LECCIÓN 57
¿Naguá kenda ku̱ú nú saʼa-yo ɨn kuachi kaʼnu?
Vese maa-ní kutoo tuni-ní Jeová de chuʼun tuni ini-ní tágua ma saʼa-ní ja tajuʼvi ini-Ya, vese saá koo ji̱chi ja sanaa saʼa-ní kuachi. De iyo kuachi kaʼnu ji kuachi luli (1 Corintios 6:9, 10). De nú maa-ní saʼa-ní ɨn kuachi kaʼnu, núku̱ʼun ini-ní ja Jeová ma sndoo̱ kuiti̱-Ya maa-ní ja sɨkɨ ñukua; chi sá iyo tuʼva-Ya tágua kunee kaʼnu ini-Ya ji chíndeé-Ya nu̱u̱-ní.
1. ¿Naguá jiniñuʼun saʼa-yo tágua kunee kaʼnu ini Jeová nu̱u̱-yo?
Ta ɨn ñayí ja kutoo Jeová jíni̱-ji ja ni saʼa-ji ɨn kuachi kaʼnu, kukuéká tuni ini-ji. De Jeová kuáʼa-Ya tuʼun ndeé ini jín tuʼun yaʼa ja ni jeʼe-Ya nu̱u̱ ñuu-Ya: “Vese kuachi nda-ro niji̱ tanu ja kuaʼa escarlata, de kindoo kuijín tanu yu̱ʼva” (Isaías 1:18, TNM). Nú ndakani ndija ini-yo, Jeová kunee kaʼnu ndija ini-Ya nu̱u̱-yo. ¿De naguá kúni kaʼan ja ndakani ini-yo? Yaʼa yitaʼan jín ja tajuʼvi ini-yo ja sɨkɨ kuachi ja ni saʼa-yo, ja ma saʼa ka-yo ja nduu iyo vaʼa ji ja kakan táʼvi-yo nu̱u̱ Jeová ja na kunee kaʼnu ini-Ya nu̱u̱-yo. De sukua chuʼun ndija ini-yo ja nasa̱ma-yo na̱sa jani xini-yo axi ja ma saʼa ka-yo tiñu ja ni saʼa ja ni kinunkava-yo nu̱u̱ kuachi, de chuʼun ini-yo kundee-yo tanu kachi nda tuʼun ndoo Jeová (kaʼvi-ní Isaías 55:6, 7, TNM).
2. Ta kinunkava-yo nu̱u̱ ɨn kuachi, ¿na̱sa chíndeé Jeová nu̱u̱-yo ta jatiñu-Ya nda anciano?
Jeová kachi-Ya tuʼun yaʼa nu̱u̱ ɨn ñayí ja kinunkava nu̱u̱ ɨn kuachi kaʼnu: “de cana ro ndá te̱e cúñáʼnú ja̱ jíto nchivi̱ cándíja” (kaʼvi-ní Santiago 5:14, 15). Nda teé kuñaʼnu yaʼa ja espíritu santo ni ka̱ji, ka kutoo-de Jeová ji nda ñayí ñuu-Ya, de ka iyo tuʼva-de tágua chíndeé-de nu̱u̱-yo ja ná kitaʼan vaʼa tuku-yo jín Yandios (Gálatas 6:1).
¿Na̱sa ka chíndeé nda anciano nu̱u̱-yo nú kinunkava-yo nu̱u̱ ɨn kuachi kaʼnu? Uu-de axi uni-de kuu ka chindeé-de nu̱u̱-yo jín Biblia tágua jakuʼun ini-yo ja ndu iyo vaʼa ja ni saʼa-yo. Suni ka taji-de tuʼun vaʼa ji tuʼun ndeé ini ja jiniñuʼun-yo tágua ma kinunkava tuku-yo nu̱u̱ kuachi. Nú ɨn ñayí saʼa-ji ɨn kuachi kaʼnu de nduu ndakani ini-ji, nda anciano tava̱ nda-de ñayí ñukua tágua koo ndoo ini congregación.
NÁ KUTUʼVA KA-YO SƗKƗ TUʼUN YAʼA
Teya̱ʼvi-ní ji jakuʼun vaʼa ini-ní naguá saʼa Jeová tágua chíndeé-Ya nu̱u̱-yo nú kinunkava-yo nu̱u̱ ɨn kuachi kaʼnu.
3. Nú nakani-yo sɨkɨ kuachi saʼa-yo chíndeé ja nduvaʼa-yo
Naani kuachi ja saʼa-yo saʼa ja kukuéká ini Jeová, ñukua kuu ja jiniñuʼun ja nakani-yo nu̱u̱-Ya kuachi ja ni saʼa-yo. Ka kaʼvi-ní Salmo 32:1-5, TNM de ka ndatuʼun-ní sɨkɨ nda tuʼun yaʼa:
¿Nakú ɨn ja vaʼa maa-yo kuu ja nakani-yo nu̱u̱ Jeová kuachi ja ni saʼa-yo de ma chisa̱ʼvi-yo?
Vese nakani-yo kuachi ja ni saʼa-yo nu̱u̱ Jeová, jiniñuʼun ja kakan-yo nu̱u̱ nda anciano ja chíndeé-de nu̱u̱-yo tágua koo vaʼa-yo. Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
¿Na̱sa ni chindeé nda anciano tágua teé ja ni kee nu̱u̱ video ndikó-de nu̱u̱ Jeová?
Ja kánuu kuu ja kaʼan ka̱jí-yo ji kaʼan nda̱a̱-yo nu̱u̱ nda anciano, chi nda maa-de ka iyo-de tágua kuu chíndeé-de nu̱u̱-yo. Ka kaʼvi-ní Santiago 5:16 de ka ndatuʼun-ní sɨkɨ nda tuʼun yaʼa:
¿A káʼán-ní ja nú kaʼan ka̱jí-yo ñama̱ ka kuu chíndeé nda anciano nu̱u̱-yo? ¿Nakú?
Nakani-ní kuachi-ní, kaʼan ka̱jí-ní jín nda anciano de kuataʼvi-ní ja Jeová chíndeé-Ya nu̱u̱-ní.
4. Jeová steʼen-Ya ja too ini-Ya nu̱u̱ nda ñayí ja saʼa ɨn kuachi kaʼnu
Nú ɨn ñayí ja ni saʼa ɨn kuachi kaʼnu nduu ndi̱kó ini-ji de nduu kandija-ji nda tuʼun ja tetiñu Jeová, jiniñuʼun ja tava̱ ñayí ñukua nu̱u̱ ini congregación de ma kuu kaʼan-yo ji kitaʼan-yo jín-ji. Ka kaʼvi-ní 1 Corintios 5:6, 11, de ka ndatuʼun-ní sɨkɨ nda tuʼun yaʼa:
Ta jani ini-yo sɨkɨ ejemplo levadura ja saʼa ja ndáa̱ ñujan sta̱a̱ tila, ¿a káʼán-ní ja ku̱ú stíví nu̱u̱ congregación nú kitaʼan-yo jín ɨn ñayí ja ni saʼa ɨn kuachi kaʼnu de nduu ndakani ini-ji? ¿Nakú?
Sɨkɨ ja nda anciano ka steʼen-de ja too ini Jeová, ka nandukú-de ñayí ja nduu ndutútú ka tágua chíndeé-de nda-ji. De kuáʼa-ji chi ka ndikó-ji nu̱u̱ congregación, ¿nakú? Sɨkɨ ja, vese víjin ni kuu ta ni kee-ji nu̱u̱ congregación, ni chindeé ja ndi̱kó ini-ji (Salmo 141:5, TNM).
¿Na̱sa steʼen Jeová ja too ini-Ya, ndaʼvi ini-Yaji jakuʼun ini-Ya nu̱u̱ ñayí ja saʼa ɨn kuachi?
5. Jeová kunee kaʼnu ini-Ya nú ndakani ini-yo
Jesús ni nakani-de ɨn tuʼun ja chíndeé nu̱u̱-yo tágua jakuʼun ini-yo na̱sa kuu ini Jeová ta ɨn ñayí ndakani ini-ji. Ka kaʼvi-ní Lucas 15:1-7 de ka ndatuʼun-ní sɨkɨ nda tuʼun yaʼa:
¿Naguá steʼen tuʼun yaʼa sɨkɨ Jeová?
Ka kaʼvi-ní Ezequiel 33:11, TNM de ka ndatuʼun-ní sɨkɨ nda tuʼun yaʼa:
¿Naguá kuu saʼa-yo tágua steʼen-yo ja ndakani ini-yo?
Jeová kuu tanu ɨn pastor: ndɨʼvɨ ini-Ya sɨkɨ ndɨʼɨ ñayí ja iyo nu̱u̱ ñuu-Ya.
JA KACHI SAVA NDA ÑAYÍ: “Yu̱ʼú-sa ja kaʼan-sa jín nda anciano. Nú na nakani-sa ja ni saʼa-sa, ka tava̱-de sa̱án nu̱u̱ congregación”.
¿Naguá kuu kachi-ní nu̱u̱ ɨn ñayí ja jani ini sukua?
JA NI KUTUʼVA-YO
Nú saʼa-yo ɨn kuachi kaʼnu de chuʼun ini-yo tágua ma kinunkava tuku-yo, Jeová kunee kaʼnu ini-Ya nu̱u̱-yo.
Tuʼun núku̱ʼun ini
¿Nakú ɨn ja vaʼa maa-yo kuu ja nakani-yo nu̱u̱ Jeová kuachi ja ni saʼa-yo?
¿Naguá jiniñuʼun saʼa-yo tágua kunee kaʼnu ini Jeová nu̱u̱ nda kuachi ja ni saʼa-yo?
Nú saʼa-yo ɨn kuachi kaʼnu, ¿nakú jiniñuʼun ja kakan-yo nu̱u̱ nda anciano tágua chíndeé-de nu̱u̱-yo?
NU̱U̱ NDANIʼI KA-NÍ TUʼUN
Kundeʼe-ní na̱sa ni chindeé nu̱u̱ ɨn teé sɨkɨ ja Jeová kundaʼvi ini-Ya, tanu kachi Isaías 1:18, TNM.
¿Naguá ka saʼa nda anciano tágua chíndeé-de nda ñayí ja saʼa ɨn kuachi kaʼnu?
Nda ñayí ja nduu ndi̱kó ini suni steʼen ja too ini ji ja ndaʼvi ini nu̱u̱-ji. ¿Na̱sa?
Kaʼvi-ní nu̱u̱ tuʼun sɨkɨ ñayí na̱sa ɨn teé ni jini-de ja Jeová kúni-Ya ja ndikó-de nu̱u̱ ichi nda̱a̱ “Ni kúni-sa ndikó-sa nu̱u̱ Jeová”.
“Tuʼun nda̱a̱ Yandios ni sa̱ma ini-ji” (La Atalaya, 1 yo̱o̱ abril kuiya 2012)