Evanelia Mataio
Aonega taudia mairiveina kahana amo
2 Iesu na Betelehem Iudea ai e vara, King Herod ese Iudea e lohiaia negana ai, aonega taudia be dina dae kahana amo Ierusalem ai e lasi. 2 Idia na e henanadai, eto, Iuda taudia edia pavapava harihari eme vara be edeseni ai? Badina be ena hisiu mairiveina kahana ai a itaia, bona itomadiho-henina ama. 3 King Herod ese una hereva e kamonai negana ai, kudouna e hetaha; Ierusalem taudia iboudiai danu. 4 Bena ia ese hahelaḡa taudia iboudiai bona itorena taudia e haboudia, e nanadaidia, eto, Keriso be edeseni ai baine vara e tomamu? 5 Bena idia na e haere henia, eto, Betelehem Iudea ai; badina be peroveta tauna ini e torea toma:
6 Oi danu Betelehem e, Iuda tanona ai,
Iuda lohiadia bogaragidiai oi na dia gabe tauna,
Badina be hahekau tauna na oiemu amo bainema,
Ia ese egu bese Israel baine reḡua.
7 Bena Herod ese aonega taudia e boiridia hehuni, hisiu ena hedinarai negana e nanadailaia ḡoevaḡoeva. 8 Bena e siaidia lao, Betelehem baela; eto, Aola, mero maraḡina ba ha tahua goadagoada, bona ba davaria negana ai bame hadibagu, bena lau danu baina vasi toma diho. 9 Idia na hanua pavapavana erena e kamonaia, bena vada ela. Hari hisiu, mairiveina kahana ai e itaia ḡauna, ese e gunalaidia, ela bona mero maraḡina ena noho gabuna daenai e mia. 10 Idia na hisiu e itaiava ai na e moale hisi dae. 11 Bena ruma ai e raka vareai, mero maraḡina sinana Maria ida e itadia, bena e goru goru diho, e toma henia diho. Bena edia kohu e hulala, herahia e henia, gold bona muramura mai bonana bona dahudahu muramurana. 12 Bena Dirava ese nihi ai e hamaorodia, eto, Herod dekena basio lou lao. Taunabunai idau dala amo edia hanua e lou henia.
Iesu e heaulaia, Aigupto ela
13 Idia e lou murinai, Lohiabada ena aneru ese nihi ai Iosef ma e hahedinarai henia, eto, A tore isi, mero maraḡina sinana ida avabidia, Aigupto ba heaulaidia lao, unuseni ai ba ha noho, ela bona lau ma baina hereva henimu lou; badina be Herod ese mero maraḡina e tahuamu, baine alaia mase e tomu. 14 Bena Iosef e noga, mero maraḡina sinana ida hanuaboi ai e abidia, Aigupto ela. 15 Unuseni ai eha noho ela bona Herod e mase, Lohiabada ese peroveta tauna uduna amo e gwauraia herevana ihamomokanina; eto, Aigupto amo natugu na boiria.
16 Una negana ai Herod na dibana aonega taudia ese vada e koia, bena e badu dikadika. Bena e hesiai, laḡanidia rua bona gabeai e vara memerodia iboudiai na Betelehem ai bona badina tanodia ai e aladia mase, aonega taudia e nanadailaidia negana heḡereḡerena. 17 Una negana ai Ieremia, peroveta tauna, ena hereva vada e momokani; eto,
18 Gado ta Rama ai e kamonai,
Tai lolololo bona tai ḡadeḡade bada,
Rahela be natuna taidia e taimu,
Tauhalo e dadaraia, badina be idia na lasihidia.
Nasaret e lou henia
19 Herod e mase murinai, Lohiabada ena aneru ese nihi ai Iosef ma e hahedinarai henia lou, Aigupto ai. 20 Eto, A tore isi, mero maraḡina sinana ida avabidia, Israel tanona baola, badina be mero maraḡina iala-masena e tahuava taudia na vada e mase. 21 Bena e tore isi, mero maraḡina bona sinana e abidia, Israel tanona ela. 22 To sivarai e kamonai Akelao ese Iudea e lohiaia, tamana Herod gabunai, bena unu lao garina e gariva. A nihi amo Dirava ese e hadibaia dainai e raka hanai, Galilea kahana ela, 23 hanua ta ai, ladana Nasaret, eha noho. Taunabunai peroveta taudia edia hereva vada e momokani; eto, Ia na Nasaret tauna bae gwauraia.