Magoni

Ndɔmi jisia ti bukui ji hu ti lɔnyangoi. Ti gbuani Ngewɔ Layei hu lɔ, Baibui. Ta hugɛ lɔ a bie na kinii wuenga, i gbua wati na ma wɔɔ Ngewɔ tatoni a haiŋsia gbatɛ la haŋ i too mu nda wati ji ma. Tao ta hugɛ lɔ gbɔma a bie na Ngewɔ magaanga pie va kulɔma.

Bukui ji a gbɔ bi ma bi nungei nasia gɔɔ Baibui yɛpɛni kɔlongɔ ti ma, kɛ na kinii ti pieni. A yɛpɛ lɔ gbɔma kɔlongɔ kunafɔ lɛvui na ma Ngewɔ magaanga mu va, ndunyama Alijɛni hu.

Ndɔma 116 mia bukui ji hu. Kaka wayakpa mia ti gɔɛkɔɛngɔ la hu. Kaka lato ma gbi lee, kɔlɔ laa lɔ na na a yɛpɛ kulo kɔlongɔ ye kakei na ma. Ye ndɔmi jisia ti nyɛingoi sia lee ye hindeisia ti yɛ a wue la. Ji a gbɔ bi ma bi kɔɔ sia hindeisia ti ye wueni la.

Ndɔmi jisia tii gbakpauni kaa va. Jialenga, wu gboto ma wua gulɔ wu kaa wuɛkpe va. Ndebla wua vui bɛ wua tɔɔ kɛ wu lenga mumuisia ti gohu a nɛilɔ kɔ wu ya bukui ji gaa ti gama a wati gbi. Wua kɔɔ lɔ kɛ bukui ji nyandengoi jialenga va, kɛ kpakuisia.

Ndɔmi gɛlɛma gbi lee, Baibu wuisia kɛ kpambisia ti nyɛingoi na. Kɔnɛ ti gaa, gbɛva see na mia ye ndɔmi jisia ti gbuani na.