LECCIÓN 43
Nda cristiano ji nda ndi̱xí
Nu̱u̱ níí ñuuyɨvɨ́, kuaʼa ñayí siin siin ka jani ini-ji sɨkɨ nda ndi̱xí. Iyo ji̱chi ja sava nda ñayí ka jíʼi-ji jín nda amigo-ji. Inka-ji nduu ka jíʼi kuiti̱-ji ndi̱xí. De iyo ñayí ja ka jíʼi-ji nde ka ji̱ni-ji. ¿Naguá kachi Biblia sɨkɨ nda ndi̱xí?
1. ¿A iyo vaʼa ja koʼo-yo ndi̱xí?
Biblia nduu jási̱ ja koʼo-yo ndi̱xí. Chi ja kachi kuu, “vino ja saʼa sii ini nu̱u̱ anu nda ñayí” kuu inka ja ni skutaʼvi Jeová nu̱u̱-yo (Salmo 104:14, 15, TNM). Suni, nu̱u̱ Biblia kachi ja nda teé ji ñaʼan ja ni ka iñi tu̱u̱n-ji nu̱u̱ Yandios ni ka jíʼi-ji jaku ndi̱xí (1 Timoteo 5:23).
2. ¿Na tuʼun kachi Biblia nu̱u̱ nda ñayí ja jani ini-ji ja koʼo-ji ndi̱xí?
Jeová nduu taʼa̱n ini-Ya ñayí ji̱ni, ji suni ja koʼo tuni-ji ndi̱xí (Gálatas 5:21). Biblia kachi: “Ma kuiñi-ro ma̱ʼñú nda ja jíʼi tuni vino” (Proverbios 23:20, TNM). Ja ñukua kuu, nú jani ini-yo ja koʼo-yo ndi̱xí—ta iyo matuʼun-yo axi ta iyo inka ñayí—, ma koʼo tuni-yo tágua ma stíví-yo ja kaʼan-yo ji ja saʼa-yo, axi ja ma kuu kani vaʼa ka xini-yo. Suni ma koʼo tuni-yo tágua ma kukúʼu̱-yo. Nú víjin kuu nu̱u̱-yo ja koʼo-yo jaku ni̱, jiniñuʼun ja sndoo̱-yo ja koʼo-yo ndi̱xí.
3. ¿Na̱sa steʼen-yo ja iyo yɨñuʼún-yo ja jani ini inka ñayí?
Ɨn ɨn maa-yo ka̱ji nú koʼo-yo ndi̱xí axi nduu. Ma kuu kaʼan ndevaʼa-yo nú ɨn ñayí ja ka̱ji koʼo-ji jaku ndi̱xí. Suni ma kuu tetúu-yo ɨn ñayí ja koʼo-ji nú nduu kuu ini-ji saʼa-ji (Romanos 14:10). De ma koʼo-yo nú nduu taʼa̱n ini inka ñayí (kaʼvi-ní Romanos 14:21). Ndɨʼɨ nda-yo, cristiano ndukú-yo “sa̱ʼá ó ja̱ váʼa táʼán ó, nsu̱ú maá-ni ja̱ váʼa maá ó” (kaʼvi-ní 1 Corintios 10:23, 24).
NÁ KUTUʼVA KA-YO SƗKƗ TUʼUN YAʼA
Ná kundeʼe-yo sava nda tuʼun ja yoso nu̱u̱ Biblia ja chíndeé nu̱u̱-yo ja ka̱ji-yo nú koʼo-yo ndi̱xí axi nduu, de nasaa koʼo-yo. Suni kundeʼe-yo naguá saʼa-ní tágua sndoo̱-ní ja jíʼi-ní.
4. Ka̱ji-ní nú koʼo-ní ndi̱xí axi nduu
¿Naguá ni jani ini Jesús sɨkɨ ja jíʼi ndi̱xí? Tágua ndaniʼi-yo tuʼun xndikó, ná kundeʼe-yo milagro xinañuʼun ja ni saʼa-de. Ka kaʼvi-ní Juan 2:1-11 de ka ndatuʼun-ní sɨkɨ nda tuʼun yaʼa:
¿Naguá steʼen nu̱u̱-yo tuʼun yaʼa sɨkɨ na̱sa ndeʼe Jesús ndi̱xí ji nda ñayí ja ka jíʼi?
Sɨkɨ ja Jesús nduu ni ndeʼe-de ja ndi̱xí kuu ɨn ja ndevaʼa, ¿naguá jiniñuʼun ja kani xini ɨn cristiano sɨkɨ ɨn ñayí ja jíʼi?
De mita, sɨkɨ ja ɨn cristiano kuu koʼo-de jaku ndi̱xí nduu kúni kaʼan ja niini kuu saʼa-de sukua. Ka kaʼvi-ní Proverbios 22:3, TNM de ka ndatuʼun-ní nú iyo vaʼa ja ɨn ñayí koʼo-ji ta saʼa-ji nda tiñu yaʼa:
Ta skáka-ní ɨn carru axi máquina.
Kuu-ní ɨn ñaʼan ja ñúʼun seʼe.
Ni kaʼan teé tátán ja ma kuu koʼo-ní ndi̱xí.
Víjin kuu nu̱u̱-ní nasaa ndi̱xí koʼo-ní.
Ley nduu jeʼe tuʼun ja koʼo-ní ndi̱xí.
Iyo-ní jín ɨn ñayí ja ni ka̱ji-ji ja ma koʼo ka-ji ndi̱xí chi kɨvɨ ichi yáta̱ ni jíʼi tuni-ji.
¿A jiniñuʼun ja kuaʼa-ní ndi̱xí nu̱u̱ ɨn viko tánda̱ʼá axi nu̱u̱ iyo inka viko? Tágua kuni-ní na tiñu tíin kuenta-ní, ka kundeʼe-ní VIDEO.
Ka kaʼvi-ní Romanos 13:13 ji 1 Corintios 10:31, 32. Ta jinú ja ka kaʼvi-ní nda texto, ka ndatuʼun-ní sɨkɨ nda tuʼun yaʼa:
¿Na̱sa kuu chíndeé nu̱u̱-ní tuʼun yaʼa tágua ka̱ji vaʼa-ní ja saʼa-ní ja kusii ini Jeová?
Ɨn ɨn cristiano kani xini-ji nú koʼo-ji ndi̱xí axi nduu. Koo ji̱chi ja ɨn cristiano kuu koʼo-ji de suni koo ji̱chi ja ma kuu saʼa-ji.
5. Kani xini-ní nasaa koʼo-ní
Nú kani xini-ní ja koʼo-ní ndi̱xí, kunaʼán-ní, ja vese Jeová nduu ndeʼe juʼvi-Ya ja koʼo-yo, ja nduu taʼa̱n ini-Ya kuu ja koʼo-yo kuaʼa tuni ndi̱xí. ¿Nakú? Ka kaʼvi-ní Oseas 4:11, 18, TNM de ka ndatuʼun-ní sɨkɨ nda tuʼun yaʼa:
¿Naguá kenda ku̱ú ta ɨn ñayí jíʼi-ji kuaʼa tuni ndi̱xí?
¿Naguá kuu chíndeé nu̱u̱-yo tágua ma ya̱ʼa ndi̱xí koʼo-yo? Jiniñuʼun ja kuni vaʼa-yo maa-yo, tágua kuni-yo naguá kuu ja ma kuu saʼa-yo. Ka kaʼvi-ní Proverbios 11:2, TNM de ka ndatuʼun-ní sɨkɨ nda tuʼun yaʼa:
¿Nakú ja vaʼa kuu ja kani vaʼa xini-ní nasaa ndi̱xí kuu koʼo-ní?
6. Kuji̱ka-ní nu̱u̱ ndi̱xí
Kundeʼe-ní naguá ni chindeé nu̱u̱ ɨn teé tágua kuji̱ka-de nu̱u̱ ndi̱xí. Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
¿Naguá ni saʼa Dimitri ta ni jíʼi-de ndi̱xí?
¿Xinañuʼun ji̱chi ja ni kúni-de sndoo̱-de ndi̱xí a ni kuu ni saʼa-de?
¿Naguá ni saʼa-de tágua kuu sndoo̱-de ndi̱xí?
Ka kaʼvi-ní 1 Corintios 6:10, 11 de ka ndatuʼun-ní sɨkɨ nda tuʼun yaʼa:
¿A ɨn kuachi kaʼnu kuu ja ji̱ni ɨn ñayí? ¿Nakú?
¿Na̱sa jíni̱-yo ja ɨn ñayí ja jíʼi tuni-ji ndi̱xí kuu sa̱ma-ji?
Ka kaʼvi-ní Mateo 5:30, TNM de ka ndatuʼun-ní sɨkɨ nda tuʼun yaʼa:
Jín ejemplo yaʼa ja teʼnde ɨn ndaʼá, Jesús ni kúni-de steʼen-de ja kánuu ja chuʼun ini-yo sa̱ma-yo tágua kuataʼvi Yandios ja saʼa-yo. Nú chuʼun ini-ní ja sndoo̱-ní ndi̱xí, ¿naguá jiniñuʼun ja saʼa-ní?a
Ka kaʼvi-ní 1 Corintios 15:33 de ka ndatuʼun-ní sɨkɨ nda tuʼun yaʼa:
¿Naguá kuu nu̱u̱ maa-ní nú kitaʼan-ní jín nda ñayí ja ka jíʼi tuni ndi̱xí?
JA KA JIKATUʼUN SAVA NDA ÑAYÍ: “¿A iyo vaʼa ja koʼo-yo ndi̱xí?”.
¿Naguá kachi-ní?
JA NI KUTUʼVA-YO
Ndi̱xí kuu ɨn ja ni jinimani̱ Jeová tágua kusii ini-yo, de ja nduu taʼa̱n ini-Ya kuu ja ji̱ni ɨn ñayí ji suni ja koʼo tuni-ji.
Tuʼun núku̱ʼun ini
¿Naguá kachi Biblia sɨkɨ nda ndi̱xí?
¿Na tundoʼo kunevaʼa ɨn ñayí ja jíʼi tuni-ji ndi̱xí?
¿Na̱sa steʼen-yo ja iyo yɨñuʼún-yo ta inka ñayí ka̱ji-ji ja ko’o-ji ndi̱xí?
NU̱U̱ NDANIʼI KA-NÍ TUʼUN
¿Naguá jiniñuʼun tíin kuenta nda suchí kua̱chi ta ka kúni-ji koʼo-ji ndi̱xí?
Kutuʼva-ní naguá jiniñuʼun saʼa-ní tágua kundeé-ní naani tundoʼo iyo-ní jín ndi̱xí.
“Na̱sa kuu saʼa-yo tágua ma koʼo tuni-yo ndi̱xí” (La Atalaya, 1 yo̱o̱ enero kuiya 2010)
¿A iyo vaʼa ja nda cristiano ka saʼa-ji brindis?
“Nda tuʼun jikatuʼun nda ñayí” (La Atalaya, 15 yo̱o̱ febrero kuiya 2007)
Kaʼvi-ní na̱sa ɨn teé ni kundeé-de sndoo̱-de ja jíʼi-de ndi̱xí nu̱u̱ tuʼun nakani sɨkɨ nda ñayí “Ni kuu-sa ɨn ñayí ja ni jíʼi tuni ndi̱xí”.
“Tuʼun nda̱a̱ Yandios ni sa̱ma ini-ji” (La Atalaya, 1 yo̱o̱ mayo kuiya 2012)
a Nda ñayí ja ka jíʼi tuni ndi̱xí sanaa jiniñuʼun ja ɨn ñayí tuʼva chíndeé nu̱u̱-ji. Kuaʼa nda teé tátán ka kachi-de ja nda ñayí ja ni iyo tundoʼo jín ndi̱xí jiniñuʼun ja ma ka koʼo kuiti̱-ji.