ kuu ja tatuni nu̱u̱ nda ñayí veʼe-ji (kaʼvi-ní Efesios 5:23). De ndetu-Ya ja nda yɨɨ́ kani vaʼa xini-ji tágua kundee vaʼa-ji jín ñayí veʼe-ji. Biblia tatuni nda tuʼun yaʼa nu̱u̱ nda yɨɨ́: “Cundáʼví ini̱ ro ñasíʼí ro” (Efesios 5:25). ¿Naguá kúni kaʼan? Ja ɨn yɨɨ́ ja kutoo-de ñasɨʼɨ-de kaʼan vii-de nu̱u̱-ña, vaʼani̱ nú iyo ñayí axi nduu. Jito de-ña de ndukú-de na̱sa kuteku vaʼa-de jín-ña tágua koo sii ini-ña (1 Timoteo 5:8). De, chuʼun ini-de, tágua ndukú-de na̱sa kuu kuñati-ña nu̱u̱ Yandios (Mateo 4:4). Tanu kuu, ku̱ú saʼa-de sáʼan ji kaʼvi-de Biblia jín-ña. Nú ɨn yɨɨ́ kutoo-de ji jito-de ñasɨʼɨ-de, ñukua saʼa ja kitaʼan vaʼa-de jín Jeová (kaʼvi-ní 1 Pedro 3:7).
2. ¿Na tuʼun tatuni Biblia nu̱u̱ nda ñasɨʼɨ?
Tuʼun Yandios kachi ja ñasɨʼɨ “ná cóo yíñúʼún ña jíín yií ña” (Efesios 5:33). ¿De na̱sa kuu saʼa-ña? Kuu kani xini-ña nu̱u̱ nda ja vaʼa ini ja nevaʼa yɨɨ́-ña ji ja chuʼun tuni ini-de tágua koto de-ña ji nda seʼe-de. Suni steʼen-ña ja iyo yɨñuʼún-ña nú chíndeé-ña nu̱u̱ nda tiñu ja ka̱ji-de saʼa-de, ta kaʼan vii-ña nu̱u̱-de ji kaʼan vaʼa-ña sɨkɨ-de, vese nduu chiñuʼun-de Yandios-ña.
3. ¿Na̱sa kuu saʼa kutú ka ja ni ka tánda̱ʼá ɨn yɨɨ́ ji ñasɨʼɨ-de?
Biblia kachi, nu̱u̱ nda ñayí ja ni ka tánda̱ʼá: “De iin-ni ca̱ cúu ndúu̱ de̱” (Mateo 19:5). Yaʼa kúni kaʼan ja kánuu ja natundaʼá-de ndɨʼɨ ja kuu saʼa ja kusíín nda-de. Ñukua kuu ja niini ka ndukú-de ja ka koo ndúu̱-de tágua kuu ka ndatuʼun-de na̱sa ka jani ini-de. De suni, ka jíni̱-de ja Jeová—kuu ja kánuu tuni ka—nu̱u̱ ndúu̱ nda-de. Ji ndúu̱-de ka jito-de maa-de tágua ma ka kitaʼan tuni-de jín inka ñayí ja nduu kuu ja ni ka tánda̱ʼá jín-de.
NÁ KUTUʼVA KA-YO SƗKƗ TUʼUN YAʼA
Ná kundeʼe-yo nda principio Biblia ja saʼa kutú ka ja ni tánda̱ʼá-ní.
4. Yɨɨ́, koto-ní ji kutoo-ní ñasɨʼɨ-ní
Biblia kachi ja “suni súcuán cánuú ja̱ cundáʼví ini̱ yií ñasíʼí de̱, tá cúu nu̱u̱ cúndáʼví ini̱ de̱ maá de̱” (Efesios 5:28, 29). ¿Naguá kúni kaʼan ja yaʼa? Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
¿Na̱sa kuu steʼen yɨɨ́ ja kutoo-de ji ja ndɨʼvɨ ini-de nu̱u̱ ñasɨʼɨ-de?
Ka kaʼvi-ní Colosenses 3:12 de ka ndatuʼun-ní sɨkɨ nda tuʼun yaʼa:
¿Na̱sa kuu steʼen ɨn yɨɨ́ nda ja vaʼa yaʼa nu̱u̱ ñasɨʼɨ-de?
5. Ñasɨʼɨ, koo yɨñuʼún-ní ji kutoo-ní yɨɨ́-ní
Biblia tatuni nu̱u̱ ñasɨʼɨ ja ná koo yɨñuʼún-ña nu̱u̱ yɨɨ́-ña vaʼani̱ nú chiñuʼun-de Jeová axi nduu. Ka kaʼvi-ní 1 Pedro 3:1, 2 de ka ndatuʼun-ní sɨkɨ nda tuʼun yaʼa:
Nú yɨɨ́-ní nduu chiñuʼun-de Jeová, sanaa maa-ní kúni-ní ja ná chiñuʼun de-Ya. ¿Naguá chindeé nu̱u̱-ní: ja núú ni̱ núú ni̱ kaʼan-ní Tuʼun Yandios nu̱u̱-de, axi ja saʼa vaʼa-ní tiñu ji ja koo yɨñuʼún-ní nu̱u̱-de? ¿Nakú jani ini-ní sukua?
Yɨɨ́ ji ñasɨʼɨ kuu ka ka̱ji vaʼa-de tiñu ja saʼa nda-de. De maa-ña, koo ji̱chi ja ma taʼa̱n ini-ña ja ka̱ji-de saʼa-de. Nú sukua kuu, kuu kaʼan-ña naguá jani ini-ña de ta kaʼan-ña koo ñaníí ini-ña ji kaʼan yɨñuʼún-ña. De kánuu núku̱ʼun ini-ña ja Jeová kuu ja ni jeʼe tiñu yaʼa nu̱u̱ yɨɨ́ ja koto vaʼa-de nda taʼan veʼe-de. De jiniñuʼun ja chíndeé-ña nda̱ká tiñu ja ka̱ji-de saʼa-de. Nú saʼa-ña sukua nda ñayí veʼe-ña koo sii ini-ji. Ka kaʼvi-ní 1 Pedro 3:3-5 de ka ndatuʼun-ní sɨkɨ nda tuʼun yaʼa:
¿Na̱sa kuu ini Jeová ta ndeʼe-Ya ja ñasɨʼɨ steʼen-ña ja iyo yɨñuʼún-ña nu̱u̱ yɨɨ́-ña?
6. Nda ñayí tánda̱ʼá kuu kundeé-ji nu̱u̱ nda tundoʼo ja kenda nu̱u̱-ji
Nda̱ká ñayí ja tánda̱ʼá ka nevaʼa-ji tundoʼo. Ñukua kuu ja jiniñuʼun ka chuʼun ini-ji tágua ka kundeé-ji nu̱u̱ nda tundoʼo. Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
¿Naguá steʼen ja ñayí ja ka kee nu̱u̱ video ka kuji̱ka nu̱u̱ taʼan-de?
¿Naguá ni ka saʼa ndúu̱-de tágua ma ka kusíín ka-de?
Ka kaʼvi-ní 1 Corintios 10:24 ji Colosenses 3:13. De ta jinú ka kaʼvi-ní ɨn ɨn versículo, ka ndatuʼun-ní sɨkɨ nda tuʼun yaʼa:
¿Nakú kuu kitaʼan vaʼa ka yɨɨ́ ji ñasɨʼɨ ta ka kandija-de tuʼun yaʼa?
Biblia kachi ja jiniñuʼun koo yɨñuʼún-yo nu̱u̱ taʼan-yo. De yaʼa kúni kaʼan ja kánuu kaʼan yɨñuʼún-yo jín kaʼan vii-yo nu̱u̱ inka ñayí. Ka kaʼvi-ní Romanos 12:10 de ka ndatuʼun-ní sɨkɨ nda tuʼun yaʼa:
¿A jiniñuʼun ja kundetu ndúu̱-de ja xinañuʼun ɨn-de saʼa sukua? ¿Nakú jani ini-ní sukua?
JA KACHI SAVA NDA ÑAYÍ: “Mita nduu ka kakitaʼan vaʼa-sa tanu kɨvɨ ichi yáta̱”.
¿Na̱sa ku̱ú kachi-ní ja Biblia ku̱ú chindeé nu̱u̱ nda-ji?
JA NI KUTUʼVA-YO
Yɨɨ́ ji ñasɨʼɨ kuu ka koo sii ini-de nú ka kutoo taʼan-de, ka iyo yɨñuʼún-de ji ka kandija-de nda principio ja kachi Biblia.
Tuʼun núku̱ʼun ini
¿Naguá kuu saʼa ɨn yɨɨ́ tágua kuu koo sii ka ini-de jín ñasɨʼɨ-de?
¿Naguá kuu saʼa ɨn ñasɨʼɨ tágua koo sii ka ini-ña jín yɨɨ́-ña?
Nú ja ni tánda̱ʼá-ní, ¿na principio Biblia ku̱ú chindeé nu̱u̱-ní tágua saʼa kutú ka-ní ja ni tánda̱ʼá-ní?
NU̱U̱ NDANIʼI KA-NÍ TUʼUN
Kutuʼva-ní nda tuʼun vaʼa ja chíndeé nu̱u̱-ní tágua kundee vaʼa-ní jín nda taʼan veʼe-ní.
Kundeʼe-ní ɨn video nu̱u̱ jíta yaa̱ ja steʼen nda ja vaʼa ja níʼi̱n-yo nú kandija-yo nda tuʼun ja tatuni Yandios.
Kutuʼva-ní naguá kúni kaʼan ja koo yɨñuʼún-ní nu̱u̱ yɨɨ́-ní.
Kutuʼva-ní naguá ni ka saʼa ɨn matrimonio tágua ma ka kusíín-de ta ni iyo tundoʼo nu̱u̱ nda-de.
Jeová ni chindeé-Ya nu̱u̱ nda-sa tágua ma ka kusíín-sa (5:14)