Sabui Na Va Ti Baani a Kata Nyande Wai Na

TƆ LƐ naa gbɔɔ wuema. Ngewɔ lɔ Adam tia Iv gbɛma kata nyande wai hu. Bi kɔɔ gbɛva le?

Ti hinda nyamui lɔ wuenga. Na va mia Jɛhova ti gbɛma. Bi kɔɔ lɔ gbɔɔ Adam tia Iv ti pieni?

Ngewɔ ndeilɔ ti ma yɛ ta nguweisia mɛ ti katei hu. Kɛɛ ngulu yia yɛɛ katei na hu, na Ngewɔ ndeni ti ma yɛ taa ye nguwei mɛ, yɛ ti mɛnga ta haa lɔ. Tao bi kɔɔ lɔ kɛ ii nyandeni kɔ numu bi hankei wumbu nahi bi wo yana, hiye? Tɔnyi mia, kɛɛ bi kɔɔ gbɔɔ wueni?

Foo yia ma, ji Iv yiakpe yɛ katei hu, kali yɛpɛilɔ ngi gama. I nde ngi ma yɛ i nguwei na mɛ Ngewɔ ndeni ti ma yɛ taa mɛ. Kɛɛ Jɛhova ii kali gbatɛni yɛpɛ va. Ji ndema lɔ mu ma kɛ numu mia pieni i wue bɛ kali mia yɛpɛ ma. Ye mia pieni naa i wue bɛ kali mia yɛpɛ ma?

Adam yana. Maikei nasia Ngewɔ ti gbatɛni pɛiŋ aa ya ndunyi gbatɛ, ye ngla mia pieni i gɛ bɛ kali mia yɛpɛ ma. Ye maikei ji, muɛ ngi lɔ. I taikpe huwɔlɔilɔ wa, tao i tatoilɔ a gii la kɛ kungɔ i wue sia Ngewɔ na. Ngi longɔ yɛla nunga ti wolo ngi ma, sia taa wolo Ngewɔ ma.

Ye maikei ji guilɔ i Iv hugbowa, ji i ndeni Iv ma yɛ a wue lɔ sia Ngewɔ na ji a nguwei na mɛ. Iv lailɔ a ngie kɛ i mɛnga, kɛ Adam bɛ mɛnga. Adam tia Iv, tii woloni Ngewɔ ma, famia ti baani a kata nyandi na.

Kɛɛ na hu gbi, Ngewɔ wama piema ndunyi hu kpɛlɛ i wue sia kata nyandi na hu yɛna. Sia mua yɛ lɛma gulɔma a bukui ji gaala, ba kaa wue lɔ kɔlongɔ kpɔmi na ma ba pie kɔ ndunyi ji hu i wue sia katei na hu yɛna. Kɛɛ mu tɔ lɛ naa gbɔɔ wueni a Adam tia Iv.