LECCIÓN 28
Steʼen-ní ja nakuetaʼvi-ní ja ni saʼa Jeová ji Jesús ja sɨkɨ-ní
¿Na̱sa kuu ini-ní ta ɨn ñayí kitaʼan jín-ní taji ɨn ndatiñu vii tuni? Ja nda̱a̱, kusii tuni ini-ní de kúni-ní steʼen-ní nu̱u̱ amigo-ní ja teya̱ʼvi-ní ndatiñu ni skutaʼvi-ji nu̱u̱ maa-ní. Jeová ji Jesús ni ka jinimani̱ ɨn ja kánuu tuni nu̱u̱ ndɨʼɨ ñayí ja kuu: ja skáku. Ná kundeʼe-yo na̱sa kuu steʼen-yo ja nakuetaʼvi-yo.
1. ¿Na̱sa kuu steʼen-yo ja teya̱ʼvi-yo ja ni saʼa Yandios ji Cristo sɨkɨ nda-yo?
Biblia kachi ja “ndɨʼɨ ja iyo fe nu̱u̱-de” —nu̱u̱ Jesús— kuu kuteku-ji nɨkani (Juan 3:16, TNM). ¿Na̱sa steʼen-yo ja nevaʼa-yo fe nu̱u̱ Jesús? Ma sú ni̱ ja kandija-yo nu̱u̱-de; suni steʼen-yo jín nda tiñu ja saʼa-yo (Santiago 2:17). Ta steʼen-yo fe jín nda tiñu saʼa-yo ji tuʼun kaʼan-yo, saʼa ndakui-yo ja kitaʼan-yo jín Jesús ji Ta̱tá-de, Jeová (ka kaʼvi-ní Juan 14:21).
2. ¿Nde kɨvɨ kánuu kuu steʼen-yo ja nakuetaʼvi-yo nu̱u̱ Jeová ji Jesús?
Jakuáa̱ ta nchaʼa ka kúu̱-de, Jesús ni steʼen-de nu̱u̱ nda ñayí ndiki̱ nu̱u̱-de na̱sa kuu ka steʼen-de ja nakuetaʼvi nda-de ja ni so̱ko̱-de maa-de. De ni jani̱-de ɨn kɨvɨ kánuu tuni ja Biblia xnaa-ni ja ni “Kuxíní Jesús” ji suni nani Kɨvɨ ndaka̱ʼa̱n ini ja ni ji̱ʼi̱ Cristo (1 Corintios 11:20, TNM). Jesús ni jani̱-de tágua nda apóstol —ji, ichi nu̱u̱ ka, ndɨʼɨ nda cristiano nda̱a̱— ndaka̱ʼa̱n-ji ja ni ji̱ʼi̱-de sɨkɨ níí ñuuyɨvɨ́. De ja kaʼan-yo kɨvɨ kánuu yaʼa, Jesús ni tetiñu: “Níní saʼa nda-ro suʼva tágua ndaka̱ʼa̱n ini nda-ro nduʼu” (Lucas 22:19, TNM). Ta jaʼan-ní nu̱u̱ Kɨvɨ ndaka̱ʼa̱n ini ja ni ji̱ʼi̱ Cristo, steʼen-ní ja teya̱ʼvi-ní ja too ini Jeová ji Jesús nu̱u̱ nda-yo.
NÁ KUTUʼVA KA-YO SƗKƗ TUʼUN YAʼA
Ná kundeʼe-yo naguá kuu saʼa ka-yo tágua steʼen-yo ja nakuetaʼvi-yo ja kutoo tuni Jeová ji Jesús nu̱u̱ nda-yo. Ji kundeʼe-yo ja kánuu tuni Kɨvɨ ndaka̱ʼa̱n ini ja ni ji̱ʼi̱ Cristo.
3. Ja nakuetaʼvi skanda ini-yo ja saʼa-yo
Kani ini-ní ja kandee-ní nu̱u̱ ndute de ɨn ñayí skáku nu̱u̱-ní. ¿A ñama̱ naa ini-ní ja ni saʼa ñayí ñukua sɨkɨ maa-ní? ¿Axi ndukú-ní na̱sa steʼen-ní ja nakuetaʼvi-ní nu̱u̱-ji?
Jeová taji-Ya ja teku nu̱u̱ nda-yo. Ka kaʼvi-ní 1 Juan 4:8-10 de ka ndatuʼun-ní sɨkɨ nda tuʼun yaʼa:
¿Nakú kuu ja ni so̱ko̱ Jesús maa-de kuu ɨn ja vii tuni ja ni skutaʼvi-yo?
¿Na̱sa kuu ini-ní ta jani xini-ní ja ni saʼa Jeová ji Seʼe yɨɨ-Ya sɨkɨ maa-ní?
¿Na̱sa kuu steʼen-yo ja teya̱ʼvi-yo ja ni saʼa Jeová ji Jesús sɨkɨ nda-yo? Ka kaʼvi-ní 2 Corintios 5:15 ji suni 1 Juan 4:11 ji 5:3. Ta ndɨʼɨ kaʼvi-ní nda versículo, de ka ndatuʼun-ní sɨkɨ nda tuʼun yaʼa:
¿Na̱sa kuu steʼen-yo ja nakuetaʼvi-yo?
4. Ná saʼa-yo tanu Jesús
Suni kuu steʼen-yo ja nakuetaʼvi-yo nú saʼa-yo tanu ni saʼa Jesús. Ka kaʼvi-ní 1 Pedro 2:21 de ka ndatuʼun-ní sɨkɨ nda tuʼun yaʼa:
¿Na̱sa kuu kundiki̱ tu̱u̱n-ní nda ja ni saʼa Jesús?
Jesús ni kutoo-de Tuʼun Yandios, ni steʼen-de nda tuʼun vaʼa ji ni chindeé-de nu̱u̱ inka ñayí.
5. Ná núku̱n ini-yo Kɨvɨ ndaka̱ʼa̱n ini ja ni ji̱ʼi̱ Cristo
Tágua kuni-ní ja ni kuu kɨvɨ xinañuʼun ja ni jakoo kɨvɨ ni Kuxíní Jesús, ka kaʼvi-ní Lucas 22:14, 19, 20, TNM. Ñukua de ka ndatuʼun-ní sɨkɨ nda tuʼun yaʼa:
¿Naguá ni kuu kɨvɨ ni Kuxíní Jesús?
¿Naguá kúni kaʼan sta̱a̱ tila ji vino? (Ka kundee-ní nda versículo 19 ji 20).
Jesús ni kúni-de ja nda discípulo-de na núku̱n ini nda-de ja ni Kuxíní Jesús ɨn ji̱chi nu̱u̱ kuiya, kɨvɨ ni ji̱ʼi̱-de. Ja ñukua kuu, ja nda testigo Jeová ka ndutútú-sa ndɨʼɨ kuiya tágua núku̱n ini-yo ja ni ji̱ʼi̱ Cristo, de saʼa-yo tanu ni steʼen maa-de. Tágua kuni-ní ja kánuu tuni kɨvɨ yaʼa, ka kundeʼe-ní VIDEO. Ñukua de ka ndatuʼun-ní sɨkɨ nda tuʼun yaʼa:
¿Naguá iyo nu̱u̱ Kɨvɨ ndaka̱ʼa̱n ini ja ni ji̱ʼi̱ Cristo?
Sta̱a̱ tila ji vino ka kuu símbolo. Sta̱a̱ tila kúni kaʼan yɨkɨ kuñu ndoo ja nevaʼa Jesús, ja ni so̱ko̱-de sɨkɨ ndɨʼɨ nda-yo. De vino kúni kaʼan ni̱ñi̱-de.
JA KACHI SAVA NDA ÑAYÍ: “Tágua ka̱ku-ní, nú kandija-ní nu̱u̱ Jesús ñukua ni̱ kuu”.
¿Na̱sa kuatiñu-ní Juan 3:16, TNM ji Santiago 2:17 tágua steʼen-ní ja suni iyo ka tiñu saʼa-yo?
JA NI KUTUʼVA-YO
Steʼen-yo ja nakuetaʼvi-yo ja ni saʼa Jesús sɨkɨ nda-yo ja nevaʼa-yo fe nu̱u̱-de ji ndutútú-yo Kɨvɨ ndaka̱ʼa̱n ini ja ni ji̱ʼi̱ Cristo.
Tuʼun núku̱ʼun ini
¿Na̱sa steʼen ɨn ñayí ja nevaʼa fe nu̱u̱ Jesús?
¿A kúni-ní steʼen-ní nu̱u̱ Jeová ji Jesús ja teya̱ʼvi-ní ja ni ka saʼa-de sɨkɨ maa-ní? ¿Na̱sa kúni-ní saʼa-ní?
¿Nakú kánuu tuni ja kiʼin-yo Kɨvɨ ndaka̱ʼa̱n ini ja ni ji̱ʼi̱ Cristo?
NU̱U̱ NDANIʼI KA-NÍ TUʼUN
Kunini-ní ja skanda ini-yo ja saʼa-yo kuu ja ni ji̱ʼi̱ Cristo.
Kutuʼva ka-ní sɨkɨ fe de na̱sa kuu steʼen-ní.
“Ná kunevaʼa-yo fe nu̱u̱ nda tuʼun ja kaʼan kají Jeová” (La Atalaya, yo̱o̱ octubre kuiya 2016)
Ɨn ñaʼan ni sa̱ma ta ndee-ña ta ni jakuʼun ini-ña ja kúni kaʼan ja ni so̱ko̱ Jesús maa-de. Kaʼvi-ní tuʼun ja nakani sɨkɨ-ña “Iyo ndoo-sa, ndee vaʼa-sa ji iyo mani̱ ini-sa”.
“Tuʼun nda̱a̱ Yandios ni sa̱ma ini-ji” (La Atalaya, 1 yo̱o̱ agosto kuiya 2011)
Kundeʼe-ní nakú jaku ni̱ ñayí ka yaji sta̱a̱ tila ji ka jíʼi-ji vino nu̱u̱ Kɨvɨ ndaka̱ʼa̱n ini ja ni ji̱ʼi̱ Cristo.