LECCIÓN 15
¿Nde kuu Jesús?
Jesús kuu ɨn ñayí ja kuaʼa tuni ñayí jíni̱ nde kɨvɨ ichi yáta̱. De, vese ka jíni̱-ji sɨvɨ-de, jaku ni̱ ñayí kuu ja ka jíni̱ vaʼa-de, ji kuaʼa-ji siin siin ka jani xini-ji nde ɨn ni kuu ndija Jesús. ¿Naguá kuu ja steʼen Biblia sɨkɨ-de?
1. ¿Nde kuu Jesús?
Jesús kuu ɨn espíritu ndakui ja ndee andɨvɨ́. Jesús kuu ja xinañuʼun ja ni saʼa Jeová ñukua de ni saʼa-Ya ndɨʼɨ ka ja iyo. Ja ñukua kuu ja xnani-de “ja xinañuʼun ja ni jakoo nu̱u̱ nda̱ká ja iyo” (Colosenses 1:15, TNM). Biblia xnani Jesús “Seʼe yɨɨ́ matuʼun ni̱-Ya”, chi Jesús kuu ja xinañuʼun ja ni saʼa Jeová (Juan 3:16, TNM). Jesús ni satiñu tútú-de jín Ta̱tá-de, Jeová, ta ni chindeé-de tágua kuvaʼa sava ka nda ndatiñu (kaʼvi-ní Proverbios 8:30, TNM). De ndúu̱-de ka kitaʼan vaʼa ka-de nde mita. Jesús kuu “Tu̱ʼun”, ja kúni kaʼan, teé ja nɨkani kaʼan Tuʼun Yandios, ja ndasiáʼa nda tuʼun ja kúni Ta̱tá-de (Juan 1:14).
2. ¿Nakú ni kiji Jesús nu̱u̱ Ñuʼun?
Iyo ta 2.000 kuiya ichi yáta̱, Jeová ni jatiñu-Ya espíritu santo-Ya tágua saʼa-Ya ɨn milagro: ni siáʼa-Ya ja teku Jesús nde andɨvɨ́ nu̱u̱ chijin ɨn ñaʼan suchí ja nduu na teé ni kíxi̱n jín-ña ja ni nani-ña María. De sɨkɨ ja ñukua, Jesús ni kaku-de tanu ɨn ñayí (kaʼvi-ní Lucas 1:34, 35). Maa-de ni kiji-de nu̱u̱ Ñuʼun tágua kuu-de Cristo, axi Mesías, ji tágua skáku-de ñuuyɨvɨ́.a Ndɨʼɨ nda profecía Biblia ja kachi sɨkɨ Mesías ni kunda̱a̱ sɨkɨ-de. Ñukua ni saʼa ja nda ñayí ndakuni ji-de tanu “Cristo, [...] Se̱ʼe Ya̱a̱ Dios, Ya̱a̱ ja̱ técu̱ níí cání” (Mateo 16:16).
3. ¿Ndenu iyo Jesús mita?
Ta ni ji̱ʼi̱-de, Jesús ni nateku-de tanu ɨn espíritu de ni ndikó-de andɨvɨ́. Ñukua “ni̱ sa̱ʼá Ya̱a̱ Dios ja̱ vii̱ ndasí ni̱ nduñáʼnú ya̱” (Filipenses 2:9). Mita Jesús tatuni-de; de matuʼun ni̱ Jeová kuu ja ndakui ka nu̱u̱-de.
NÁ KUTUʼVA KA-YO SƗKƗ TUʼUN YAʼA
Ná kundeʼe ka-yo nde kuu ndija Jesús de nakú kánuu tuni ja kuni vaʼa-yo sɨkɨ-de.
4. Jesús nduu kuu-de Yandios Ndakui tuni
Biblia kachi ja vese Jesús kuu-de ɨn ángel ndakui andɨvɨ́, kandija-de nu̱u̱ Jeová, ja kuu Yandios-de ji Ta̱tá-de. ¿Nakú kachi-yo sukua? Ka kundeʼe-ní VIDEO tágua jakuʼun ini-ní ja steʼen Biblia sɨkɨ nde kuu Jesús ji Yandios Ndakui tuni.
Nda texto yaʼa chíndeé nu̱u̱-yo ja jakuʼun ini-yo nde kuu Jeová ji Jesucristo. Ka kaʼvi-ní ɨn ɨn texto de ka ndatuʼun-ní sɨkɨ nda tuʼun yaʼa:
Ka kaʼvi-ní Lucas 1:30-32.
Tanu ni kachi ángel ¿nakú siin kuu Jesús ji Jeová, “Ya̱a̱ cúñáʼnú ndasí”?
Ka kaʼvi-ní Mateo 3:16, 17.
¿Naguá ni kachi ndusu yuʼu nde andɨvɨ́ ta ni janduté Jesús?
¿Na ndusu yuʼu ni kuu káʼán maa-ní?
Ka kaʼvi-ní Juan 14:28.
¿Nde kuu ja kuñaʼnu ka: ɨn ta̱tá axi seʼe-de?
¿Naguá ni kúni kachi Jesús ta ni xnani-de nu̱u̱ Jeová “Tatá”?
Ka kaʼvi-ní Juan 12:49.
¿A ni kaʼan Jesús ja maa-de ji Ta̱tá-de kuu ɨn ni̱ ñayí? ¿Na̱sa káʼán maa-ní?
5. Jesús ni kenda kuu Mesías
Nu̱u̱ Biblia vaji kuaʼa profecía ja chindeé ñayí tágua ndakuni-ji Mesías, axi ja ni ka̱ji Yandios tágua skáku níí ñuuyɨvɨ́. Ka kundeʼe-ní VIDEO, nu̱u̱ kachi sɨkɨ sava nda profecía ja ni kunda̱a̱ sɨkɨ Jesús ta ni iyo-de nu̱u̱ Ñuʼun.
Ka kaʼvi-ní sɨkɨ nda profecía ja vaji nu̱u̱ Biblia de ka ndatuʼun-ní sɨkɨ nda tuʼun yaʼa:
Ka kaʼvi-ní Miqueas 5:2, TNM tágua kutuʼva-ní ndenu kaku Mesías.b
¿A ni kunda̱a̱ profecía yaʼa ta ni kaku Jesús? (Mateo 2:1).
Ka kaʼvi-ní Salmo 34:20 ji Zacarías 12:10, TNM tágua ka kuni-ní sava nda tuʼun ja ni kachi sɨkɨ ta kúu̱ Mesías.
¿A ni kunda̱a̱ nda profecía yaʼa? (Juan 19:33-37).
¿A káʼán-ní ja Jesús ni skanda-de nda tiñu tágua kunda̱a̱ nda profecía yaʼa?
De, ¿naguá kachi ndɨʼɨ nda tuʼun yaʼa sɨkɨ Jesús nu̱u̱ maa-ní?
6. Ja kuni-yo nu̱u̱ Jesús kuu chíndeé nu̱u̱-yo
Biblia kachi nakú kánuu tuni ja kuni-yo Jesús ji tiñu ja ni jeʼe Yandios nu̱u̱-de. Ka kaʼvi-ní Juan 14:6, TNM ji 17:3, de ka ndatuʼun-ní sɨkɨ nda tuʼun yaʼa:
¿Nakú kánuu tuni ja kuni-yo Jesús?
Jesús ni nakune-de ichi tágua kuu kitaʼan-yo jín Yandios ji ni steʼen-de ja nda̱a̱ sɨkɨ Jeová. Suni, kuu kuteku nɨkani-yo ja sɨkɨ-de.
JA KACHI SAVA NDA ÑAYÍ: “Nda testigo Jeová nduu ka kandija nu̱u̱ Jesús”.
¿Naguá kachi maa-ní?
JA NI KUTUʼVA-YO
Jesús kuu ɨn espíritu ndakui, Seʼe yɨɨ́ Yandios ji Mesías.
Tuʼun núku̱ʼun ini
¿Nakú xnani Jesús “ja xinañuʼun ja ni jakoo nu̱u̱ nda̱ká ja iyo”?
¿Naguá ni saʼa Jesús ta nchaʼa ka kiji-de nu̱u̱ Ñuʼun?
¿Na̱sa jíni̱-yo ja Jesús kuu Mesías?
NU̱U̱ NDANIʼI KA-NÍ TUʼUN
Kutuʼva ka-ní nda tuʼun ja steʼen ja Jesús kuu Mesías
“¿A steʼen nda profecía ja vaji nu̱u̱ Biblia ja Jesús kuu Mesías?” (Artículo nu̱u̱ jw.org)
Kundeʼe-ní nú nu̱u̱ Biblia steʼen ja Yandios ni kenda-Ya kuu-Ya Ta̱tá Jesús tanu nda ñayí ñuuyɨvɨ́ née-ji nda seʼe-ji.
“¿Nakú xnani Jesús Seʼe yɨɨ́ Yandios?” (Artículo nu̱u̱ jw.org)
Kutuʼva-ní nakú trinidad ma sú ɨn tuʼun ja steʼen Biblia kuu.
“Jesús: ¿a kuu Yandios?” (La Atalaya, 1 yo̱o̱ abril kuiya 2009)
Kaʼvi-ní na̱sa ni sa̱ma na̱sa ndee ɨn ñaʼan ta ni skuaʼa-ña ja kachi Biblia sɨkɨ Jesús.
a Nu̱u̱ nda lección 26 ji 27 kachi nakú ñuuyɨvɨ́ jiniñuʼun ja ka̱ku-ji de na̱sa skáku Jesús nda-yo.